Azərbaycanın xarici işlər naziri ADA Universitetində yay məktəbinin iştirakçıları üçün mühazirə oxuyub

Xarici işlər naziri Elmar Məmmədyarov ADA Universiteti tərəfindən təşkil olunan enerji məsələləri üzrə 9-cu Bakı yay məktəbinin iştirakçıları üçün Azərbaycanın xarici siyasəti və enerji siyasəti mövzusunda mühazirə ilə çıxış edib.

Xarici İşlər Nazirliyinin mətbuat xidmətindən AZƏRTAC-a bildiriblər ki, nazir ölkəmizin xüsusilə son on il ərzində siyasi, iqtisadi, sosial və digər sahələrdə əldə etdiyi nailiyyətlər, Azərbaycanın xarici siyasətinin prioritet istiqamətləri, ikitərəfli və çoxtərəfli əsasda dünya birliyi ilə əlaqələri, Ermənistanın Azərbaycana qarşı təcavüzü nəticəsində ərazimizin 20 faizinin işğal edilməsi, ATƏT-in Minsk qrupunun həmsədrlərinin vasitəçiliyi ilə aparılan danışıqlar prosesi haqqında məlumat verib. O, Ermənistan silahlı qüvvələrinin işğal etdiyi Azərbaycan ərazilərində mövcudluğunun münaqişənin həlli prosesində başlıca maneə olduğunu deyib. Əlavə edib ki, münaqişənin həllinə nail olmaq üçün ilk növbədə Ermənistan silahlı qüvvələri zəbt etdiyi bütün Azərbaycan ərazilərindən çıxarılmalıdır. BMT Təhlükəsizlik Şurasının məlum qətnamələrinin işğalçı qüvvələrin zəbt etdiyi Azərbaycan ərazilərindən dərhal, tam və qeyd-şərtsiz çıxarılmasını tələb etdiyini diqqətə çatdıran nazir vurğulayıb ki, bu mövqeni ATƏT, İslam Əməkdaşlıq Təşkilatı, Avropa Şurası, Qoşulmama Hərəkatı və digər beynəlxalq təşkilatlar da dəstəkləyir. Bu xüsusda, Avropa İnsan Hüquqları Məhkəməsinin “Çıraqov və digərləri Ermənistana qarşı” işi üzrə qəbul etdiyi qərarda Ermənistanın işğalçı tərəf kimi bir daha tanındığı qeyd edilib.

Elmar Məmmədyarov Azərbaycanın nəqliyyat və enerji strategiyasının inkişafından danışaraq Bakı-Tbilisi-Qars dəmir yolu xəttinin, Trans-Anadolu və Trans-Adriatik qaz boru kəmərlərinin əhəmiyyətini diqqətə çatdırıb. O, həmçinin Azərbaycanın zəngin milli təcrübə əsasında qlobal səviyyədə mədəniyyətlər və dinlər arasında dialoq prosesinə töhfə verdiyini qeyd edib.

Sonra nazir mühazirə iştirakçılarının suallarını cavablandırıb.

Azərbaycan.- 2015.- 17 iyul.- S. 4.