Olimpiya çempionu Fərid MANSUROV: “Azərbaycan güləşçiləri böyük himayədarları

olan İlham Əliyevin etimadını I Avropa Oyunlarında da doğruldacaqlar”

Azərbaycan müstəqilliyini bərpa etdikdən sonra ən çox diqqət ayırdığı sahələrdən biri də idmandır. Xüsusi ilə fiziki və mənəvi cəhətdən sağlam gəncliyin formalaşması və yetişdirilməsi daim diqqət mərkəzindədir. Bu gün ölkədə hər kəsin sərbəst şəkildə idmanla məşğul olması üçün tam şərait yaradılıb. Gənclər arasında idman hərəkatının kütləviləşməsi idmançılarımızın Olimpiya Oyunlarında, dünya və Avropa çempionatlarında uğurlarına yol açıb.

Eyni zamanda ölkə başçısının ayırdığı xüsusi diqqət və qayğı sayəsində bu gün Azərbaycan dünyada həm də idman ölkəsi kimi tanınır. Elə bunun nəticəsidir ki, ölkəmiz növbəti dəfə nüfuzlu beynəlxalq idman tədbirinə ev sahibliyi etməyə hazırlaşır. Avropanın tarixində ilk dəfə baş tutacaq Avropa Oyunları kimi mötəbər idman yarışmasının Bakıya həvalə edilməsi bir daha təsdiqləyir ki, Azərbaycan istənilən dünya və regional tədbir üçün təcrübəli, etibarlı və təhlükəsiz dövlət kimi özünü təsdiq edib.

Sözsüz ki, belə bir idman təntənəsinin ölkəmizdə keçirilməsi idmançılarımız üçün daha əlamətdardır. Odur ki, Avropa Oyunları ilə əlaqədar idmançılarımızın fikirlərini öyrənməyə çalışdıq.

Bu mövzuda söhbətimiz 2004-cü il Yay Olimpiya Oyunlarının qızıl medalçısı, yunan-Roma güləşi üzrə Azərbaycan yığma komandasının baş məşqçisi, Azərbaycan Güləş Federasiyasının gənclər üzrə vitse-prezidenti Fərid Mansurovla oldu. O, Avropa Oyunlarının ilk dəfə Azərbaycanda keçirilməsini yüksək qiymətləndirdiyini, həm bir idmançı, həm də vətəndaş kimi sevincinin həddi-hüdudunun olmadığını bildirdi: “Hər bir qitənin oyunları keçirilir. Bundan əvvəl qitə oyunları olaraq Asiya Oyunları, Pan-Amerika Oyunları, Ümum-Afrika Oyunları və Sakit Okean Oyunları keçirilib. Birinci Avropa Oyunları isə sonuncu qitə oyunları olmaqla onların ən möhtəşəmi və yaddaqalanı olacaqdır. Bu oyunların ölkəmizdə keçirilməsi əvəzsiz bir idman bayramıdır və bu zaman dünyanın gözü Azərbaycanda, Azərbaycan özü isə dünyanın mərkəzində olacaq. Bu yarışlar zamanı dünya ictimaiyyəti Azərbaycanla, idmanda qazandığımız uğurlarla, eyni zamanda insanlarımız, qonaqpərvərliyimiz, təbiətimizlə daha yaxından tanış olacaq”.

Olimpiya çempionu bizimlə söhbətində “Bakı-2015” I Avropa Oyunlarına hazırlığın yüksək səviyyədə olmasını xüsusi qeyd etdi. Bildirdi ki, çox qısa bir zamanda Bakıda müasir idman qurğuları - Bakı Olimpiya Stadionu, Milli Gimnastika Arenası, Velopark, Atıcılıq Mərkəzi, Su İdmanı Sarayı və başqa idman kompleksləri inşa olunub: “Təsəvvür edin ki, həm iqtisadi imkanlarına görə, həm də idmanın kütləviliyinə görə fərqlənən inkişaf etmiş ölkələrdə belə obyektlərin tikintisinə, Olimpiya Oyunlarına, bu tipli beynəlxalq yarışların hazırlığına ən azı 6-8 il vaxt sərf edirlər. Biz əcnəbi idmançılarla söhbətimizdə bunu belə eşitmişik, belə görmüşük. Heç özümüz də belə qısa vaxtda Bakının bu səviyyədə idman mərkəzinə çevriləcəyinə inanmazdıq. Ancaq reallıq göz qabağındadır.

Avropa Oyunlarının Bakıda keçirilməsi Azərbaycanı dünyada idman ölkəsi kimi nə qədər tanıdacaqsa, ölkə daxilində idmanın inkişafına da bir o qədər təkan verəcək. Bu yarışlar bitəcək, bu əzəmətli idman obyektləri xalqımız üçün, gənclərimiz üçün qalacaq. Heç şübhə etmirik ki, bu komplekslərdə Olimpiya Oyunlarında, qitə, dünya çempionatlarında və digər beynəlxalq yarışlarda ölkəmizin bayrağını qaldıracaq yüzlərlə çempionumuz yetişəcək. Sözsüz, belə sürətli inkişaf və yüksək səviyyədə hazırlıq dövlət başçısı İlham Əliyevin idmana ayırdığı xüsusi diqqət və güclü təşkilatçılıq sayəsində mümkün olub”.

Fərid Mansurov onu da əlavə etdi ki, hər il ölkəmizdə ayrı-ayrı idman növləri üzrə beynəlxalq turnirlər, yarışlar keçirilir. Bu, əksər idmançıların marağına səbəb olur. Başqa ölkələrdə keçirilən yarışlara könülsüz gedən və ya heç getməyən peşəkar idmançılar Azərbaycana tərəddüd etmədən gəlirlər: “Başqa idman növlərini demirəm, güləş üzrə çempionatlarda bunu dəfələrlə müşahidə etmişik. Bəzən elə olur ki, biz beynəlxalq yarışlardan qayıdanda əcnəbi idmançılar koordinatlarımızı götürür və tezliklə Azərbaycanda keçirilən müxtəlif yarışlara qatılacaqlarını bildirirlər. Bu idman bayramı Vətənimizi daha yaxşı tanıtmaq üçün növbəti şansdır. Odur ki, təkcə idman ictimaiyyəti yox, hər bir vətəndaş da oyunlara öz töhfəsini verməli, Vətənini sevdirməli, onu daha da ucaltmalıdır”.

Baş məşqçi onu da bildirdi ki, idmançılarımızın hər birindən, xüsusilə güləşçilərimizdən böyük uğurlar gözləyirik. Çünki güləş bizim milli idman növlərindən biridir. Hər bir azərbaycanlının qanında, canında güləşmək həvəsi var. Fərid Mansurov əksər yarışlarda qaliblər sırasında güləşçilərimizin daha çox olduğunu xatırladaraq doğma Vətənimizdə keçirilən bu əvəzsiz yarışmada onların yenə də yüksək göstəricilərlə fərqlənəcəklərinə qətiyyətlə inanır: “Azərbaycan güləşçiləri böyük himayədarları olan İlham Əliyevin etimadını I Avropa Oyunlarında da doğruldacaqlar”.

Sonda çempion gənclərə də səsləndi: “Bütün gəncləri, yeniyetmələri idmanla məşğul olmağa çağırıram. Söhbət hər kəsin peşəkar idmançı olmasından getmir, əsas odur ki, idmanla müntəzəm məşğul olsunlar və sağlam bədənə, möhkəm iradəyə sahib olsunlar”.

Elnur HADIYEV,

Azərbaycan.-2015.- 16 may.- S.4.