Davosda Dünya İqtisadi Forumunun illik toplantısı çərçivəsində genişzolaqlı

internetin inkişafı üzrə BMT Komissiyasının xüsusi forumu keçirilmişdir

Yanvarın 24-də Davosda Dünya İqtisadi Forumunun illik toplantısı çərçivəsində BMT-nin baş katibi Pan Gi Munun təşəbbüsü ilə yaradılmış genişzolaqlı internetin inkişafı üzrə BMT Komissiyasının xüsusi forumu keçirilmişdir.

Forum Azərbaycanın Rabitə və İnformasiya Texnologiyaları Nazirliyinin, Dünya İqtisadi Forumunun və Beynəlxalq Telekommunikasiya İttifaqının birgə təşkilatçılığı ilə baş tutmuşdur. Tədbirdə 50 ölkənin dövlət, özəl sektor və vətəndaş cəmiyyətinin nümayəndələri iştirak etmişlər.

Forumda Ruanda Prezidenti Pol Kaqame genişzolaqlı internetin müasir dünyadakı rolundan danışmış, bu istiqamətdə ölkələrin qarşılıqlı əməkdaşlığının, təcrübə mübadiləsinin zəruriliyini qeyd etmişdir.

Beynəlxalq Telekommunikasiya İttifaqının baş katibi Hamadun Ture rəhbərlik etdiyi təşkilatın genişzolaqlı internetin inkişafı istiqamətində apardığı işlərdən və bir sıra ölkələrin təcrübələrindən danışmışdır. Bu baxımdan Azərbaycan hökumətinin də ölkəni yüksək sürətli internetlə təmin edəcək təşəbbüsünü yüksək qiymətləndirmişdir.

Rabitə və informasiya texnologiyaları naziri Əli Abbasov Prezident İlham Əliyevin rəhbərliyi ilə Azərbaycanda informasiya-kommunikasiya texnologiyaları sektorunda qazanılmış uğurlardan, xüsusilə yüksək sürətli internetin inkişafından danışmış və bu komissiya vasitəsilə müsbət təcrübə mübadiləsinin aparılacağını bildirmişdir.

Tədbirin iştirakçıları genişzolaqlı internetin inkişafı ilə bağlı müzakirələrə qatılmış, bu istiqamətdə dövlət-özəl sektor platformasının tətbiqinin vacibliyini qeyd etmiş, bu forumun növbəti illərdə də bu formatda davam etdirilməsi tövsiyə olunmuşdur.

AzərTAc

Azərbaycan.-2014.- 25 yanvar.- S.3.