Qafqaz Müsəlmanları İdarəsi 20 Yanvar faciəsinin 24-cü

ildönümü ilə əlaqədar bəyanat yaymışdır

Qafqaz Müsəlmanları İdarəsi (QMİ) 20 Yanvar faciəsinin 24-cü ildönümü ilə əlaqədar bəyanat yaymışdır.

Bəyanatda bildirilir ki, Azərbaycan xalqının tarixi yaddaşına dərin hüzn, kədər, eyni zamanda milli qürur günü kimi həkk olunmuş 20 Yanvar ərəfəsindəyik. 24 ildir ki, şəhid olanların, yaralananların, itkin düşənlərin ağrı-acısı qəlbimizdədir. Bizim yaddaşımız - Azərbaycanın müstəqilliyi, dövlətçiliyimizin bərpası, torpaqlarımızın qaytarılması və ateist imperiyanın dağılması uğrunda mübarizənin ilk qurbanlarına - Allah-Taala dərgahında ən yüksək məqamlardan sayılan şəhidlik zirvəsinə ucalanlara sonsuz ehtiramımızdır.

Bəyanatda qeyd edilir ki, 20 Yanvar bizi müstəqilliyə, hürriyyətə, milli mənəvi dəyərlərin bərpasına aparan yolun ilk mübarizəsi və ilk mənəvi qələbəsi idi. Həmin gün silahlanmış sovet ordusunun cəza tədbirlərinə məruz qalan xalq diz çökmədi, azadlıq əzmini itirmədi, əksinə, haqq səsini daha da yüksəkdən bəyan etdi. Azərbaycanın taleyi, hətta xəritədəki varlığı şübhə altında olduğu bir vaxtda ilk olaraq Moskvadan xalqımızın mərd oğlu, müdrik dövlət xadimi Heydər Əliyev özünün etiraz səsini ucaltdı, qanlı cinayətin təşkilatçılarını qəzəblə ittiham etdi. Bakıda isə Qafqaz Müsəlmanları İdarəsi qanlı hadisələrin ilk günündən vəziyyətə nəzarət edən və əhalinin yeganə ümid yeri olan mərkəzə çevrildi, çoxmilyonluq insan axınının, ölüm-qalım problemlərinin önündə durdu. 20 Yanvar faciəsinin dünya ictimaiyyətinə, nüfuzlu beynəlxalq təşkilatlara çatdırılmasına, törədilən əməlin bəşəriyyətə qarşı amansız cinayət kimi qiymətləndirilməsinə çalışdı. Şeyxülislam Allahşükür Paşazadənin SSRİ prezidenti Mixail Qorbaçova göndərdiyi qəzəb dolu məktubunda hadisələrə sərt və prinsipial münasibət bildirildi.

Bəyanatda daha sonra deyilir: "Biz bu gün də təəssüf edirik ki, bu faciə beynəlxalq aləmdə mövcud olan ikili yanaşmalar səbəbindən tam hüquqi qiymətini almamış, cinayətkarlar məsuliyyətə cəlb olunmamış və Azərbaycan xalqının cəlladları layiqli cəzalarını almamışlar. Lakin əminik ki, onlar Allah-Taalanın və tarixin mühakiməsindən qaça bilməyəcəklər. Ona görə də 20 Yanvar tarixi şəhidlərimizi qürurla anmaq, xalqımızda, xüsusilə gənclərimizdə qəhrəmanlıq və vətənpərvərlik ruhunu tərbiyə etmək gününə çevrilmişdir.

Dini mərkəz olaraq bəyan edirik ki, 20 Yanvar günü bütün məscidlərdə və dini məclislərdə şəhidlərin şəninə xütbələr deyiləcək, onların əziz ruhlarına Quran oxunacaq, dualar ediləcək, gənclərə Vətən, haqq, ədalət uğrunda, Qarabağ uğrunda haqq mübarizəmizdə qəhrəmanlıq ruhu təbliğ ediləcəkdir. Qafqaz Müsəlmanları İdarəsi 20 Yanvar şəhidlərinin, eləcə də Vətənimizin bütövlüyü, milli müstəqilliyimiz və Qarabağ uğrunda canlarını fəda etmiş bütün şəhidlərin ailələrinə dərin hüznlə başsağlığı verir, onlara Allahdan səbir və dəyanət arzulayır.

Allah köməyimiz olsun!"

AzərTAc

Azərbaycan.-2014.- 18 yanvar.- S.9.