Heydər Əliyev Mərkəzində Cracking art və Səməni

Beynəlxalq İncəsənət Sərgisi açılıb

 

Heydər Əliyev Fondunun vitse-prezidenti Leyla

Əliyeva sərginin açılış mərasimində iştirak edib

 

Xalqımız Novruz bayramını böyük sevinclə qeyd edir. Bu əziz günlərdə şəhərimizin sakinləri və paytaxtımızın qonaqları Heydər Əliyev Mərkəzinin parkında maraqlı sərgilərlə tanış ola biləcəklər.

 

AZƏRTAC xəbər verir ki, martın 18-də Heydər Əliyev Mərkəzinin parkında Cracking Art və Səməni Beynəlxalq İncəsənət Sərgisinin rəsmi açılış mərasimi keçirilib.

 

Heydər Əliyev Fondunun vitse-prezidenti Leyla Əliyeva sərginin açılış mərasimində iştirak edib.

 

Avropanın məşhur Cracking Art Group əsərləri Mərkəzin parkında nümayiş etdirilir. Pop-art janrındakı nəhəng incəsənət əsərlərindən ibarət sərgi IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin rəsmi tərəfdaşlığı ilə təşkil olunub. Layihənin məqsədi Azərbaycanda ekoloji problemlərin həllinə, flora və faunanın qorunmasına diqqəti artırmaqdır. IDEA-nın rəhbəri Leyla Əliyeva bura toplaşan gənclərlə birlikdə sərgi ilə tanış olub.

 

Qeyd edək ki, 1993-cü ildə Avropanın 6 rəssamı - italiyalı Renzo Nukara (Renzo Nucara), Marko Veronez (Marco Veronese), Kikko (Kicco), fransalı Aleks Anci (Alex Angi), belçikalı Karlo Rizzetti (Carlo Rizzetti), Vilyam Svitlav (William Sweetlove) bir araya gələrək Cracking Art Groupu yaradıblar. Bu hərəkat bütün səylərini müasir incəsənət haqda təsəvvürlərin dəyişməsinə, sənətdə sosialekoloji istiqamətlərdə innovativ metodlar tətbiq etməklə yenilik yaratmağa yönəldib.

 

Rəssamlar təkrar emal edilmişasan utilizasiya olunan sintetik materiallardan hazırladıqları nəhəng, parlaq rəngli heyvan fiqurları ilə ictimaiyyətin diqqətini ətraf mühitin problemlərinə yönəldirlər. Cracking art əsərləri bir tərəfdən diqqəti ekoloji məsələlərə çəkir, digər tərəfdən isə yeni texnologiyaların tətbiqini nümayiş etdirir.

 

Cracking Art Group öz yaradıcılığı ilə bu günədək dünyanın bir sıra şəhərlərini fəth edib. Qeyd olunan əsərlər Nyu-York, Sidney, Milan və digər şəhərlərdə nümayiş olunub.

 

Martın 18-də, həmçinin Mərkəzin parkında ənənəvi Səməni sərgisi təqdim olunub. Novruz bayramı ərəfəsində keçirilən sərgidə müasir incəsənət nümunələri - səmənilər nümayiş etdirilib. Bu sərgi Novruz günlərində izləyicilərə bayram əhval-ruhiyyəsini birlikdə yaşamağa və rəssamların Novruz ənənələrinə modern yanaşmasını təqdim edən incəsənət əsərləri ilə tanış olmağa imkan yaradır.

 

Səməni təbiətin oyanışını, canlanmasını təcəssüm etdirir, həyat və bolluq rəmzi hesab olunur. Qədimdə insanlar yazqabağı Səməni, saxla məni, ildə göyərdərəm səni deyərək taxıl cücərtməklə bolluq, bərəkət arzularını ifadə ediblər. Əsrlər keçib, sivilizasiya inkişaf edib, müxtəlif tarixi dövrlərdə yasaqlar qoyulub, lakin Azərbaycan xalqı Novruzu adət-ənənələri və rəmzləri ilə bərabər yaşadaraq çağdaş dövrümüzə qədər gətirib çıxarıb.

 

Xatırladaq ki, Azərbaycanın təşəbbüsü ilə 2009-cu il sentyabrın 30-da Novruz UNESCO-nun Qeyri-Maddi Mədəni İrs Siyahısına daxil edilib. 2010-cu il fevralın 23-də isə BMT Baş Məclisinin 64-cü sessiyasının iclasında martın 21-i Beynəlxalq Novruz Günü elan olunub.

 

Bu baxımdan Heydər Əliyev Mərkəzinin layihəsi olan Səməni sərgisi milli adət-ənənələrimizi, dəyərlərimizi yaşatmaq, yeni nəslə çatdırmaqla yanaşı, həm də Novruzun müasir incəsənətin sərhəd tanımayan dili ilə daha geniş şəkildə təbliğində xüsusi əhəmiyyət daşıyır.

 

Yola salmaqda olduğumuz qış fəsli soyuq, küləkli, yağışlı nəfəsi ilə özünü son dəfə göstərməyə çalışsa da, Mərkəzin parkına toplaşan insanların bayram əhval-ruhiyyəsi, milli musiqimizin sədaları təbiətin bu şıltaqlığına bir hərarət qatdı. Gənclər sərgilənən incəsənət əsərlərinin ətrafında toplaşır, şəkil çəkdirir, fikirlərini bölüşürdülər. Belə soyuq havada meyvə şirələrinin, isti çay və qəhvənin isə öz yeri vardı.

 

Tədbir çərçivəsində iştirakçılar arasında keçirilən viktorinanın qaliblərinə qiymətli hədiyyələr təqdim olunub.

 

Azərbaycan.-2015.- 19 mart.- S.10.