“Nikolya” Şokolad Muzeyi Avropa Oyunları münasibətilə məxsusi eksponat hazırlayıb

Xəbər verdiyimiz kimi, məşhur “Nikolya” Şokolad Muzeyinin dünya turu çərçivəsində mayın 15-də Bakıda, Muzey Mərkəzində sərgisi açılıb.

Ekspozisiyada 200 kvadratmetr sahədə ümumi çəkisi 700 kiloqramdan çox olan 250-dən artıq yüksək keyfiyyətli şokolad məmulatı, şokolad və marsipan heykəllər, şokolad bagetlərlə çərçivəyə alınmış rəsmlər, miniatürlər və kompozisiyalar nümayiş etdirilir. Burada, həmçinin şokoladın tarixi ilə tanış olmaq və çoxlu maraqlı faktlar öyrənmək olar.

Məşhur şokolad ustası Nikolay Popov məxsusi olaraq Bakı sərgisi üçün şokoladdan Azərbaycana həsr edilmiş silsilə incəsənət əsərləri hazırlayıb. Çəkisi 70 kiloqramdan çox olan “Qız qalası” şokolad miniatürü sənətkarın ən ağır heykəlidir. Qeyri-adi ekspozisiyaya şəhərin məşhur binalarının – Hökumət Evinin, Muzey Mərkəzinin, Azərbaycan Dövlət Opera və Balet Teatrının, “Flame Towers” alov qüllələrinin şokolad təsvirləri, habelə marsipan meyvələr, güllər, şokolad manqal və bir çox başqa məmulat daxildir.

İyunun 5-də çəkisi 200 kiloqramdan çox olan, dünyada ən böyük şokolad rəsminin təqdimatı keçirilib. Şəkil “Bakı-2015” birinci Avropa Oyunlarına həsr olunub.

Şokolad və marsipandan olan 3D pannoda Azərbaycanın dövlət bayrağı və xəritəsi, milli simvolları – nar, səkkizguşəli ulduz, alov və Avropa Oyunlarının simvolu təsvir olunub.

Sərgini mədəniyyət və turizm naziri Əbülfəs Qarayev açıb.

Bakıda birinci Avropa Oyunlarının Əməliyyat Komitəsinin əməliyyatlar üzrə baş direktoru Saymon Kleq çıxış edərək deyib: “Bu gün biz qeyri-adi sərgi açırıq. Bu sərgi bizim üçün gözəl sürprizə çevrilib. Qarşıdakı üç həftədə bütün dünyanın diqqəti Azərbaycana cəlb olunacaq. Avropa Oyunlarına təqribən 800 milyon tamaşaçı baxacaq”.

Şokolad pannonun müəllifi Nikolay Popov bildirib ki, Bakıya birinci dəfə bir ay əvvəl gəlib. Şəhərin gözəlliyi, mədəniyyəti və qonaqpərvərliyi ilə onu heyran qoyub.

N.Popov deyib: “Mən məxsusi bir şey yaratmaq istədim. Burada insanların muzeylərə həvəslə getməsi məni yaxşı mənada təəccübləndirdi. Şadam ki, Bakıda yaratdığım əsəri sizə təqdim edirəm”.

Sərginin açılışında Bakıda akkreditə olunmuş diplomatlar, xüsusi dəvət edilmiş qonaqlar iştirak ediblər.

AZƏRTAC

Azərbaycan.- 2015.- 6 iyun.- S. 3.