“Azərbaycan jurnalistikasının tarixi” kitabının təqdimatı olub

İyunun 9-da Beynəlxalq Mətbuat Mərkəzində Azərbaycan Respublikası Milli Məclisinin mətbuat xidmətinin rəhbəri Akif Təvəkküloğlunun və tanınmış jurnalist, pedaqogika üzrə fəlsəfə doktoru Qafar Əsgərzadənin birgə müəllifi olduğu rus dilində “Azərbaycan jurnalistikasının tarixi” kitabının təqdimatı keçirilib.

Azərbaycan Mətbuat Şurasının təşəbbüsü ilə keçirilmiş tədbirdə qurumun sədri Əflatun Amaşov nəşrin Azərbaycan jurnalistikasının tarixi ilə bağlı sistematik nümunə olduğunu deyib. Kitabın xarakterik xüsusiyyətlərindən bəhs edən Ə.Amaşov onun dərs vəsaiti kimi də əhəmiyyət daşıdığını vurğulayıb. O, həmçinin qeyd edib ki, kitab jurnalistika ilə bağlı reallıqlarımızın rus dilində paylaşılması nöqteyi-nəzərdən də əhəmiyyətlidir.

Respublika Təhsil Şurasının sədri Əjdər Ağayev jurnalistikanın ictimai fikir tariximizdəki önəmini vurğulayıb. Bu baxımdan onun tarixinin öyrənilməsinin eyni zamanda Azərbaycanın tarixinin tədqiqinə də mühüm töhfə olduğunu bildirib.

Bakı Dövlət Universitetinin (BDU) jurnalistika fakültəsinin professoru Cahangir Məmmədli çıxışında diqqəti zaman-zaman Azərbaycan jurnalistikası tarixinin tədrisində problemlərin yaşandığına çəkib. Bildirib ki, xüsusən də rus bölməsində təhsil alanlar çətinlik çəkiblər. Məsələyə mövcud kontekstdən yanaşan C.Məmmədli kitabın məhz rus dilində ərsəyə gəlməsinin əhəmiyyətini əsaslandırıb.

Mətbuat Şurası İdarə Heyətinin üzvü, “İki sahil” qəzetinin baş redaktoru Vüqar Rəhimzadə Azərbaycan jurnalistikasının keçmişini və müasir inkişaf xüsusiyyətlərini özündə birləşdirən kitabların yazılmasının vacibliyindən söz açıb. O bildirib ki, belə nəşrlərin dünyaya çıxış baxımından təkcə rus dilində deyil, ingilis dilində də nəşri mütləqdir.

Mətbuat Şurası İdarə Heyətinin üzvü, BDU-nun professoru Nəsir Əhmədli, universitetin jurnalistika fakültəsinin professoru Alxan Bayramoğlu, Bakı Slavyan Universitetinin kafedra müdiri Etibar Babayev, bu ali təhsil ocağının dosenti Şəlalə Həsənova, “Qarabağ” qəzetinin baş redaktoru Çingiz İsmayılov və başqaları təqdimatı keçirilən nəşrin əhəmiyyətindən danışaraq, hazırda 1000 tirajla işıq üzü görmüş kitabın sayının çoxaldılmasının vacibliyini qeyd ediblər.

AZƏRTAC

Azərbaycan.- 2015.- 10 iyun.- S. 12.