Tacikistanın folklor kollektivi Azərbaycanda keçiriləcək beynəlxalq festivalda iştirak etməkdə maraqlıdır

Üçüncü Ümumdünya Mədəniyyətlərarası Dialoq Forumunda iştirak edən Tacikistanın mədəniyyət naziri Şamsiddin Orumbekov mayın 18-də Azərbaycanın mədəniyyət və turizm naziri Əbülfəs Qarayevlə görüşüb.

AZƏRTAC xəbər verir ki, görüşdə ölkələrimiz arasında mədəni sahədə əlaqələrin daha da genişləndirilməsinin zəruriliyi vurğulanıb.

Xalqlarımızın mədəniyyətlərinin zənginliyini, qədimliyini və yaxınlığını qeyd edən Əbülfəs Qarayev Azərbaycan-Tacikistan münasibətlərinin bütün sahələrdə ənənəvi inkişaf etdiyini söyləyib. Azərbaycanın mədəniyyət və turizm naziri vurğulayıb ki, Tacikistan mədəniyyət tədbirlərində fəal iştirak edir onun dünya mədəniyyətinə verdiyi töhfələr təqdirəlayiqdir.

Şamsiddin Orumbekov öz növbəsində tacikistanlıların Azərbaycan mədəniyyətinə sonsuz sevgisindən danışıb. Bildirib ki, Tacikistanda Azərbaycan mədəniyyətinə, incəsənətinə həsr edilmiş silsilə tədbirlər təşkil olunur. Bu günlərdə Düşənbədə Azərbaycanın ümummilli lideri Heydər Əliyevin anadan olmasının 92-ci ildönümü münasibətilə sərgi açılıb.

Tacikistanın mədəniyyət naziri ölkəsinin folklor kollektivinin Azərbaycanda keçiriləcək beynəlxalq folklor festivalında iştirak etməkdə maraqlı olduğunu vurğulayıb.

Görüşdə, həmçinin kukla teatrları arasında əməkdaşlıq əlaqələrinin genişləndirilməsinin zəruriliyindən və Nizami Gəncəvi irsinin təbliği ilə bağlı müştərək layihənin reallaşdırılmasından bəhs olunub.

Azərbaycan.-2015.- 19 may.- S. 12.