Azərbaycan Milli Elmlər Akademiyasının

prezidenti Vatikanda səfərdə olub

Azərbaycan Milli Elmlər Akademiyasının (AMEA) prezidenti, akademik Akif Əlizadə naşir Sandro Teti və Vatikanın Salesian Universitetinin prorektoru, professor Qianfranko Koffelin dəvəti ilə Vatikanda səfərdə olub.

AMEA-dan AZƏRTAC-a bildiriblər ki, səfər çərçivəsində A.Əlizadə Müqqədəs Pyotr Məbədinin tikintisi ilə bağlı XVI əsrə aid bütün sənədlərin saxlandığı “Fabrika di San Pietro” arxivində məşhur arxitektorlar Mikelancelo ve Berninin qədim əlyazmaları ilə tanış olub.

Akademik A.Əlizadə Vatikana səfər edən bütün dövlət başçılarına Papa tərəfindən hədiyyə edilən mozaikaların hazırlandığı Vatikan Mozaika Studiyasına da baş çəkib.

A.Əlizadə İtaliyanın görkəmli geoloqlarından biri, İtaliya Elmlər Akademiyasının üzvü, professor Annibal Mottana və Roma Universitetinin rektoru, professor Mario Panizza ilə də görüşüb. Vatikana səfərindən məmnunluğunu ifadə edən A.Əlizadə keçirilən görüşlərin elmi əlaqələrin genişlənməsinə töhfə verəcəyinə əminliyini bildirib.

Azərbaycan.-2015.- 30 mart.- S.6.