Ankarada keçirilən Beynəlxalq Ramazan Festivalında “Azərbaycan gecəsi” təşkil olunub

Ankaranın Keçiören rayon bələdiyyəsinin təşkil etdiyi 6-cı Beynəlxalq Ramazan Festivalı çərçivəsində “Azərbaycan gecəsi” keçirilib. Bununla əlaqədar həmin bələdiyyənin təşkilatçılığı və Azərbaycanın Türkiyədəki səfirliyinin dəstəyi ilə Ramazan Festivalının keçirildiyi ərazidə ölkəmizə xas olan tarixi, mədəni və incəsənət əsərlərinin nümayiş etdirildiyi Azərbaycan Evinin açılışı olub.

Azərbaycan Evini ziyarət edən çoxsaylı qonaqlara “Heydər Əliyev” və “İlham Əliyev” kitabları, “İrs-Miras” və “Diplo Atlas” jurnalları, o cümlədən ölkəmizlə bağlı digər əyani vəsaitlər hədiyyə edilib.

Açılışda çıxış edən Keçiören bələdiyyəsinin sədri Mustafa Ak, Azərbaycanın Türkiyədəki səfiri Faiq Bağırov, Sumqayıt şəhər bələdiyyəsinin sədri Əbülfəz Babayev, Ədalət və İnkişaf Partiyasından deputat Orxan Atalay bildiriblər ki, bu cür tədbirlər xalqlarımız arasındakı dostluq və qardaşlıq əlaqələrinin daha da möhkəmlənməsinə xidmət edir.

Festival çərçivəsində Azərbaycana həsr edilən gecə maraqlı konsert proqramı ilə davam edib.

Azərbaycandan gələn incəsənət ustalarının ifasında səslənən muğamlar və xalq mahnılarımız tədbir iştirakçıları tərəfindən rəğbətlə qarşılanıb.

Sabir ŞAHTAXTI,

AZƏRTAC-ın xüsusi müxbiri

Ankara

Azərbaycan.- 2015.- 5 iyul.- S. 8.