Məşəlimiz Şuşaya da nur saçacaq

Azərbaycan! Adımız, ünvanımız, fəxrimiz ana Vətən! Sabahlara açılan pəncərəndən daim nurlu şəfəq süzülsün! Bugünkü növrağına baxan, görən, duyan övladların necə də xoşbəxtdir! Axı, dünyanın gözləri sənə dikilib: kimisi bu təmtərağından qürur duyur, kim isə paxıllıqdan qara yaxmağa cəhd edir. Sənin haqqında düşünürlərsə, demək, varsan! Var ol, yaşa, Azərbaycan! Heç zaman Vətənimdən gözəl diyar görmədim. Yanan çıraqların nur, ocaqların istilik paylayır cahana!

Zəngin mədəniyyətə malik xalqımızın tarixi həm də keşməkeşli olub. Zaman-zaman yadellilər bu cənnət məkanın təbii sərvətlərinə diş qıcayıb, torpaqlarını zəbt etmək üçün illərlə çirkin siyasət yürüdüblər. Qarış-qarış azalsa da, bərəkəti tükənməyən torpağımızın qədrini bilib uğrunda canından keçərək - şəhid olub övladları. Təki, “Vətən yaşasın” - deyilib. Vətənimizi və xalqımızı dünyaya təqdim etmək üçün Tanrı bizə dahilər, sərkərdələr, lider və öndər bəxş edib.

Ümummilli lider Heydər Əliyev, onun siyasi kursunun layiqli davamçısı Prezident İlham Əliyev xalqımızın yetirdiyi liderlər kimi tarixə imza atdılar. Son illər Azərbaycanın Avropa və dünyaya inteqrasiyası da məhz Azərbaycan Prezidentinin məqsədyönlü siyasətinin nəticəsidir. Bu gün Avropa Azərbaycanı inkişaf etmiş dövlət olaraq tanıyır və beynəlxalq miqyaslı tədbirlərin ölkəmizdə keçirilməsini məqbul sayır. İlk Avropa Oyunlarının Azərbaycanda keçirilməsi də dövlətimizin hərtərəfli inkişafı, nüfuzu, bütün istiqamətlərdə nəinki Avropaya, dünyaya inteqrasiyasının təsdiqidir. Bu, əlbəttə, inkişafın Azərbaycan modelidir.

Planlı sosialist sistemi dağıldıqdan sonra demokratik cəmiyyət quruculuğuna keçən ölkəmiz müstəqilliyini digər müttəfiqlərindən fərqli olaraq əldə etdi. Qanı, canı bahasına imperiya buxovlarından qurtulmağı bacaran xalqımız həmin dövrlərdə ağır günlər yaşasa da, milli-mənəvi varlığını qoruyub saxladı! Bunun üçün xalqımız ümummilli lider Heydər Əliyevin qətiyyətinə, siyasi təfəkkürünə, dünyagörüşünə, millətsevərliyinə güvəndi, ulu öndəri harayladı. Bu, həm də o zamanlar idi ki, Ermənistan Dağlıq Qarabağı Azərbaycandan qoparmaq, ərazilərini işğala məruz qoymaq üçün hər tərəfdən hücuma keçmiş, Xocalını yer üzündən silmiş, Şuşanı odlara qalamış, Laçını “koridor”a çevirmiş, Kəlbəcəri mühasirəyə alıb, kəlbəcərliləri yerindən-yurdundan didərgin salaraq, qarlı-qanlı Murovdağ aşırımında gülləbarana tutmuşdu...

O illərin ağrı-acılarını unutmaq mümkün olmasa da, düşmən tərəfindən Vətənimizin və vətəndaşlarımızın sinəsinə vurulmuş yaraların sağalması üçün xalqa milli, dövlətə siyasi lider gərək idi.

Bu isə ulu öndər, ümummilli liderlik missiyasını şərəflə daşıyan Heydər Əliyev idi! Xalq ona görə Kəlbəcərin işğalı günlərində səsini qaldıraraq “Bizi bu bəladan ancaq Heydər Əliyev xilas edə bilər! Bizə Heydər Əliyev lazımdır” -deyirdi.

Zamanın fırlanan, daim irəliyə aparan çarxını saxlamaq, vaxtı ləngitmək mümkün deyil. O ağır illərdən bizi çox da uzun tarixi bir məsafə ayırmır. Lakin bu qısa müddət ərzində keçilən siyasi, iqtisadi, sosial, mədəni yol bizi inkişafın yüksək pilləsinə qaldırıb. Bunu nəinki inteqrasiya etdiyimiz Avropa, həm də dünya dövlətlərinin liderləri, ictimaiyyəti birmənalı şəkildə bildirirlər.

İnkişafımızın yeni mərhələsi dünyanın siyasi və ictimai xadimləri ilə ön sıralarda dayanan Azərbaycan Prezidenti İlham Əliyevin adı ilə bağlıdır.

Son illər ölkəmizdə keçirilən beynəlxalq tədbirlərin sırasına daha biri əlavə edilir ki, o da nəinki adını daşıdığı qitənin, hətta dünyanın marağındadır. Bu, ilk dəfə keçiriləcək “Bakı-2015” I Avropa Oyunlarıdır. İdman yalnız sağlamlıq deyil, o, həm də mədəniyyət və incəsənət hadisəsidir. Burada fiziki və mənəvi güc özünü bütövləşdirir. Demək, ölkəmizdə keçiriləcək ilk Avropa Oyunları həm də kimliyimizin təsdiqi üçün yaradılmış meydan, auditoriya və tribunadır. Mədəniyyət və incəsənətimizin idmanla sintezinin nümayişi üçün münbit şərait yaradılıb. Müqəddəs məşəlimizin ölkəmizi başdan-başa dolaşması xalqımızın fərəhini qat-qat artırır! Axı, bu həm də müasir Azərbaycanın siyasi, iqtisadi, sosial və mədəni inkişafının göstəricisi deməkdir.

“Bakı-2015” I Avropa Oyunlarının ölkəmizi bürüyən şənlik növrağı dünyaya səs salıb. Avropa Oyunlarının məşəli nəinki ölkəmizi, dünyanı nura qərq edir. Həm də qısa zaman içərisində belə inkişaf və təntənəyə layiq olduğumuzu sübut etmək fürsəti əldə etmişik.

Onu da unutmuruq ki, ölkəmizin təbii sərvətlərlə zəngin ərazisinin 20 faizi Ermənistanın təcavüzkar siyasəti nəticəsində 20 ildən artıqdır ki, işğala məruz qalıb. Dünya birliyi hələ də bu işğal faktına göz yumur, yaxud təcavüzkarın cilovlanmasında gecikir, ikili standartlar nümayiş etdirməkdədir. Azərbaycanın haqlı mövqeyini sözdə dəstəkləyən avropalılar işğalçı dövlətə birmənalı şəkildə təsir etmir ki, bu da münaqişənin həllinin uzanmasına səbəb olur. Bununla belə Azərbaycan yalnız yerləşdiyi regionun deyil, qitənin söz sahibinə, tədbirlərin ev sahibinə çevrilib. Bu inkişafın onun əsas problemi olan Dağlıq Qarabağ münaqişəsinin həllinə də əlac edəcəyi inamı bu gün güclənib. Yurd-yuvası erməni vandalları, terrorçu və təcavüzkarlar tərəfindən yağmalanan, tar-mar edilən məcburi köçkünlər də bu məşəlin işığında xoş əhval-ruhiyyədə görünürlər. Budur, onların bəzilərinin od-alovlu yurd yerlərinə dönəcəkləri ümid və inamlarına söykənən fikirləri.

Aqil Məmmədov Xocalının Kosalar kənd həkim ambulatoriyasının baş həkimidir. İlk Avropa Oyunlarının xalqımızın, o cümlədən xocalılıların taleyində yaddaqalan iz buraxacağına əmindir. İnanır ki, “Atəşgah”dan götürülən idman məşəli, vaxt gələcək ki, Xocalıda da alovlanacaq və bütün ağrı-acılara son qoyulacaq, yurd nisgilini əridəcək.

Ölkəmizin belə mötəbər beynəlxalq tədbirlərə ev sahibliyinin tarixi əhəmiyyətinin böyük olduğunu deyən Mirvari Verdiyeva Azərbaycan Dövlət Pedaqoji Universitetinin müəllimidir. Kəlbəcərin əsrarəngiz gözəlliyində dünyaya göz açandan ana yurdun təbiətinə vurğun olub. O yerlərin fauna və florasına heyranlığını elmi və ədəbi-bədii yaradıcılığında təsdiqləyir. Kəlbəcərin müdafiəsində olarkən düşmən silahından yaralanaraq II qrup əlilə çevrilmiş yurd nisgilli müəllim də ilk Avropa Oyunlarının coşqu ilə başlayıb, uğurla sona çatacağına əmindir: “İdman yalnız sağlamlıq deyil, həm də mədəniyyət və incəsənətdir. Düşmənlərimiz bu növrağımıza qara yaxmağa cəhd edirlər, amma bacarmazlar. Biz inkişafımızla bir çox ölkələrə nümunəyik. Tariximiz qədim, mədəniyyətimiz isə mənəviyyatımız kimi zəngindir. Axı, bu həm də müasir Azərbaycanın siyasi, iqtisadi, sosial və mədəni inkişafının göstəricisi, xalqımızın milli- mənəvi dəyərlərinə sahib çıxması deməkdir”.

Şərqlə Qərb mədəniyyətlərinin bir araya gətirildiyi Azərbaycanın humanitar sahədəki təcrübəsi dünya xalqlarının marağına səbəb olub. Mədəni dəyərlərin öyrənilməsinə və onlardan istifadə edilməsinə son illər daha çox diqqət ayrılmasının da səbəbləri az deyil. Deyirlər ki, mədəniyyətin dili daha çox anlaşıqlıdır. Buna görə də mədəni əlaqələrin daha da genişlənməsi xalqlar arasında ünsiyyəti vacib faktor kimi ortaya çıxarıb. Azərbaycan daha bir ilkə imza atır. Bu, dünyanın nəzər-diqqətini özünə cəlb edən ilk Avropa Oyunlarıdır. I Avropa Oyunları xalqımızın sülhpərvər, tolerant, qədim mədəniyyətə və zəngin mənəviyyata malik olduğunu da təsdiqləyəcək möhtəşəm idman layihəsidir.

Bugünkü idman məşəlimizin müqəddəsliyi bir də ondadır ki, o, sabah Qarabağın işğal altında qalan yurdlarında da alovlanacaq. İdman məşəlinin açdığı həmin yol dövlət başçısı, Ali Baş Komandanla birlikdə bizi zəfər bayrağı altında bu gün gedə bilmədiyimiz oba-oymaqlara da qovuşduracaq.

Azərbaycanı əbəs yerə Odlar yurdu adlandırmayıblar! Bizi istiqanlı xalq kimi tanıyıb bəşəriyyət. Azərbaycan ana kimi bizi isti qucağında böyüdüb, dünyaya təqdim edib. Dilimiz, mədəniyyətimiz, mətbəximiz zəngin, tariximiz qədim və uludur. Bundan ancaq qürur duymaq olar.

Məhəmməd NƏRİMANOĞLU,

Azərbaycan.- 2015.- 6 iyun.- S. 6.