Azərbaycan nümayəndə heyəti Mədinə şəhərində

Mədəniyyət Nazirlərinin VIII İslam Konfransında iştirak edir

Yanvarın 21-də 2013-cü il üçün İslam mədəniyyətinin paytaxtı seçilmiş Səudiyyə Ərəbistanının Mədinə şəhərində İSESCO-nun təşkilatçılığı ilə Mədəniyyət Nazirlərinin VIII İslam Konfransı öz işinə başlamışdır.

Yanvarın 23-də başa çatacaq konfransda Azərbaycanı mədəniyyət və turizm naziri Əbülfəs Qarayevin rəhbərlik etdiyi nümayəndə heyəti təmsil edir.

Mədəniyyət və Turizm Nazirliyinin mətbuat xidmətindən AzərTAc-a bildirmişlər ki, VIII konfransın açılış mərasimində Əbülfəs Qarayev VII konfransın prezidenti kimi çıxış edərək İSESCO-nun son iki il müddətindəki fəaliyyətini yüksək qiymətləndirmişdir.

Konfrans çərçivəsində "Mədəni hüquqların sülh və dialoqda rolu" sessiyasında isə Ə.Qarayev ölkəmizin nümayəndə heyətinin rəhbəri kimi çıxış edərək son iki ildə Azərbaycan-İSESCO əməkdaşlığının inkişafından, həyata keçirilən birgə layihələr və perspektivlərdən bəhs etmiş, Azərbaycan Respublikasının Prezidenti İlham Əliyevin təbrikini konfrans iştirakçılarına çatdırmışdır.

Səfər çərçivəsində nazir Ə.Qarayev İSESCO-nun baş direktoru Əbdüləziz Othman Altvaijri və Səudiyyə Ərəbistanı Krallığının mədəniyyət və informasiya naziri Əbdüləziz bin Mohieddin Khoja ilə görüşlər keçirmişdir. Əbülfəs Qarayev, həmçinin Səudiyyə Ərəbistanı Kral ailəsinin üzvü, Mədinənin əmiri Feysəl bin Salman Əl Saud ilə də görüşmüş və Azərbaycan Respublikasının Prezidenti İlham Əliyevin salamlarını ona çatdırmışdır.

Azərbaycan.-2014.- 23 yanvar.- S.4.