Ziyalı sözü - vətəndaş mövqeyi

I Avropa Oyunları Azərbaycanın tarixinə yeni tarix yazacaq

Fikrət QOCA,

xalq şairi, əməkdar incəsənət xadimi

Ötən hər gün bizi iyunun 12-28-də keçiriləcək I Avropa Oyunlarına yaxınlaşdırır. Bu da bir şansdır ki, biz bu tarixi hadisənin iştirakçılarıyıq. Aprelin 26-da Bakıdan, əsrlərin yadigarı “Atəşgah”dan start götürən Oyunların məşəli bölgələrimizi oba-oba dolaşmaqdadır. Azərbaycan ziyalısı, Azərbaycan şairi kimi mən də ilk Avropa Oyunlarını böyük səbirsizliklə gözləyirəm. Mən də o fikirdəyəm ki, I Avropa Oyunlarının Azərbaycanda keçirilməsi ölkəmizə olan böyük etimadın, inamın göstəricisidir. Sevindirici hal həm də odur ki, Oyunlar təkcə paytaxtda deyil, ölkəmizin hər yerində coşqu ilə, bayram əhval-ruhiyyəsi ilə qarşılanır. İnsanlara, xüsusilə ölkə gənclərinə bu sevinci bəxş edən Prezident İlham Əliyevə yaşlı nəslin nümayəndəsi kimi minnətdarlığımı bildirirəm.

“Bakı-2015” I Avropa Oyunları ilə bağlı Azərbaycana 10 minə yaxın insanın gələcəyi gözlənilir. Artıq Bakıda müxtəlif ölkələrdən, müxtəlif xalqların nümayəndələrini görmək mümkündür. Mənim özümə yaxın və uzaq xarici ölkələrdən yazıçı və şair dostlarımdan zənglər olur. Onlar bu möhtəşəm idman oyunlarına tamaşa etmək, gündən-günə gözəlləşən paytaxtımızı görmək, gəzmək, burada istirahət etmək istəyirlər. Gələn qonaqlar Azərbaycandakı inkişafı öz gözləri ilə görüb, müsbət qiymət verəcəklər. Oyunlar ərəfəsində Azərbaycanın uğurları dünyada geniş təbliğ olunacaq, dövlət kimi nüfuzu, güc və qüdrəti, beynəlxalq etibarı daha da möhkəmlənəcək. Məhz bu baxımdan əldə edilən nailiyyətlər Azərbaycan rəhbərliyinin, Prezident İlham Əliyevin həyata keçirdiyi məqsədyönlü siyasətin, dövlətçiliyimizə verdiyi töhfələrin nəticəsidir. İllərdir, ölkə rəhbərinin bu siyasəti, atdığı addımlar, görülən işlər göz önündədir. Bütün bunlar ölkəmizin Avropada mədəni, demokratik və eyni zamanda, Avropa dəyərlərinə, Avropa tələblərinə cavab verən bir ölkə kimi tanınmasına böyük zəmin yaratmışdır. Şəhərimizdə və regionlarda müasir infrastruktur, xidmət obyektləri tikilib. Elə indinin özündə də böyük işlər görülür, ictimai yerlər gözəlləşdirilir, parklar salınır, binalar bərpa edilir.

Azərbaycan müstəqilliyini bərpa edəndən sonra, xüsusilə son 10-15 ildə çox böyük, misli görünməmiş uğurlara imza atıb. Bu oyunlar Azərbaycanın imicinə, nüfuzuna böyük təsir edir. Azərbaycana olan münasibət müsbət mənada dəyişir. Bəzən kənardan baxanda, kənardan deyiləndə başqa cür səslənir, amma onlar gəlib həm idmanımızla, həm də milli mətbəximizlə, milli mədəniyyətimizlə, tarixi abidələrimizlə, incəsənətimizlə, ədəbiyyatımızla, bir sözlə, ölkəmizin reallıqları və insanlarımızla yaxından tanış olanda düşüncələrində başqa təəssürat yaranacaq. Bu baxımdan I Avropa Oyunlarının ölkəmizdə keçirilməsi Azərbaycanın tarixinə yeni tarix yazacaq.

Azərbaycan yenə də dünyaya sevincli günlər bəxş edəcək

Fidan QASIMOVA,

“Şöhrət” ordenli xalq artisti

Musiqi kimi, idmanın da xalqları birləşdirmək missiyası var. İdman yarışlarında da ünsiyyət qurur, münasibət yaradırlar. Bu baxımdan I Avropa Oyunları daha böyük əhəmiyyət kəsb edir. Bu həm də fürsətdir ki, özümüzü avropalılara olduğumuz kimi təqdim edək. Bu oyunlarla əlaqədar beynəlxalq təşkilatların təmsilçilərinin fikirləri də maraq doğurur. Məsələn, Avropa İttifaqının Azərbaycandakı nümayəndəliyinin rəhbəri Malena Mard iyunun 12-dən 28-dək Bakıda keçiriləcək I Avropa Oyunları ilə bağlı dedi ki, 6 mindən artıq avropalı idmançının qatıldığı bu tədbirin başlanması səbirsizliklə gözlənilir. Məncə, onun məqsədi bunları söyləmək idi: “Bu Oyunlar Azərbaycana özünü təqdim etmək imkanı verəcək”.

Azərbaycan Prezidenti İlham Əliyevin bildirdiyi kimi, biz güclü dövlətik və özümüzü dünyaya təqdim etmək üçün bu, yaranmış bir şansdır: “Güclü siyasi iradə, texniki imkanlarımız vardır, səfərbərlik təmin edilibdir. Yəni, bu Oyunları biz elə keçirəcəyik ki, gələcək Olimpiya Oyunları üçün də nümunə olsun. Azərbaycan özünü dünyaya yenidən müasir, dinamik inkişaf edən, güclü dövlət kimi təqdim edəcəkdir”.

Dövlətimizin müstəqillik tarixinin son illərində əldə etdiyimiz uğurlar, həmçinin vətənimizdə müxtəlif xalqların nümayəndələri ilə tolerantlıq mühitində yaşamağımız dünyaya nümunədir. Biz bunları təqdim edəcəyik.

Avropa dövlətlərindən gələcək qonaqlar xalqımızın milli sərvəti ilə də maraqlanacaqlar. Biz də sənətimizlə əlaqədar xarici ölkələrə qastrol səfərləri edəndə diqqətimizi çəkən ilk növbədə əhalinin yaşayış tərzi, onlara xas xüsusiyyətlər, tarixləri, mədəniyyətləri və folkloru olub.

Vətənini, xalqını, dövlətini sevmək vətəndaşlıq borcu və milli kökə bağlılıqdan irəli gəlir. Xalqımızda çox yüksək səviyyədə olan bu hisslər çoxlarına örnəkdir. Yəqin ki, Azərbaycandan uzaqlarda yaşayan, qəlbi Vətənlə döyünən soydaşlarımız da bu Oyunların başlanmasını səbirsizliklə gözləyir.

I Avropa Oyunları əsl idman festivalı olacaq. Eyni zamanda mədəniyyət tədbiridir. Azərbaycan yenə də dünyaya sevincli günlər bəxş edəcək. Bu dəfə daha çox.

Avropa Oyunları deyiləndə ilk olaraq Azərbaycan xatırlanacaq

Məryəm ƏLİZADƏ,

teatrşünas, sənətşünaslıq doktoru, professor

Dünya idman tarixində ilk dəfə olaraq Azərbaycanda keçiriləcək I Avropa Oyunlarının başlanmasına az qalıb. Aprelin 26-da Bakıdan, əsrlərin yadigarı “Atəşgah”dan start götürən məşəl bölgələrimizi oba-oba dolaşaraq Bakıya qayıdacaq. Bu idman bayramının yerlərdə necə sevinclə qarşılandığının şahidi olduq. Artıq yarışla bağlı işlər tamamlanmaq üzrədir. Bu möhtəşəm tədbir vasitəsi ilə respublikamızın ictimai-siyasi və sosial-iqtisadi gerçəkliklərinin dünya ictimaiyyətinə çatdırılması mühüm əhəmiyyət kəsb edir.

Bu Oyunlar Avropa və dünya məkanında respublikamızın nüfuzunun göstəricisi kimi xarakterizə olunacaq. Marafon ölkəmizə böyük siyasi dividendlər qazandıracaq. Respublikamızın qədim tarixə, zəngin mədəniyyətə, yüksək tolerantlıq mühiti və qonaqpərvərliyə malik olmasını dünyaya nümayiş etdirəcək. Ermənistan-Azərbaycan, Dağlıq Qarabağ münaqişəsi, Xocalı soyqırımı, 20 Yanvar hadisəsi və Azərbaycanın üzləşdiyi haqsızlıqlara dair gerçəklikləri beynəlxalq arenaya daşıyacaq.

Bakı ilə yanaşı, ölkəmizin digər iri şəhərlərinin, bölgələrinin abadlığının dünyaya tanıdılması Azərbaycana turizm axınını gücləndirəcək. Təəssüf ki, ölkəmizin inkişafını gözü götürməyənlər, bədniyyətlər Azərbaycanı nüfuzdan salıb, beynəlxalq imicinə zərbə vurmağa çalışırlar. Lakin istəklərinə nail ola bilmirlər və ola da bilməyəcəklər. Çünki atalar demiş, yalan ayaq tutar, amma yeriməz! Respublikamızın bütün sahələrdə çiçəklənməsi göz qabağındadır.

Bu mötəbər yarış həqiqətən də tarixi hadisədir. Qərinələr keçsə də, I Avropa Oyunları deyiləndə ilk olaraq Azərbaycan xatırlanacaq, yada düşəcək. Bu, böyük uğurdur. Kimsə bunu adi bir tədbir kimi dəyərləndirə bilər, amma illər keçdikcə, biz onun əhəmiyyətini daha dərindən dərk edəcəyik.

Azərbaycanın iri beynəlxalq tədbirlərin keçirilməsi sahəsində zəngin təcrübəsi var. Oyunlar zamanı ölkəmizə xarici idmançılarla yanaşı, çoxlu turist də gələcək. Azərbaycanın inkişafını, yol infrastrukturunu, idman qurğularını və turizm guşələrini gözləri ilə görəcəklər. Dincəlmək üçün müxtəlif məkanlara üz tutacaqlar. Ölkənin təbliğində tarixi-mədəni irsi özündə əks etdirən suvenirlərin də əhəmiyyəti böyükdür. Bakının qədim tarixini özündə yaşadan İçərişəhər bu günlər həm də xatirə əşyaları satılan mağazaların çoxluğu ilə diqqət çəkir. Suvenirlər arasında Qız qalasının kiçik maketləri, muğam üçlüyünün kuklaları və müxtəlif personajlar, üzərində Bakının və İçərişəhərdəki tarixi binaların təsviri çəkilmiş boşqablar, brelok, milli kəlağayılar, şərflər və s. üstünlük təşkil edir.

Pespublikamızın mədəniyyət ocaqları da bu möhtəşəm tədbirə böyük həvəslə hazırlaşıblar. Paytaxtın teatrlarında qonaqlar üçün maraqlı repertuarlar tərtib edilib. Azərbaycan Dövlət Akademik Opera və Balet Teatrının repertuarındakı ən məşhur nümunələr ingilis dilinə tərcümədə təqdim olunacaq. Bundan başqa, proqram və afişalar Azərbaycan, rus və ingilis dillərində olacaq. Qonaqlar repertuarımızın şah əsəri olan “Leyli və Məcnun, “Trubadur”, “Traviata” operalarını, “Yeddi gözəl”, “Min bir gecə” kimi məşhur balet nümunələrimizi izləyə biləcəklər. Qonaqlara xoş anlar yaşatmaq üçün iyun ayının ikinci ongünlüyünün sonunda Fərəc Qarayevin “Qobustan kölgələri” baleti Qobustanda açıq səma altında nümayiş etdiriləcək.

Avropa Oyunları müddətində Akademik Milli Dram Teatrı tamaşaçı rəğbəti qazanan səhnə əsərləri ilə gündəmə gələcək. Bundan başqa Azərbaycan Dövlət Musiqili Teatrı, Azərbaycan Dövlət Rus Dram Teatrı, Gənc Tamaşaçılar Teatrı və Azərbaycan Dövlət Kukla Teatrı klassik və müasir əsərlər əsasında hazırlanmış tamaşalarla qonaqların və tamaşaçıların xidmətində olacaq.

Ümidvarıq ki, idmançılarımız da bu Oyunlarda əzmkarlıq göstərəcək, onlara göstərilən etimadı doğruldacaq və Azərbaycan bayrağını uca zirvələrə qaldıracaqlar.

Avropa Oyunlarının məşəli nəinki ölkəmizi, dünyanı nura qərq edir

Mələkxanım ƏYYUBOVA,

xalq artisti

Azərbaycanı əbəs yerə Odlar yurdu adlandırmayıblar! Bu istilik xalqımızın xarakterinə də hopub. Bizi istiqanlı xalq kimi tanıyıb bəşəriyyət. Dilimiz, mədəniyyətimiz, mətbəximiz zəngin, tariximiz qədim və uludur. Bundan ancaq qürur duymaq olar.

Zəngin mədəniyyətə malik xalqımızın tarixi həm də keşməkeşli olub. Zaman-zaman yadellilər bu cənnət məkanın təbii sərvətlərinə diş qıcayıb, torpaqlarını zəbt etmək üçün illərlə çirkin siyasət yürüdüblər. Qarış-qarış azalsa da, bərəkəti tükənməyən torpağımızın qədrini bilib uğrunda canımızdan keçmişik - şəhid olmuşuq. Təki, “Vətən yaşasın” - demişik. Vətənimizi və xalqımızı dünyaya təqdim etmək üçün Tanrı bizə dahilər bəxş edib - sərkərdələr və başçılar - lider, öndər olaraq.

Ümummilli lider Heydər Əliyev dünən, Prezident İlham Əliyev isə bu gün məhz xalqımızın yetişdirdiyi liderlər kimi tarixə imza atdılar. Son illər Azərbaycan dövlətinin Avropaya və dünyaya inteqrasiyası da məhz Prezidentimizin məqsədyönlü siyasətinin nəticəsidir. Bu gün Avropa Azərbaycanı inkişaf etmiş dövlət kimi tanıyır və beynəlxalq miqyaslı tədbirlərin burada keçirilməsini məqbul sayır. Neçə dövlətin arasından Azərbaycanın seçilməsi hamımız üçün şərəfdir. “Bakı-2015” I Avropa Oyunlarının ölkəmizi bürüyən şənlik növrağı neçə vaxtdır dünyaya səs salıb. Avropa Oyunlarının məşəli nəinki ölkəmizi, dünyanı nura qərq edir. Dostlarımız bundan qürur duyur, düşmənlərimiz məyus olur. Qısa zamanda belə inkişaf və təntənəyə layiq olduğumuzu sübut etmək fürsəti əldə etmişik.

I Avropa Oyunları Təşkilat Komitəsinin ilk iclasında Azərbaycan Prezidenti İlham Əliyev bu Oyunların Bakıda keçirilməsinin əhali tərəfindən çox yüksək səviyyədə dəstəkləndiyini bildirmişdir: “Biz bu dəstəyi əvvəlki dövrdə də hiss etmişik. Çünki, bildiyiniz kimi, Azərbaycan iki dəfə öz namizədliyini Yay Olimpiya Oyunlarının keçirilməsi üçün vermişdir. O zaman rəy sorğuları keçirilmiş və müəyyən edilmişdir ki, Azərbaycan əhalisi Olimpiya Oyunlarının Bakıda keçirilməsini arzulayır, dəstəkləyir və bu amil də çox mühüm rol oynayır”.

Mən də bir sənətçi kimi bu Oyunları yalnız idmanın deyil, həm də mədəniyyətimizin və tariximizin bayramı kimi qəbul edirəm. Uğurla start götürmüş ilk Avropa Oyunları Azərbaycan tarixinə qızıl hərflərlə yazılacaq.

Elçin CƏFƏROV,

Elgün MƏNSİMOV,

Rəşad BAXŞƏLİYEV,

Məhəmməd NƏRİMANOĞLU,

Azərbaycan. - 2015.- 4 iyun.- S.7.