Alov coşqu və dağ vüqarı ilə qarşılandı

I Avropa Oyunlarının məşəli artıq iki aya yaxındır ki, bütün rayonlara görünməmiş sevinc və qürur hissi bəxş edir. Bu məşəl estafeti hamımızın yaddaşında bənzərsiz el şənliyi, nadir xalq bayramı kimi qalacaq. Miladi tarixdən əsrlər öncə qədim Yunanıstanda belə məşəllər həm də insanları sülhə, əmin-amanlığa çağırmaq üçün yandırılardı.

Bu gün isə bütün bölgələrimizdə ilk Avropa Oyunlarının ulduz-ulduz sayrışan şölələri Azərbaycanın dünyaya sülhə, əmin-amanlığa sadiq ölkə olduğunu car çəkir. Azğın düşmənə cavab verə bilsək də, qəzəbimizi, kinimizi cilovlayaraq atəşkəsə əməl edirik. Gücümüzü dövlətin dinamik inkişafına yönəldirik ki, düşmənə inkişafımızla qalib gələk.

Məşəl səyahətini ölkənin şimal bölgəsində izləyərkən bütün regionun fərəh içində olduğunu gördük, böyükdən tutmuş kiçiyə kimi hər bir vətəndaşın yaşadığı sonsuz qürur hissinin şahidi olduq. Öz dinamik inkişafı ilə Qafqazda liderə çevrilən, iqtisadiyyatın bir çox sahələri üzrə birincilik qazanan ölkəmizin sahiblik etdiyi I Avropa Oyunları Azərbaycanın beynəlxalq nüfuzunu artırır, dünya ictimaiyyətinin daha yaxından tanınmasına sonsuz imkanlar verir.

Siyəzəndə görüşdüyümüz müxtəlif insanlar və peşə sahibləri bizə məşəlin rayona gəlişini bayram hesab etdiklərini dedilər. Hər bir rayon sakini yaşadığı binanın ətrafında, küçədə səliqə-sahman yaradıb. Kimsə bu hadisəyə biganə qalmayıb, çəkilib kənarda dayanmayıb. Ümumiyyətlə, Siyəzəndə yerli hakimiyyət orqanları, digər təşkilatlar məşəli qarşılamağa günlərlə hazırlaşıblar.

Rayon mərkəzində gəzişərkən bayram əhval-ruhiyyəsinə bələnən şəhərdə bir çox yeniliklərin şahidi olduq. Gördük ki, son bir neçə ildə rayonda ciddi dəyişikliklər baş verib. Görülən abadlıq-quruculuq işləri buraların simasına müasirlik, yenilik gətirib. Böyük Qafqaz dağlarının cənub-şərq ətəklərində yerləşən Siyəzən respublikamızda həyata keçirilən iqtisadi siyasət nəticəsində müasir rayonlardan birinə çevrilib. Əvvəllər boz, quru və cansıxıcı mənzərələri ilə seçilən bu yerlərdə son illər salınan yaşıllıqlar qənirsiz gözəlliklər yaradıb. Rayon mərkəzindən dənizə və dağlara tərəf fidanlar baş alıb gedir. Ekoloji tarazlığın qorunması, istifadəsiz torpaqların əkinə qaytarılması, suvarma sistemlərinin müasirləşdirilməsi rayonda kənd təsərrüfatının inkişafına da təkan verib. Yeni müəssisələr isə yüzlərlə sakini, xüsusən gəncləri iş yeri ilə təmin edib.

Adətən yay vaxtı günorta saatlarında şəhərdə küçəyə çıxanların sayı az olur. Qaynar günəş hamını kölgəyə, sərinə çəkilməyə məcbur edir. Bu gün isə əksinə idi. Məşəlin gəlişi yaxınlaşdıqca küçələrdə canlanma artırdı. Məşəlçilərin keçəcəyi küçə və yollara çıxan uşaqların, gənclərin və yaşlı adamların sayı-hesabı bilinmirdi. Rəngbərəng bayraqlar, hava şarları, tədbir iştirakçılarının üzündəki sevinc hissi, deyib-gülənlərin səs-küyü xoş bir bayram ovqatı yaradırdı. Biz də dəniz kimi dalğalanmağa başlayan izdihama qarışaraq tədbir iştirakçıları ilə söhbət etməyə qərar verdik.

Rayon sakini Ramilə Seyidova:

- Ölkəmizin dinamik inkişafının, son illər qazandığı uğurların fonunda düşünürəm ki, I Avropa Oyunlarının Azərbaycanda keçirilməsi təbiidir. Buna mənəvi haqqımız çatır. Dövlətimizin az bir zamanda Oyunlara hazırlığı başa vurması qürur doğurur. Mənə elə gəlir ki, Azərbaycana təşrif buyuran hər bir idmançı, turist ölkəmizdən böyük təəssüratlarla ayrılacaq. Mən ölkəmizin və dünyanın ən güclü idmançılarına uğurlar arzulayıram.

Qələmşah Babayev də bizimlə söhbətə qoşuldu:

- Siyəzən Xəzərlə Qafqazın arasında yerləşir. Dənizlə dağların təbiəti xarakterimizə hopub. Bu bayram günündə də içimizdə bir dəniz çılğınlığı, dağ vüqarı var. Bu gün həyatımın ən unudulmaz hadisəsi kimi yaddaşıma həkk olunacaq. Hamımızın sevinci sonsuzdur. Dünən qonşularla oturub qarşıdakı yarışlardan danışmışıq, hər medalımıza qurban demişik. Bütün yarışları izləyəcəyik. Ümid edirəm ki, idmançılarımızın aldığı medalların sayı ölkəmizin nüfuzuna uyğun olacaq.

Bir qədər sonra alqış sədaları ətrafı bürüdü. Şabran rayonundan Siyəzənə gətirilən məşəli Heydər Əliyev prospektinin əvvəlində qurulan rəmzi qapıda cüdo üzrə respublika çempionu Bəsti Səfərova qəbul edərək alqış sədaları altında estafetə başladı. Estafeti cüdo üzrə Avropa ikincisi Yavuz Əliyev davam etdirdi. Sonra növbə ilə məşəlçilər getdikcə artan alqış sədaları altında Seyfəddin Dağlı, İsmət Qayıbov küçələrini ötüb keçdilər. Daha böyük izdihamın, daha gur alqışların müşayiəti altında Bayraq meydanına yaxınlaşan məşəlçi boks üzrə Azərbaycan çempionu Ruslan Qasımov burada quraşdırılan səhnəyə qalxdı. Bir qədər sonra I Avropa Oyunlarının məşəli alovlandırıldı. Hamı maraq və sevinclə bu nadir səhnələri izləyirdi. Daha sonra od qorunması üçün cüdo üzrə respublika ikincisi Saleh Babayevə təhvil verildi və Heydər Əliyev Mərkəzinə yola salındı. Məşəlçi A.Allahverdiyev səhnədən müraciət edərək siyəzənliləri və bütün Azərbaycan xalqını təbrik etdi. O bu qənirsiz dəqiqələrin hər biri siyəzənlinin xatirəsində silinməz iz buraxdığını dedi.

Xatirələrə rövnəq verən məşəl bayramı Siyəzənin mədəniyyət işçilərinin konserti ilə davam etdi. Vətənə, torpağa həsr edilən mahnıların sədaları siyəzənlilərin ürəyini riqqətə gətirdi. Beləcə, məşəlin Siyəzən estafeti sona çatdı.

Bahadur İMANQULİYEV,

Akif ƏLİYEV,

Azərbaycan.- 2015.- 6 iyun.- S. 6.