Dağlar gözəli Qax

Avtomobil magistralından Qax yoluna burulanda mənzərə tamam dəyişir. Dəmiryol xəttini keçəndən sonra isə elə bil başqa bir aləmə daxil olursan - baş-başa verən hündür ağaclar adamda xoş duyğular oyadır, istər-istəməz maşının sürətini azaldırsan ki, ətrafın əsrarəngizliyinə baxmağa imkan tapasan. Bu “tunel”dəki yol da rahatdır, qışdan çıxanda əmələ gələn “narahatlıqlar” yol işçiləri tərəfindən vaxtında aradan qaldırılır.

Söz düşmüşkən qeyd edək ki, Qaxda yol infrastrukturunun yenilənməsi istiqamətində xeyli iş görülüb. Ölkə Prezidenti İlham Əliyevin 2 aprel 2014-cü il tarixli sərəncamına əsasən 7 min nəfər əhalinin yaşadığı 8 yaşayış məntəqəsini birləşdirən Alatəmir-Marsan-Tasmalı-Zəyəm-Lələli avtomobil yolunun tikintisinin davam etdirilməsi məqsədilə 3,8 milyon manat .vəsait ayrılıb. Artıq yolun 9 km hissəsinə asfalt-beton örtük salınıb, həmin yolun üzərində aşırımının uzunluğu 33 p/m olan körpünün tikintisi başa çatdırılıb. Digər bir sərəncama əsasən ayrılmış 2 milyon manat vəsait hesabına Qax şəhərinin mərkəzi yollarının bərpa-abadlıq işləri görülüb, prospekt və küçələrə asfalt salınması başa çatdırılıb.

Avtomobil yollarının tikinti və təmiri ilə bağlı rayon ərazisində görülən işlər bu gün də davam etdirilir. Bütün bunlar isə əhalinin böyük razılığına səbəb olur. Əlbəttə, abad yol, abad küçə, abad şəhər insanın rahatlığını təmin edən, işgüzarlığını artıran amillərdir. Vətəndaş görəndə ki, dövlət onun xoş günü, firavan yaşaması üçün hər cür qayğı göstərir, o da, öz növbəsində, daha məsuliyyətlə öz işinin öhdəsindən gəlməyə çalışır. Nəticədə isə ümumi mənafe naminə fəaliyyət uzlaşdırılır.

Rayon icra hakimiyyətindən aldığımız məlumat da diqqətimizi çəkdi. Ötən il 138 fərdi yaşayış evi və 23 sahibkarlıq obyekti tikilib. Bunların isə ümumi smeta dəyəri 3 milyon 950 min manata yaxın olub.

Kənd İnvestisiya Layihəsi çərçivəsində rayonun kəndlərində ümumi uzunluğu 61,8 km olan yol təmir edilib, 9 bulaq tikilib. 9 çən quraşdırılıb, 15,1 km içməli su xətti təmir olunub, xeyli abadlıq işləri görülüb.

Qax sel sularına həssas rayondur. Bu baxımdan müntəzəm mühafizə tədbirləri həyata keçirilir, sahilbərkitmə işləri görülür, dəmir-beton və daş-beton bəndlər salınır. Qax şəhərinin yeni yaşayış massivinin sel sularından mühafizəsi məqsədilə Qobala çayında 500 metr uzunluğunda dəmir-beton kanal tikilib.

Ümumilikdə rayonda tikinti-yenidənqurma işləri öz axarı ilə davam edir. İnzibati və yaşayış binalarının, xidmət obyektlərinin tikintisi başa çatandan sonra ümumi mənzərə daha da zənginləşəcək.

Regionların sosial-iqtisadi inkişafına dair III Dövlət Proqramında Qax rayonu ilə bağlı nəzərdə tutulmuş 22 bənddən ibarət tədbirlərin icrası istiqamətində ötən il xeyli iş görülüb. Bu baxımdan Qarabağ müharibəsi əlilləri və şəhid ailələri üçün yeni yaşayış binasının, həkim məntəqəsinin, sahə baytarlıq məntəqələrinin tikintisi, məktəblərdə, səhiyyə ocaqlarında, kitabxana və klublarda əsaslı təmir işlərini, yeni körpülərin salınmasını, artezian quyuların qazılmasını və digər işləri qeyd etmək olar. Dövlət proqramının icrasının ilk ili ərzində rayonda 472 daimi iş yerinin açılması da təqdirəlayiqdir.

Vacib məsələlərdən biri də sahibkarlığın inkişafına hərtərəfli diqqət göstərilməsidir. Əgər 2003-cü ildə rayonda iqtisadiyyatın bütün sahələri üzrə kiçik sahibkarlıq obyektlərinin sayı 130 idisə, bu göstərici 1 yanvar 2015-ci ilədək 1743-ə çatdırılıb. Əlbəttə, bütün bunlar sahibkarlığın inkişafına dövlət dəstəyinin bariz göstəricisidir. Onu da xatırladaq ki, ötən il 28 sahibkara Sahibkarlığa Kömək Milli Fondu tərəfindən 499 min manat güzəştli kredit verilib. Bu kredit hesabına rayonda 40 yeni iş yeri açılıb.

Son illər Qaxda turizm obyektlərinin sayı da artır. 11 turizm obyektinin fəaliyyət göstərməsi gələn turistlərin sayının artmasına da təsir edir. 2013-cü ildə rayona istirahət məqsədilə 20573 turist gəlmişdisə, 2014-cü ildə bu rəqəm 23630-a yüksəlib. Gələn turistlərin 395-nin xarici olması da inkişafın mühüm göstəricisidir.

Qarşıda həyata keçiriləsi tədbirlər çoxdur. Dövlətin qayğısı və qaxlıların çalışqanlığı, yurda bağlılığı sayəsində hələ çox işlər görüləcək. Onda bu dağlar gözəlinin qonaq-qarası da, sözü-söhbəti də daha çox olacaq.

Telman NƏZƏRLİ,

Azərbaycan.-2015.- 8 mart.- S.7.