Uzunömürlülər diyarında idman təntənəsi

Tarixdə ilk dəfə keçiriləcək I Avropa Oyunlarının açılışına 41 gün qalır. Dövlət başçısı İlham Əliyevin qədim “Atəşgah” məbədində alovlandırdığı məşəl Naxçıvan və Lənkərandan sonra mayın 1-də uzunömürlülər diyarı qədim Lerik torpağına gətirildi.

Digər şəhər və rayonlarda olduğu kimi, burada da böyük idman bayramına hazırlıq işləri görülmüşdü. Yollar, küçələr, park və xiyabanlar səliqə-sahmana salınmış, hər yerdə qürur mənbəyimiz olan üçrəngli bayrağımız, şüarlar, transparantlar asılmışdı. Bir sözlə, 2008-ci ildə şəhər statusu almış Lerik başdan-başa bəzədilmişdi.

Baharın gəlişi ilə dağlar diyarı yaşıl dona bürünüb. Təbiətlə insanların bir-birini tamamlaması, həmahəngliyi xoş ovqat yaradıb. Şəhərin mərkəzindəki Heydər Əliyev meydanında isə başqa bir təntənə var idi. Rayonun yaxın-uzaq kəndlərindən əlamətdar hadisənin iştirakçısı olmaq, sevincli günü görmək üçün leriklilər, habelə şəhərin qonaqları bura toplaşmışdı. Meydanda ulu öndər Heydər Əliyevin dağların qoynunda, elə dağların özü kimi məğrur, əzəmətli heykəli ucalır. Xəyal keçmişlərə qanadlanır. Xalqımızın böyük oğlunun bu rayonun dəyanətli insanları haqqında dediyi xoş sözlər yada düşür: “Lerik Azərbaycanın ucqar dağ rayonudur. Orada gözəl insanlar, qəhrəmanlar yaşayır. Mən leriklilərlə əbədi dostam. Bu dostluq böyük sınaqlardan keçib”.

Dağlar qoynunda yerləşən Lerik həmişə əcnəbi səyyahların və arxeoloqların diqqətini cəlb etmişdir. Onlar hətta fürsət düşdükdə buradan yadigar kimi öz ölkələrinə müxtəlif əşyalar aparmışlar. Hazırda Fransanın Sen-Jermen Milli Muzeyində bu diyardan götürülmüş kolleksiyalar saxlanılır. Bu da təsadüfi deyil. Lerikdə xalq sənəti geniş yayılmışdır. Kəndlərdə indiyəcən xalça toxunur, ağacdan məişətdə işlədilən əşyalar hazırlanır, dəmirçilər müxtəlif sənət nümunələri düzəldirlər.

Amma Leriki şöhrətləndirən təkcə bunlar və füsunkar təbiəti deyil, həm də dağ vüqarlı ağsaqqalları və ağbirçəkləridir. Dünyanı heyrətə salan 168 yaşlı Şirəli Müslümov, 150 yaşlı Mahmud Eyvazov, 136 yaşlı Məcid Ağayev, 110 yaşlı Həsrət Məlikov və onların neçə-neçə tay-tuşu bu dağlar diyarında ömür sürmüşlər. Bu gün də Lerik dünyada uzunömürlülər diyarı hesab olunur.

Rayonun yüksəlişi, iqtisadi və mədəni həyatındakı inkişafı isə ulu öndər, xalqımızın unudulmaz oğlu Heydər Əliyevin adı ilə bağlıdır. Ötən əsrin 70-80-ci illərində, eləcə də son 20 ildə əldə edilmiş uğurlar ulu öndərin və onun layiqli davamçısı, dövlət başçısı İlham Əliyevin diqqət və qayğısı sayəsində qazanılmışdır.

Bu il Lerikə baharın gəlişi gecikib. Dağların qarı təzəcə əriməyə başlayıb, çayların suyu bollaşıb. Zümrüd meşələr, yaşıl yamaclar, şəlaləli qayalar göz oxşayır. Əkinçinin qayğıları artıb. Torpağa toxum səpir, tarlaya şitil köçürür, kəhrizləri qaydaya salır.

Belə bir yaz səhərində Lerik şəhərinin sakinləri dəstə-dəstə Heydər Əliyev meydanına axışırdı. Üzlərdə təbəssüm, gözlərdə sevinc var idi. Onlar tarixdə ilk dəfə keçirilən “Bakı-2015” Birinci Avropa Oyunlarının “Atəşgah”dan götürülmüş məşəli qarşılamağa çıxmışlar.

Səhər saat 10 radələridir. İlıq bahar səhəri Günəşin zərrin şüalarını ətrafa səpələyib. Belə bir xoş gündə idman bayramına gələnlərin sayı getdikcə artır, böyük bir insan ordusu yaranırdı.

Səbirsizliklə gözlənilən an çatır. “Bakı-2015” ilk Avropa Oyunlarının məşəli Lənkərandan Lerik rayonunun ərazisinə daxil olur. Məşəli gətirən avtomobil meşələrdən keçir, dağlara qalxan yolla irəliləyir. Yol boyu pişvaza çıxan leriklilər idmançıları hərarətlə qarşılayırlar.

Budur, səbirsizliklə gözlənilən avtomobil Lerik şəhərinin giriş qapısına yaxınlaşır. Bayram şənliyi başlayır. Mahnı oxuyan kim, yallı gedən kim, sazı sinəsinə basıb çalan kim...

İzdiham Nəriman Nərimanov küçəsindən keçib Heydər Əliyev meydanına doğru irəliləyir. Burada məşəli gənc idmançı Rafiq Əliyev 7 min nəfərin alqışları altında qəbul edib idmançı dostları ilə meydanda dövrə vurur. Müəyyən olunmuş məsafəni qət etdikdən sonra Rafiq Əliyev estafeti Zamiq Əhədova ötürür.

150 metr məsafəni məşəllə qət etdikdən sonra bu tarixi anda Zamiq öz təəssüratlarını bizimlə bölüşdü: “Son illər bir çox beynəlxalq əhəmiyyətli yarışların keçirildiyi məkana çevrilən Azərbaycan daha bir ilkə imza ataraq I Avropa Oyunlarına ev sahibliyi edir. Bu, ölkəmizin nüfuzunun göstəricisi olmaqla yanaşı, dünya birliyinin Azərbaycana olan etimadının təzahürüdür. Prezident İlham Əliyevin apardığı siyasət nəticəsində ölkəmiz dünyanın ən nəhəng dövlətləri ilə tərəfdaşlıq edir, bir çox irimiqyaslı tədbirlər keçirir. Avropa Olimpiya Komitəsinin I Avropa Oyunlarının məhz Azərbaycanda keçirilməsi haqqında qərarı da dövlətimizin xarici siyasətinin bariz nümunəsidir. Hər dəfə digər ölkələrdə keçirilən yarışlarda olimpiya alovunun əldən-ələ keçməsini izləyərkən düşünürdüm ki, görəsən, Azərbaycanda da belə bir tədbir keçiriləcəkmi? İndi isə nəinki bu möhtəşəm hadisə baş verdi, üstəlik, mən özüm məşəl estafetində iştirak etdim. Bu mənim üçün çox qürurverici hadisədir. Çox sevinirəm ki, mən də I Avropa Oyunlarının başlanğıc rəmzi olan məşəlin daşıyıcılarından biri oldum”.

Məşəl Lerikdə qəbul edilən gün müharibə və əmək veteranı Daşdəmir Paşayevin 90 yaşı tamam olurdu. O da bu izdihama gələn sinəsi orden və medallarla dolu ahıllar arasında idi. Ürək sözlərini belə ifadə etdi: “Mən ilk Avropa Oyunları məşəlinin alovlandırılmasını televiziyadan izləmişəm. Bu, ölkəmiz müstəqil olandan sonra ev sahibliyi edəcəyi ən mötəbər idman tədbirdir. Avropa Oyunları dünyada böyük maraqla izləniləcək, Azərbaycanın nüfuzunu daha da artıracaq”.

Bu isə II Dünya müharibəsinin veteranı, I qrup əlil Söhbət Fərziyevin dedikləridir:

- Həyat məni çox sınaqlara çəkib, neçə dəfə ölümlə üzbəüz dayanmışam. Bu məşəli gördükdə yadıma yaxın tarixi günlər düşdü. 2006-cı ildə Prezident İlham Əliyev Lerikə səfəri zamanı rayon mərkəzinə təbii qazın verilməsinin açılışını etdi. Şəhidlərin abidəsi önündəki məşəli alovlandırdı. İndi isə Lerikdə daha bir alov şölələndi.

“Bütün bunlar ulu öndərin uzaqgörənliyinin nəticəsidir. Bu işi Heydər Əliyev məktəbinin yetirməsi olan Prezident İlham Əliyev uğurla davam etdirir. Görülən işlər, ölkəmizdə keçirilən mötəbər idman yarışları bunu bir daha sübut edir. İnanırıq ki, Azərbaycanımızın belə nailiyyətləri bundan sonra daha çox olacaq”. Bu sözləri isə veteranlardan Həsrət Hüseynov, Hidayət Bəşirov, Vəliağa Şahpələngov və başqaları söylədilər.

Məşəl estafetində iştirak edən veteran idmançı, Lerik Rayon Gənclər və İdman İdarəsinin rəis müavini Natiq İsaqov da tarixi anla bağlı öz fikirlərini bölüşdü: “Gənclərdən ibarət ağır atletika üzrə milli yığmada iki Lerik idmançısı təmsil olunur. Ümumrespublika “Şahin” hərbi idman oyunlarında rayonumuzun komandası üçüncü yeri tutmuşdur. İdmançılarımızın ixtiyarına 37 idman zalı, 99 sadə idman qurğusu verilmişdir. Şəhərdəki stadion yenidən qurulmuşdur. İdman məktəbi müasir avadanlıqla təmin edilmiş, bölmələrin sayı artmışdır. Rayon uşaq-gənclər idman məktəbində 257 nəfər sərbəst güləş, voleybol və şahmatla məşğul olur. Son məlumata görə, rayonda təxminən 9500 nəfər həvəskar idmançı var. 3500 lerikli isə idmanla peşəkar səviyyədə məşğul olur. Dərəcəsi olan idmançıların sayı 800 nəfərə çatır. Sevindirici haldır ki, rayonda qızlardan ibarət taekvondo idman bölməsi də fəaliyyətə başlamışdır”.

10 idmançıdan hər biri məşəllə 150 metr qaçaraq 1,5 km-lik məsafəni qət edib Heydər Əliyev meydanına çatırlar. Burada isə fəxri bədən tərbiyəsi və idman işçisi İlham Zülfiyev Birinci Avropa Oyunları boyunca Lerik şəhərində alovlanacaq məşəli yandırır. Bundan sonra veteran idmançı qürur hissi ilə bunları söyləyir:

- Doğma Bakıda keçiriləcək ilk Avropa Oyunları hər bir azərbaycanlı kimi, mənim də qəlbimi fərəh hissi ilə doldurmuşdur. Rayonumuza gətirilən məşəlin daşıyıcılarından biri olmaq isə sevincimi birə min qat artırır. Azərbaycan bu gün dünyada həm də idman ölkəsi kimi tanınır. İdman sağlamlıqdır. Yaxşı deyiblər: “Sağlam bədəndə sağlam ruh olar”. İndi ölkəmizdə gənclərin inkişafı üçün hər bir şərait var. Şəhər və rayonlarımızın çoxunda olimpiya idman kompleksləri, idman qurğuları fəaliyyət göstərir. Digər sahələrdəki tərəqqi də göz qabağındadır. Lakin bu uğurlar bir çoxlarını sevindirmək əvəzinə, kədərləndirir. Onlar respublikamızın əleyhinə öz qara niyyətləri ilə çirkab atmaq istəyirlər. Lakin yadda saxlamaq lazımdır ki, dəniz heç vaxt çirkab götürmür, hamısını kənara atır.

...Gün günorta yerinə qalxır. Tədbirə musiqiçilər qatılır. Şən musiqi sədaları dalğa-dalğa hər tərəfi dağlarla əhatə olunan Lerik şəhərinə yayılır. Rayonun uzunömürlülərindən ibarət “Rəfti” xalq kollektivinin, qızlardan ibarət “Çiçək” özfəaliyyət rəqs qrupunun, şəhər mədəniyyət evinin “Bahar” musiqi kollektivinin çıxışları tədbir iştirakçıları tərəfindən rəğbətlə qarşılanır, onlarda xoş ovqat yaradır.

Mərasim başa çatdıqdan sonra məşəl Astara rayonuna yollanır.

Azərbaycan.-2015.- 2 may.- S. 9.