Nuh yurdunda möhtəşəm idman bayramı

45 gün sonra ölkəmizin paytaxtı Bakı tarixdə ilk dəfə keçiriləcək Olimpiya Oyunlarının açılış mərasiminə şahidlik edəcək. Ölkəmizin müstəqillik qazandıqdan ötən 24 il ərzindəki dinamik inkişafı, sürətli iqtisadi artım tempi, eləcə də tarix-mədəni ənənələrə sahib olması Avropa Oyunlarının Azərbaycana həvalə olunmasında başlıca rol oynadı. Bu sürətli inkişafın nəticəsində də dünyanın bir çox superdövlətləri arasında iqtisadi gücünə görə özünə yer tutan, həmin ölkələrlə qarşılıqlı əməkdaşlıq, tərəfdaşlıq imicini formalaşdıran ölkəmiz bir çox mötəbər tədbirlərə ev sahibiliyi ənənəsinin də əsasını qoydu.

Son illərə kimi müxtəlif idman növlərində dünya və Avropa çempionatlarına ev sahibliyi edən Azərbaycan son beş ildə “Eurovision” musiqi yarışmasının təşkilatçılığı ilə bir daha diqqətləri öz üzərinə çəkdi. Bunun ardınca “Bakı-2015” I Avropa Oyunlarının ölkəmizdə keçirilməsinə qərar verilməsi, iki il sonra İslam Həmrəylik Oyunlarının, həmçinin bir neçə ölkədə keçiriləcək AVRO-2020-nin bir qrupunun üç oyunun və bir dörddə bir final oyununun Azərbaycanda keçirilməsinin qərara alınması da ölkəmizin dünyada qazandığı iqtisadi cəhətdən güclü dövlət imicinin təkzibolunmaz göstəricisidir.

I Avropa Oyunları da məhz bu cür dünya miqyaslı tədbirlərdən biridir. Dünən Bakı şəhərində qədim “Atəşgah” məbədində ölkə başçısı cənab İlham Əliyev tərəfindən alovlandırılan məşəl aprel ayının 27-də Naxçıvan Muxtar Respublikasına gətirildi.

Əvvəlcədən qeyd etmək istərdim ki, I Avropa Oyunlarının məşəli 47 gün ərzində Azərbaycanın hər bir guşəsini gəzib-dolaşaraq, Oyunların açılış mərasimində Bakı Olimpiya Stadionuna gətiriləcək. Bu estafetə ölkəmizin tanınmış idmançılarından ibarət olan 1000 nəfərdən çox məşəlçi cəlb olunub.

Onu da nəzərə çatdıraq ki, iyun ayının 10-u məşəl proqramının son günü olacaq və Bakıya gətirilənədək təxminən 5500 kilometr məsafə qət edəcək məşəl 660 millimetr hündürlüyündədir. Məşəlin gövdəsi “Bakı-2015” brendində yer alan nar ağacını xatırladır. Alovu qoruyan mis başlıq da nar formasındadır. Onun 50 çəyirdəyi isə Birinci Avropa Oyunlarda iştirak edən ölkələrin sayını simvollaşdırır.

Məşəl 45 gün boyunca yer üstündə avtobus, funikulyor, velosiped, yer altında Bakı metrosu, suda qayıq, havada isə təyyarə ilə daşınacaq. Dünən məşəl məhz təyyarə ilə Naxçıvan Muxtar Respublikasına gətirildi.

Məşəlin muxtar respublikaya gətirilməsi münasibətilə aprel ayının 27-də Naxçıvan şəhərində möhtəşəm məşəl festivalı keçirildi. Məşəl festivalında iştirak etmək, ilk Avropa Oyunlarının bir növ tamaşaçısına çevrilmək üçün muxtar respublikanın rayon və kəndlərindən, ən ucqar yaşayış məntəqələrindən belə vətəndaşlar Naxçıvan şəhərinə axışmışdılar. Məşəlin Naxçıvan Muxtar Respublikası Beynəlxalq Hava Limanından festivalın keçiriləcəyi yerə kimi hərəkət istiqaməti boyunca yolların sağ-solunda insan izdihamı var idi.

Bakıdan Naxçıvana təyyarə ilə məşəli gətirən Rəfiqə Şabanova idmançı onu Naxçıvan şəhərindəki Qoçüstü məhəlləsində türk xalqlarının tarixi qəhrəmanı Koroğlunun Qıratın belindəki heykəli qarşısında naxçıvanlı idmançı, Naxçıvan Muxtar Respublikası voleybol yığmasının üzvü Xanım Xudadanovaya təslim etdi.

Bu andan etibarən Naxçıvan şəhərindəki hərəkət istiqamətinə uyğun olaraq Qoçüstü məhəlləsi və Cəlil Məmmədquluzadə küçəsi boyunca idmançıların estafetlə bir-birinə təhvil verdiyi məşəl Naxçıvan şəhərinin baş meydanında, Heydər Əliyev prospektində, ulu öndərin siyasi hakimiyyətə qayıdışının ilk məkanı olan Naxçıvan Muxtar Respublikası Ali Məclisinin yanında, ümummilli liderin həyat və fəaliyyətini əks etdirən Heydər Əliyev Muzeyinin qarşısında, onun əzəmətli heykəlinin önündəki meydana gətirildi.

Bir az əvvələ qayıdaraq vurğalayaq ki, Koroğlu heykəlinin qarşısında məşəli qəbul edən Xanım Xudadanova yüzlərlə insanın alqış sədalarının müşayiətində məşəli qürurla və şərəflə daşıyaraq asta qaçışla sağa-sola əl edərək muxtar respublikanın digər idmançısı, yüngül atletika nümayəndəsi, qaçış üzrə muxtar respublika birincisi Gülxanım Cəlilovaya, o da öz növbəsində voleybol üzrə qadınlardan ibarət Naxçıvan Muxtar Respublika yığmasının digər üzvü Səkinə İbrahimovaya ötürdü. Məşəli daşımağın qüruruyla bir neçə yüz metr qaçan Səkinə İbrahimova onu voleybol üzrə qadınlardan ibarət Naxçıvan Muxtar Respublika yığmasının kapitanı Fəridə Hənəfiyevaya təqdim etdi. O isə muxtar respublikanın fəal gənclərindən biri olan Tamerlan Abdullayevə ötürdü.

Bu ardıcıllıqla məşəl yüngül atletikanın qaçış növü ilə məşğul olan Tural Gözəlova, Tural isə öz növbəsində sərbəst güləşçi Sahil Rüşanova estafeti ötürdü. Daha sonra voleybol üzrə kişilərdən ibarət muxtar respublika yığmasının üzvü Kənan Əsədov, cüdoçu İbrahim Musayev, karateçi Əfqan Qurbanov məşəli insan izdihamının alqışlarıyla birlikdə daşıdılar. Sonda isə məşəl voleybol üzrə kişilərdən ibarət Naxçıvan Muxtar Respublika yığmasının kapitanı, eyni zamanda Azərbaycan yığmasının üzvü Polad Əliyevə təhvil verildi.

Biz estafet boyunca fürsətdən istifadə edib bir neçə məşəlçinin fikirlərini öyrəndik. İlk olaraq məşəli təhvil alan Xanım Xudadanova öz təəssüratlarını bölüşdü:

- Bilirəm ki, məşəl ölkəmizin 60 rayonunda nümayiş olunacaq, 1000-dən çox gənc bu məşəli daşıyacaq. Amma mən o məşəli daşıyan ilk gənc idmançı olaraq çox böyük bir şərəf və qürur duyuram. İnanıram ki, həmin anda hamı mənim yerimdə olmaq istərdi. Buna görə mən böyük bir məsuliyyət daşıyırdım. Müstəqil ölkəmizin gənci olaraq I Olimpiya Oyunlarının məşəlini daşımaq nə qədər şərəflidirsə, bu hissi ifadə etmək bir o qədər çətindir.

Fəal gənc Tamerlan Abdullayev isə öz təəssüratlarını belə ifadə etdi:

- Qürurlu bir məqam idi. O məşəli daşıyarkən düşünürdüm ki, bir çox beynəlxalq yarışlara ev sahibliyi edən ölkəmizin sürətli iqtisadi inkişafı sayəsində, dünyada tanınmasının nəticəsində biz yaxın onilliklərdə Dünya Olimpiadasının da məşəlinin bu insanların önündən daşındığının şahidi olacağıq.

Naxçıvan şəhərinin mərkəzi meydanında qurulmuş səhnədə festivalın aparıcısının qürur dolu sözləri ətrafda əks-səda verərək fəxr mənbəyinə çevrilirdi:

- Salam Azərbaycan! Salam Naxçıvan!

Naxçıvan qədim türk diyarı, ulu Azərbaycan torpağı. Şərəfli tarixi olan qəhrəmanlar məskəni. Qədim maddi mədəniyyət abidələri ilə zəngin, tarixən “Nəqşi-cahan” adlandırılan Naxçıvan Qərbdən Şərqə açılan qapıdır. Tarixi günləri yaşayır Vətənimiz. Ölkəmizdə Avropa Oyunlarının keçirilməsinə lap az qalıb. Hazırda isə sizinlə birgə ilk Avropa Oyunlarının məşəlini yandırmaq üçün toplaşmışıq. Sizin hamınızı burada görmək xoşdur.

Bütün dünyanın ən əhəmiyyətli idman hadisələrindən biri olan Avropa Oyunları ilə bağlı Azərbaycanın 60 şəhərində məşəl estafetlərinin, məşəl festivallarının təşkil ediləcəyini diqqətə çatdıran aparıcı sonra məşəli gətirən sonuncu idmançının burada olduğunu xatırlatdı.

Əlindəki məşəllə meydana yaxınlaşan Polad Əliyev alqış sədaları altında bir neçə dövrə vurdu.

Artıq Günəş qürub etmək üzrə idi. Polad Əliyevin əlində alovlanan məşəl havanın alatoranlığında daha möhtəşəm görünür, Odlar Yurdunun tarixi rəmzi olan odun alov dilimləri festival iştirakçılarının qürur mənbəyinə çevrilirdi.

Heydər Əliyev prospektində qurulmuş səhnəyə doğru insanların arasından keçərək gələn Polad Əliyev aparıcının təqdimatıyla tədbirə toplaşanların alqış sədaları altında səhnəyə dəvət olundu.

Səhnədə Naxçıvan şəhərinin rəsmi nümayəndəsi, Naxçıvan Muxtar Respublikası gənclər və idman naziri Azad Cabbarovla birlikdə Oyunlar boyunca Naxçıvan şəhərində alovlanacaq məşəli yandırdılar.

Aparıcının məşəli daşımaq necə bir hissdir sualını cavablandıran Polad Əliyev bunları dedi:

- Bu gün Naxçıvan şəhəri möhtəşəm bir festivala şahidlik edir. Və bu festivalın ən önəmli bir təmsilçisi olduğum üçün hədsiz dərəcədə həyəcanlı və qürurluyam. Mənim üçün qədim Nuh yurdunda Oyunlar boyunca alovlanacaq atəşi yandırmaq şərəfdir. Həm də bir Azərbaycan vətəndaşı olaraq ölkəmizin belə bir mötəbər tədbirə ev sahibliyi etdiyi üçün də hədsiz dərəcədə qürur duyuram. Avropa Oyunlarında ölkəmizi təmsil edən bütün idmançılara, xüsusilə də Naxçıvan Muxtar Respublikasının yeganə idmançısı, boksçu Tayfun Əliyevə uğurlar arzu edirəm. Ümid edirəm ki, biz onu Avropa Oyunlarından sonra, burada, bu meydanda çempion kimi qarşılayacağıq.

Məşəlçinin bu sözləri bütün naxçıvanlıların bir neçə dəqiqəlik alqışlarına səbəb oldu. Hiss olunurdu ki, festivala toplaşan hər kəs muxtar respublikanın yeganə təmsilçisi Tayfun Əliyevə böyük ümidlər bəsləyir.

Daha sonra söz Naxçıvan Muxtar Respublikası gənclər və idman naziri Azad Cabbarova verildi.

“Bakı-2015” Avropa Oyunlarının məşəlinin ilk səyahətinə Azərbaycanın qədim yurdu olan Naxçıvandan başladığını qeyd edən, bu tarixi hadisə münasibətilə Alov festivalının iştirakçılarını salamlayan və təşkilatçılara minnətdarlığını bildirən nazir sözünə belə davam etdi:

- Ümummilli lider Heydər Əliyevin müəyyənləşdirdiyi idman siyasəti Azərbaycan Respublikasının Prezidenti cənab İlham Əliyev tərəfindən uğurla davam etdirilir. Bunun nəticəsidir ki, Azərbaycan dünyanın ən nüfuzlu idman yarışlarına yüksək səviyyədə ev sahibliyi edir, idmançılarımızın Olimpiya Oyunlarında, dünya və Avropa çempionatlarında qazandıqları medalların sayı ilbəil artır.

Naxçıvan Muxtar Respublikasında da idman qayğı ilə əhatə olunub. Olimpiya idman kompleksləri, üzgüçülük, şahmat, stend və sportinq atıcılıq mərkəzləri, stadionlar, şahmat və uşaq-gənclər idman məktəbləri yaradılıb.

Bütün bunlar ölkəmizdə idmanın göstəricisidir. Təsadüfi deyil ki, Azərbaycan dünyada həm də idman ölkəsi kimi tanınır.

Ölkəmiz bu ilin iyun ayında qitədə ilk dəfə olaraq keçiriləcək Avropa Oyunlarına ev sahibliyi edəcəkdir. Bu oyunlar Azərbaycanda idmanın inkişafına, ölkəmizin dünyada tanınmasına, etibarlı imic qazanmasına, milli mədəniyyətimizin dünyada nümayiş olunmasına şərait yaradacaqdır.

Çıxışının sonunda I Avropa Oyunlarının Azərbaycanda keçirilməsinin naxçıvanlıları, o cümlədən muxtar respublika idmançılarını da çox sevindirdiyini bildirən nazir bu münasibətlə bütün idmançıları təbrik etdi, onlara Avropa Oyunlarında uğurlar arzuladı.

Bundan sonra milli mədəniyyətimizin zəngin bir qolu olan Şərur Xalq Yallı Ansamblının və Naxçıvan Dövlət Filarmoniyasının kollektivləri səhnəyə çıxdı. Kollektivlərin ifasında bir neçə rəqs ifa olunduqdan sonra aparıcı məşəl estafeti, həmçinin oyunlar haqqında bir neçə məlumat verdi. Aprel ayının 26-da Azərbaycan Respublikasının Prezidenti İlham Əliyev, Azərbaycanın birinci xanımı, I Avropa Oyunları Təşkilat Komitəsinin sədri Mehriban Əliyeva, Avropa Olimpiya Komitəsinin prezidenti Patrik Hikkinin və eləcə də 150-dən artıq qonağın iştirak etdiyi, Azərbaycan Respublikasının Prezidenti İlham Əliyev tərəfindən “Atəşgah” məbədindən I Avropa Oyunları alovunun götürülməsi mərasimi barədə videoçarx nümayiş olundu.

Muxtar respublikanın minlərlə sakininin izlədiyi Məşəl festivalından sonra bir neçə vətəndaşın fikirlərini öyrəndik.

Azərbaycan Milli Elmlər Akademiyası Naxçıvan Bölməsinin sədri, akademik, Milli Məclisin deputatı İsmayıl Hacıyev:

- Azərbaycan Respublikası müstəqillik illərində çox böyük uğurlara imza atmışdır. Bu uğurlar mürəkkəb bir şəraitdə əldə edilmişdir. Müstəqilliyin ilk illərində ərazimizin bir hissəsinin itirilməsi, vətəndaşlarımızın bir milyona yaxınının qaçqın və məcburi köçkün taleyinə məhkum edilməsi ölkəmizin inkişafı üçün çətinlik yaratsa da, ulu öndər Heydər Əliyevin uzaqgörən siyasəti, qətiyyətli mövqeyi Azərbaycanın uğurlarının əsasını qoymuş, gələcək inkişaf üçün baza rolunu oynamışdır. Heydər Əliyevin siyasi kursu ölkə Prezidenti İlham Əliyev tərəfindən yüksək səviyyədə davam etdirilir.

Azərbaycan elə də böyük ölkə deyildir. Lakin ölkəmiz elə möhtəşəm hadisələrə imza atmışdır ki, bunlar Azərbaycanı dünyada tanıtmış, nüfuzunu artırmış, beynəlxalq birliyin diqqətini cəlb etmişdir. Azərbaycanın BMT-nin üzvü seçilməsi, kosmik sənayeyə malik olması, beynəlxalq mahnı müsabiqəsinin - “Eurovision”un Azərbaycanda keçirilməsi hətta böyük dövlətlərin də həsəd apardığı faktlardır.

“Bakı-2015” ilk Avropa Oyunlarının Azərbaycanda keçirilməsi təsadüfi deyildir. Belə bir beynəlxalq oyunun Azərbaycanda baş tutması ölkəmizin nüfuzundan, ona bəslənilən inam və etibardan irəli gəlir. Azərbaycan həm Asiya ölkəsidir, həm də Avropa ölkəsidir. Avropa ölkələri inanır ki, Azərbaycan bu oyunlara ən yüksək səviyyədə ev sahibliyi edəcək. Oyunlara hazırlıq işləri dünyada yüksək qiymətləndirilir. I Avropa Oyunlarının Təşkilat Komitəsinin sədri, Azərbaycanın birinci xanımı Mehriban Əliyevanın rəhbərliyi ilə görülən işlər, həyata keçirilən tədbirlər Avropa Oyunlarının çox yüksək səviyyədə keçiriləcəyindən xəbər verir.

“Bakı-2015” Birinci Avropa Oyunlarının məşəlinin ölkə səyahətinə Naxçıvandan başlanması bizim üçün ikiqat bayramdır. Naxçıvanda alovlanan məşəl bütün dünyaya şölə saçacaqdır. Naxçıvan dünyanın elə bir ərazisidir ki, kosmosdan yerin rəngi Naxçıvan rəngində görünür. Naxçıvan qədim tarixə, dövlətçilik ənənələrinə malik olan müqəddəs bir məkandır. Bu gün festivalda şahidi olduğumuz məşəl I Avropa Oyunlarının ədalətliyinə, obyektlivliyinə işıq saçaraq güclülərin qalib gəlməsini şərtləndirəcəkdir. Müqəddəs məkandan nur alan I Avropa Oyunları Azərbaycanın timsalında ən yüksək uğurları ilə Avropanı bəzəyəcəkdir. Uğur olsun!

Şəhid anası Solmaz Əliyeva: “Bu gün burada yaşadıqlarımız ötən əsrin sonlarında müstəqilliyini qazanmış gənc bir ölkənin növbəti uğurudur. Sinəm qabarır ki, bu vətən üçün, bu azadlıq və müstəqillik üçün canından keçən, şəhid olan övladlarımızın qanı havayı tökülmədi. Onların şəhid olduğu vətənin hər sahədəki uğurları, inkişafı bir şəhid anası kimi məni doğrudan da kövrəltdi. Oğlum Əmiraslan Əliyev ölkəmizin müstəqilliyi və torpaqlarımızın bütövlüyü uğrunda şəhid olub. Bu gün onun ruhu da bax bu yüzlərlə, minlərlə insanın arasından bu mənzərəni izləyir. Həm də inanıram ki, necə ki, ölkəmiz ulu öndər Heydər Əliyevin müəyyənləşdirdiyi yolla gedir, necə ki, ümummilli liderin ideyaları həyata keçirilir, biz bu cür uğurlara adət edəcəyik”.

Məşəl festivalı iştirakçıları arasında çoxdan tanıdığım, bir vaxtlar Naxçıvanın “Araz” futbol komandasının heyətində uğurlara imza atan veteran futbolçu Canpolad Həsənov da var idi. Onun da fikirlərini öyrəndik:

- Əvvəla bir idmançı kimi, futbolçu kimi fəxr etdim ki, öz bayrağımız altında bu yarışlar təşkil olunur. Uzun illər SSRİ vətəndaşı olaraq beynəlxalq yarışlara qırmızı oraq-çəkicli bayraq altında çıxırdıq. Amma indi üçrəngli bayrağımız bir çox mötəbər beynəlxalq təşkilatlarda dalğalandığı kimi, böyük idman yarışlarında da qürurla dalğalanacaq. Müstəqilliyin ən böyük sevinci məhz budur. Mən bu gün bu tədbiri izlədikcə həmin keçmişi düşündüm. Və yaxşı mənada gözlərim doldu. Gənclərimizə isə demək istərdim ki, müstəqlliyimizin nə qədər böyük bir nemət olduğunu heç vaxt unutmasınlar. Hansı sahədə olur-olsun ölkəmizi təmsil edərkən üçrəngli bayraq altında mübarizə apardıqlarından qürur duysunlar.

Məşəl festivalı keçirilən meydan getdikcə seyrəlirdi. Sağdan, soldan keçənlərin bir-birilərinə şərəf, qürur, fəxr dolu ifadələr söylədiklərini eşitmək çətin deyildi. Meydanın bir neçə addımlığında isə xalqımızın ümummilli lideri Heydər Əliyevin əzəmətli heykəli ucalırdı. Odlar yurdunda, od oğullarının vətənində məhz ulu öndərin əsasını qoyduğu müstəqil bir ölkənin növbəti uğurunun məşəli alovlanırdı.

Elxan MƏMMƏDOV,

Azərbaycan.-2015.- 28 aprel.- S.7.