Mingəçevirin turizm potensialı böyükdür

Hələ orta əsrlərdə Azərbaycan ərazisinin coğrafi üstünlükləri xarici qonaqların diqqətini özünə cəlb edibdi. Bunu ayrı-ayrı vaxtlarda ölkəmizə səfər edən səyyahlar, tanınmış şair və yazıçılar öz əsərlərində, yol qeydlərində sevə-sevə, böyük məmnunluqla qələmə alıblar. Zəngin və rəngarəng təbiətə malik Azərbaycana ulu Tanrı bütün nemətləri səxavətlə bəxş etmişdir. Ölkəmizin yerləşdiyi coğrafi mövqe, tarixi abidələrin çoxluğu, təbii sərvətlərin bolluğu, dayanıqlı ictimai-siyasi sabitliyin mövcudluğu Azərbaycanda turizmin inkişafını şərtləndirən başlıca cəhətlərdir.

Azərbaycanın tarixini, maddi mədəniyyət abidələrini, təbii gözəlliklərini, yüksək əxlaqi dəyərlərdən qaynaqlanan milli xüsusiyyətlərini yüksək qiymətləndirən xalqımızın ümummilli lideri Heydər Əliyev turizmin inkişaf etdirilməsinə böyük önəm verirdi.

Ulu öndər yenidən hakimiyyətə qayıdarkən uzun illər boyu dünya üçün demək olar ki, qapalı olan Azərbaycana beynəlxalq aləmin, xarici dövlətlərin marağını nəzərə alıb turizmin inkişafını sürətləndirmək üçün dövlət əhəmiyyətli qərarlara imza atdı. Ulu öndər Heydər Əliyevin başladığı taleyüklü məsələləri uğurla davam etdirən respublika Prezidenti İlham Əliyev də ölkədə turizmin inkişaf perspektivlərini görərək bu sahədə böyük uğurlara etibarlı bünövrə qoydu. Turizmin inkişafında mütəxəssislərin, peşəkar kadrların rolu dövlət səviyyəsində yüksək qiymətləndirilərək 2006-cı ildə Azərbaycan Respublikası Nazirlər Kabinetinin müvafiq qərarına əsasən Azərbaycan Turizm İnstitutu və Mingəçevir Turizm Kolleci yaradıldı. Prezident İlham Əliyevin 6 aprel 2010-cu il tarixli sərəncamı ilə təsdiq edilmiş “Azərbaycan Respublikasında 2010-2014-cü illərdə turizmin inkişafına dair Dövlət Proqramı”nda nəzərdə tutulan vəzifələr müvəffəqiyyətlə icra edilmişdir. Dövlət başçısının təşəbbüsü ilə 2011-ci ilin ölkədə “Turizm ili” elan edilməsi turizmin inkişafına dövlət qayğısının bariz göstəricisi olmuşdur.

Ölkəmizdə yaradılan gözəl şərait, istirahət mərkəzləri, parklar, xiyabanlar, beşulduzlu hotellər, geniş və rahat yollar, beynəlxalq aeroportlar, mədəni-tarixi abidələrin çoxluğu, eyni zamanda ictimai-siyasi sabitlik Azərbaycana turist axınının ildən-ilə artmasına imkan vermişdir. Dünyada neft ölkəsi kimi tanınan Azərbaycan bu gün həm də turizm ölkəsi kimi beynəlxalq aləmin diqqətini çəkir. Əcnəbi və yerli turistlərin sevə-sevə üz tutduqları gözəl məkanlardan biri də Mingəçevir şəhəridir. Mingəçevirdə dünya standartlarına cavab verən dördulduzlu “Riverside” və “Kür” hotelləri fəaliyyətdədir. Dördulduzlu “Ağ saray” hotelinin tikintisində isə son tamamlama işləri aparılır. Bundan əlavə şəhərdə mehmanxana tipli müxtəlif obyektlər də mövcuddur.

Mingəçevir Turizm Kolleci yerləşdiyi şəhərin turizm mərkəzinə çevrilməsində baza rolu oynamaqla yanaşı, ölkənin turizm sahəsi üçün ixtisaslı kadrlar hazırlayır. Kollec rəhbərliyi xarici dövlətlərlə təcrübə mübadiləsinə böyük önəm verir, bu istiqamətdə diqqət çəkən uğurlar qazanır. Çoxtərəfli əməkdaşlıq münasibətlərinin qurulmasını və inkişaf etdirilməsini turizm siyasətinin prioritet istiqamətlərindən biri kimi dəyərləndirən dövlətimiz dünyanın bir sıra aparıcı təşkilatları ilə səmərəli əməkdaşlıq əlaqələri qurmuş, bu sahədə böyük əhəmiyyət kəsb edən beynəlxalq proqramlara qoşulmuşdur. Görülən məqsədyönlü tədbirlərin nəticəsidir ki, Azərbaycan dünyanın 29 ölkəsi ilə turizm sahəsində hökumətlərarası saziş bağlamış, müxtəlif ölkələrdə keçirilən beynəlxalq turizm sərgilərində fəal iştirak etmişdir.

Ürək ağrıdan təəssüf hissi ilə qeyd olunmalıdır ki, Azərbaycanın istər təbiət gözəlliklərinin qeyri-adiliyi, istərsə də maddi mədəniyyət, tarixi abidələrinin bolluğu baxımından daha çox zəngin olan ərazilərinin bir hissəsi uzun illərdən bəri Ermənistan silahlı qüvvələrinin işğalı altında saxlanılır. Bu gün Azərbaycanda hər kəs inanır ki, respublika Prezidenti İlham Əliyevin yeritdiyi müdrik siyasət torpaqlarımızın işğaldan azad olunmasını tezliklə reallaşdıracaq, qaçqın və məcburi köçkünlər doğma yurd yerlərinə dönəcəklər. Dağılmış, odlara qalanmış şəhərləri, qəsəbə və kəndləri yenidən tikib-qurmaqla yanaşı, o ərazilərdə müasir turizm infrastrukturu da yaradılacaqdır. Bu gün biz çox nikbinik. Xalqımızın əhval-ruhiyyəsi yüksək, sabaha ümidləri böyükdür.

Ana Kürün ikiyə böldüyü Mingəçevirin turizm potensialı kifayət qədərdir. Hələ 2010-cu ildə bölgəyə səfəri zamanı şəhər ictimaiyyətinin nümayəndələri ilə görüşündə bu imkanları yüksək dəyərləndirən respublika Prezidenti İlham Əliyev demişdir: “Mingəçevir beynəlxalq turizm mərkəzinə çevrilməlidir. Buna nail olmaq üçün bütün imkanlar, gözəl təbiət, təmiz hava, iqlim, təbii şərait vardır. İndi yollar da çəkilir. Bakını Mingəçevirlə birləşdirən avtomobil yolu tikilir. Gəncə aeroportu fəaliyyətdədir. Yəni Mingəçevir bir turizm mərkəzi olmalıdır”.

Fevralın 24-də respublika Prezidenti İlham Əliyevin Mingəçevirə gerçəkləşən növbəti, sayca beşinci səfərinin məntiqi nəticəsi dövlət başçısının energetiklər şəhərinin turizm potensialına verdiyi böyük önəmi bir daha təsdiq etdi. Şəhərdə aparılan genişmiqyaslı abadlıq, quruculuq işlərini yüksək dəyərləndirən Prezident İlham Əliyev yaxın gələcək üçün yeni fəaliyyət istiqamətlərini də müəyyən etdi. Şəhərdə müasir tələblərə uyğun sənaye parkı yaradılmasını vacib sayan və bu prosesin uğurla davam etdiyini vurğulayan dövlət başçısı eyni zamanda yeni inşa olunan “Ağ saray” hotelində yaradılmış şəraitlə, “Kür” Olimpiya Tədris İdman Mərkəzində aparılan yenidənqurma, abadlıq və quruculuq işləri ilə tanış oldu, dəyərli tövsiyələrini verdi. Təbii ki, dövlət başçısının bu mövqeyi Mingəçevirin müasir turizm mərkəzinə çevrilməsi uğrunda mübarizənin sürətini əsaslı şəkildə artırır, bu prosesə yeni impuls verir. Məlum olduğu kimi, I Avropa Oyunları ölkəmizin paytaxtı Bakı ilə yanaşı, Mingəçevirdə də keçiriləcəkdir. Avropa ölkələrinin avarçəkənləri “Kür” Olimpiya Tədris İdman Mərkəzinin bazasında yarışacaqlar. Gözlənilən bu idman bayramı Mingəçevirin turizm mərkəzinə çevrilməsi prosesində heç şübhəsiz mühüm mərhələ olacaqdır. Səfər sonrası dövlət başçısının sərəncamı ilə Mingəçevirin gözəlləşdirilməsi üçün 10 milyon manat vəsait ayrılması sakinlər tərəfindən minnətdarlıqla qarşılanmaqla yanaşı, şəhərdə gedən abadlıq, quruculuq işlərinə zərbəçi ahəng vermişdir.

Dövlət qayğısından, Prezident İlham Əliyevin isti və xüsusi münasibətindən güc alan mingəçevirlilər sabaha inamla addımlayırlar. Ana Kürün sahilində qərar tutan bu gənc və gözəl şəhərin hüsnünə hər gün yeni bir naxış vurulur. Heç şübhəsiz gəlişi gözlənilən çoxsaylı avropalı qonaqlar da havası, suyu təmiz, ilin bütün fəsillərində bahar libaslı bu şəhərin yaraşığına, sakinlərinin mehribanlığına, qonaqpərvərliyinə heyran olacaqlar.

Sahib ƏLİYEV,

pedaqogika üzrə fəlsəfə doktoru

Mingəçevir

Azərbaycan.-2015.- 7 aprel.- S.9.