“Bakı-2015”-də Azərbaycan milli komandasının bayraqdarı cüdo üzrə Avropa çempionu Elmar Qasımov olacaq

“Bakı-2015” birinci Avropa Oyunlarında Azərbaycan milli komandasının bayraqdarının adı rəsmi olaraq açıqlanıb.

AZƏRTAC xəbər verir ki, Azərbaycan Milli Olimpiya Komitəsi rəhbərliyinin yekun qərarı ilə cüdo üzrə Avropa çempionu, dünya çempionatının gümüş mükafatçısı Elmar Qasımov milli komandamızın bayraqdarı seçilib. O, iyunun 12-də Bakı Olimpiya Stadionunda keçiriləcək açılış mərasimində Azərbaycan milli komandasının bayrağını daşıyacaq.

Elmar Qasımov 2009-cu ildə Ermənistanda keçirilən gənclər arasında Avropa çempionatından Vətənimizə qızıl medalla qayıdıb. Cüdoçu ötən il Tümendə təşkil olunan “Böyük dəbilqə” turnirində qızıl medal qazanıb. O, cari ildə Mərakeşdə usta idmançılar arasında keçirilən, eləcə də Samsunda və Tbilisidə təşkil edilən Qran-pri yarışlarının qalibi olub. İyirmi dörd yaşlı idmançı bu ilin mayında Bakıda keçirilən “Böyük dəbilqə” turnirində ikinci yeri tutub.

Azərbaycan.- 2015.- 12 iyun.- S. 3.