Səfir Vladimir Doroxin: Qəbələ VII Beynəlxalq Musiqi Festivalında dünya şöhrətli musiqiçilərin ifasından zövq aldım

Yüksək səviyyədə təşkil edilən Qəbələ VII Beynəlxalq Musiqi Festivalının iki konsertini dinlədim. Festivalda dünya şöhrətli musiqiçilərin ifasından zövq aldım.

Bu sözləri AZƏRTAC-a müsahibəsində Rusiyanın ölkəmizdəki səfiri Vladimir Doroxin deyib.

Dünyanın tanınmış musiqiçilərinin Qəbələdə bir araya gələrək konsertlər verməsini yüksək dəyərləndirən səfir deyib: “Mən isti yay günlərində istirahət üçün Qəbələni seçmişəm. Ona görə ki, gözəl təbiəti, istirahət mərkəzləri, qonaqpərvər insanları olan Qəbələyə gəlməklə mən həm də beynəlxalq musiqi festivalında iştirak etməyi planlaşdırırdım. Yəqin ki, bu günlərdə Qəbələyə gələn turistlərin əksəriyyəti mənim kimi həm də bu musiqi festivalının tamaşaçıları olub”.

Festivalda “Moskva virtuozları” kamera orkestrinin konsertindən böyük zövq aldığını bildirən rusiyalı diplomat qeyd edib ki, Qəbələ Bakıdan uzaqda yerləşsə də, konsertlərə paytaxt və bölgələrdən xeyli sayda tamaşaçının qatılması böyük uğurdur. Bu da heç şübhəsiz ki, festivalın yüksək səviyyədə təşkil edilməsinin və keyfiyyətinin göstəricisidir.

Azərbaycan.- 2015.- 2 avqust.- S. 2.