Abzal SAPARBEKULİ: I Avropa Oyunlarında azərbaycanlı idmançıların qalibiyyətini seyr edib qürur duymaq istəyirik

“Bakı-2015” ilk Avropa Oyunları bütün dünyada olduğu kimi, qardaş Qazaxıstanda da diqqət mərkəzindədir. İctimai-siyasi xadimlər və bu ölkədə yaşayan həmvətənlərimiz I Avropa Oyunlarının Bakıda keçirilməsini Azərbaycan xalqının, ölkənin siyasi rəhbərliyinin və bütün türk dünyasının böyük uğuru hesab edirlər. Bakıya gedib I Avropa Oyunlarına baxmaq, azərbaycanlı idmançıların qalibiyyətini seyr etmək, qürur duymaq istəyirik.

AZƏRTAC xəbər verir ki, bu sözləri Türk Dövlətlərinin Əməkdaşlıq Şurası baş katibinin müavini Abzal Saparbekuli deyib.

O bildirib: “Müstəqil türkdilli dövlətlər Sovet İttifaqının dağılması ilə yeni dövlətqurma mərhələsinə daxil oldular. Təbii ki, bu prosesdə çətinliklərimiz də oldu. Amma hazırkı proseslərə baxsaq görərik ki, bütün türkdilli dövlətlər müstəqilliklərini gücləndirib, iqtisadi, sosial və digər sahələrdə inkişaf nümayiş etdirir”.

Bakıda keçiriləcək I Avropa Oyunlarına bu aspektdən yanaşdığını vurğulayan A.Saparbekuli deyib: “Mən bunu Azərbaycan xalqının, ölkənin siyasi liderinin böyük uğuru hesab edirəm. İlk dəfə belə bir tədbirin keçirilməsi təşəbbüsünün ortaya çıxması və bunun qardaş Azərbaycanda reallaşması bütün türkdilli xalqların qürur mənbəyi, Azərbaycan dövlətinin isə çox böyük uğurudur. Oyunların yüksək səviyyədə keçməsini arzulayıram. Hesab edirəm ki, bu tədbir Azərbaycanın idman sahəsində qazandığı nailiyyətləri daha da gücləndirəcək. Bildiyiniz kimi, Qazaxıstan da “EXPO-2017”yə ev sahibliyi edəcək və bu, bizim ortaq uğurumuzdur. Bakıya gedib I Avropa Oyunlarına baxmaq, azərbaycanlı idmançıların qalibiyyətini seyr etmək, qürur duymaq istəyirik. Azərbaycan idmançılarını əvvəlcədən təbrik edir, uğurlar diləyirəm”.

Azərbaycan. - 2015.- 3 iyun.- S.9.