Oğuz elində böyük bayram ovqatı yaşandı

Məşəl Qax və Oğuzda alovlandı

Aprelin 26-da I Avropa Oyunlarının Atəşgahdan od alan məşəli ölkəmizi diyar-duyar dolaşaraq, mayın 25-də Oğuz şəhərinə gətirildi. Bu kiçik, yaraşıqlı şəhər Böyük Qafqaz dağlarının ətəklərində yerləşir. Aparılan yenidənqurma və tikinti-quruculuq işləri şəhərin simasını tamamilə dəyişib. Oğuzun dağ və dağətəyi meşəlikləri, buz bulaqları, coşqun çayları, şəlalələri isə gələn qonaqları heyran edir, gözünü-könlünü oxşayır.

Dövlətin yüksək qayğısı sayəsində son illər Oğuzun inkişafı daha da sürətlənib. Oğuz şəhəri kiçik olsa da, burada böyük işlər görülür. Yeni parklar, xiyabanlar salınır, yollar asfaltlaşdırılır, sosial obyektlər və yaraşıqlı evlər tikilir. Burada yeni turizm və istirahət müəssisələrinin tikintisinə də ciddi fikir verilir. Hazırda rayonda 14 ailəvi istirahət mərkəzi fəaliyyət göstərir. Oğuzun müxtəlif ərazilərində yerləşən abidələr tarixin bütün dövrlərindən soraq verir. Qədim Alban məbədləri, Muxas qülləsi, Gavurqala, Kərimli türbəsi, Surxayxan qalası turistlərdə böyük maraq doğurur. Son tunc erkən dəmir dövrünə aid edilən Kərimli kurqanları da Oğuzun qədimliyindən xəbər verir.

Bunlar Prezident İlham Əliyev Oğuza səfəri zamanı dediyi sözlərdir: “Oğuz rayonu əhali nöqteyi-nəzərdən böyük rayon deyildir. Ancaq potensialı kifayət qədər böyükdür. Biz rayonun potensialından maksimum dərəcədə istifadə etməliyik”.

Oğuzun sənaye potensialı da var. Burada regionda yeganə olan Qlükoza zavodu fəaliyyət göstərir. Zavodun fəaliyyətə başlaması yeni iş yerlərinin açılması ilə yanaşı, rayonun kənd təsərrüfatının inkişafına da ciddi təsir göstərib. Çünki zavodun xammalı kənd təsərrüfatı məhsullarıdır.

Olimpiya İdman Kompleksi, Turizm və İdman Mərkəzi, 80 çarpayılıq Mərkəzi xəstəxana, əlillər və şəhid ailələri üçün 16 və 8 mənzilli yaşayış binaları və digər obyektlər Oğuzun gözəlliyini artıran obyektlər sırasındadır. Rayon mərkəzində ümumi sahəsi 2 hektar olan parkda örtülü kölgəliklər, su hovuzları və biri musiqili olmaqla 5 fəvvarə, uşaq əyləncə mərkəzi qurulub. Parkda yaradılmış 120 yerlik amfiteatrda müxtəlif tədbirlərin, o cümlədən konsert proqramlarının təşkili üçün hər cür şərait var.

Heydər Əliyev prospektinin başlanğıcında yerləşən Bayraq meydanı isə şəhərə xüsusi yaraşıq verir. Elə bu ərazidə məşəli qarşılamağa çıxanlar arasında şəhər sakinlərinin bayram ovqatını bölüşdük. Təhsil işçisi İmarət Aşurova dedi:

- Görürsünüz, şəhərimiz necə bəzənib. Baxdıqca adamın ürəyi açılır. Bu, bir tarixdir, bu tarixin bir parçası da bizim Oğuzda yazılır. Özü kiçik olsa da, ürəyi, amalları, əməlləri böyük olan şəhərimiz bu məşəl bayramı ilə I Avropa Oyunlarının tarixinə düşür. Buna görə çox qürurluyuq. Hər bir bayram iştirakçısını təbrik edirəm. Bu tədbirin ölkəmizdə keçirilməsi idmandan uzaq olanları da idmana bağladı. Bütün atletlərimizə uğurlar arzulayırıq.

Şəhid Emin Abdullayev adına Oğuz şəhər 2 nömrəli tam orta məktəbin direktoru Anar Məcidov da ürək sözlərini dilə gətirdi:

- Bu gözəl, bənzəri olmayan bayramda müəllimlərimizlə, şagirdlərimizlə birgə iştirak edirik. Tarixi hadisənin iştirakçısı olmaqdan çox məmnunuq. I Avropa Oyunlarının ölkəmizdə keçirilməsinin, Oyunların məşəlinin Azərbaycanı diyar-diyar dolaşmasının əhəmiyyəti çox böyükdür. Ölkəmiz, xalqımız tanınır, ölkələrin bizə olan rəğbəti, etimadı daha da artır. Bu mötəbər tədbir gənclərin sağlam həyata, idmana, vətənə bağlılığına, yaxşı olmayan əməllərdən uzaqlaşmağına da müsbət təsir edəcək. Hər kəsin bayramını təbrik edirəm.

I Avropa Oyunlarının məşəlinin Oğuzda alovlanması üçün şəhərin Olimpiya İdman Kompleksinin stadionunda səhnə qurulmuşdu. Bura gəlmək üçün məşəlçilər Oğuz şəhərinin şimal hissəsindən - Oyunların rəmzi qapısından 2,5 kilometr məsafə qət etməliydilər.

Məşəli ilk olaraq alqış sədaları altında SSRİ idman ustası, cüdo və sərbəst güləş üzrə məşqçi Araz Umarov qəbul etdi. Sonra II Dan qara kəmər sahibi, karate üzrə məşqçi-müəllim Ehtiram Nəsibov, sərbəst güləş üzrə məşqçi-müəllim Ziya Cumayəddinov, fəal gənc Elvin Qarayev, bədən tərbiyəsi və idman müəllimləri Ətayə Ramazanova, Rəfiqə Babayeva və digər məşəlçilər məşəli estafetə uyğun olaraq bir-birinə ötürməklə Heydər Əliyev prospektindən keçərək Olimpiya İdman Kompleksinin stadionuna gətirdilər. Burada məşəlçi Araz Umarov kasa formalı məşəli yandırdı. Məşəl alovlanandan sonra rəmzi çırağı saxlanılmaq üçün Rəfiqə Babayeva qəbul etdi.

Mərasim başa çatandan sonra I Avropa Oyunlarının məşəli Şəki şəhərinə yola salındı.

Telman NƏZƏRLI,

Azərbaycan.-2015.- 26 may.- S.6.