Gürcüstan mətbuatı “Bakı-2015” ilk Avropa Oyunlarından bəhs edir

Gürcüstanda geniş oxucu kütləsinə malik “Lelo” idman qəzetində “Bakı-2015” birinci Avropa Oyunları ilə bağlı məqalə dərc olunub.

Gürcüstan Milli Olimpiya Komitəsinin (MOK) birinci vitse-prezidenti Elqucia Berişvili ilə müsahibə əsasında hazırlanan məqalədə birinci Avropa Oyunlarının açılış və bağlanış mərasimlərinin möhtəşəmliyi, idmançılara yaradılmış yüksək səviyyəli şərait, Bakının və ümumiyyətlə Azərbaycanın sürətli inkişafı barədə məlumatlar yer alıb.

E.Berişvili müsahibəsində qeyd edir ki, Azərbaycan ilk Avropa Oyunlarını yüksək səviyyədə təşkil etməklə nəyə qadir olduğunu dünyaya sübut etdi. Bütün dünya bildi ki, Azərbaycan təkcə Avropa Oyunlarını deyil, Avropa və dünya miqyaslı daha böyük oyunları təşkil edə bilər. Bu, böyük uğurdur.

“Sportall.ge” informasiya portalında yayılan məqalədə də Avropa Oyunlarının yüksək səviyyədə təşkil olunduğu vurğulanır.

Gürcüstanın birinci televiziya kanalında Avropa Oyunlarında iştirak edən idmançılarla görüş keçirilib. Görüşdə idmançılar, onların məşqçiləri, eləcə də jurnalistlər Oyunların yüksək səviyyədə təşkil olunduğunu qeyd edib, açılış və bağlanış mərasimlərinin möhtəşəmliyini vurğulayıblar. Görüşdə, həmçinin Azərbaycanın sürətli inkişafı, Bakının əsl inkişaf etmiş Avropa şəhəri olduğu xüsusi qeyd olunub.

Xətayi Əzizov

AZƏRTAC-ın xüsusi müxbiri

Tbilisi

Azərbaycan.- 2015.- 4 iyul.- S. 8.