Herbert Salber: Azərbaycanlı girovların azad edilməsi məsələsi yenidən Ermənistanın qarşısında qaldırılacaq

Azərbaycanın xarici işlər naziri Elmar Məmmədyarov Avropa İttifaqının Cənubi Qafqaz üzrə xüsusi nümayəndəsi Herbert Salber ilə görüşüb.

Xarici İşlər Nazirliyinin mətbuat xidmətindən AZƏRTAC-a verilən məlumata görə, görüşdə Ermənistan-Azərbaycan, Dağlıq Qarabağ münaqişəsinin həlli istiqamətində aparılan danışıqlar haqqında müzakirələr aparılıb və mövcud status-kvonun qəbuledilməz olduğu vurğulanıb.

Nazir Elmar Məmmədyarov Ermənistan silahlı qüvvələrinin girov götürdüyü Dilqəm Əsgərov və Şahbaz Quliyevin azad edilməsi məsələsinə toxunaraq, humanitar xarakter daşıyan bu məsələnin beynəlxalq birlik və Avropa İttifaqı tərəfindən Ermənistan qarşısında qaldırılmasının vacibliyini vurğulayıb. O, girovların səhhəti ilə əlaqədar Azərbaycan tərəfinin narahatlığını bildirib.

Herbert Salber azərbaycanlı girovların azad edilməsi məsələsinin yenidən Ermənistan tərəfinin qarşısında qaldırılacağını deyib.

Ermənistanın Azərbaycana qarşı təcavüzü nəticəsində 4000-dən artıq şəxsin itkin düşdüyünü deyən Elmar Məmmədyarov bildirib ki, ATƏT-in Minsk qrupunun həmsədrləri tərəfindən də dəstəkləndiyi kimi, Ermənistan tərəfi humanitar prinsiplərdən çıxış edərək onların taleyi barədə məlumat verməlidir. O əlavə edib ki, itkin düşmüş şəxslərin kimliyi DNK analizlər vasitəsilə müəyyən edilə və nəticə etibarilə, ailələrinə və yaxınlarına onların taleyi barədə məlumat verilə bilər.

Elmar Məmmədyarov Azərbaycan Respublikasının Dağlıq Qarabağ bölgəsinin erməni və azərbaycanlı icmaları arasında dialoqun münaqişənin həllinə xidmət edə biləcək vacib etimad quruculuğu tədbiri olduğunu vurğulayıb.

Herbert Salber birinci Avropa Oyunlarının keçirilməsi münasibətilə Azərbaycanı təbrik edib və bu Oyunların sülhə, sabitliyə, çiçəklənmə və inkişafa xidmət etdiyini bildirib.

Görüşdə qarşılıqlı maraq kəsb edən məsələlər ətrafında müzakirələr aparılıb.

Azərbaycan.-2015.- 30 aprel.- S.4.