Təhsil naziri Sabirabadda “Son zəng” tədbirində iştirak edib

Mayın 29-da Sabirabad şəhəri Nizami Gəncəvi adına 5 nömrəli tam orta məktəbdə “Son zəng” tədbiri keçirilib.

Tədbirdə təhsil naziri Mikayıl Cabbarov, Sabirabad Rayon İcra Hakimiyyətinin başçısı Nazim İsmayılov, rayon təhsil ictimaiyyətinin nümayəndələri və valideynlər iştirak ediblər.

Təhsil Nazirliyindən AZƏRTAC-a bildiriblər ki, əvvəlcə tədbir iştirakçıları ümummilli lider Heydər Əliyevin Sabirabad şəhərinin mərkəzində ucaldılan abidəsi önünə gül dəstələri düzüb, xatirəsini hörmət və ehtiramla yad ediblər.

“Son zəng” tədbiri Azərbaycan Respublikasının Dövlət himninin səsləndirilməsi ilə başlanıb.

Tədbirdə təhsil naziri M.Cabbarov çıxış edərək gənc nəslin vətənpərvərlik ruhunda yetişdirilməsinin, onlarda təhsilə, elmə marağın daha da artırılması və geniş dunyagörüşünün formalaşdırılmasının ölkəmizin yeni cəmiyyət quruculuğunda ən ümdə məsələlərdən olduğunu bildirib.

Azərbaycanda təhsilin inkişafı istiqamətində ümummilli lider Heydər Əliyev tərəfindən əsası qoyulmuş siyasətin bu gün islahatların zəruriliyinə ciddi diqqət yetirən Prezident İlham Əliyevin rəhbərliyi ilə uğurla davam etdirildiyini vurğulayan M.Cabbarov bu istiqamətdə həyata keçirilən işlərdən danışıb.

Nazir məzunların həyatında bu gün yeni mərhələnin açıldığını bildirib, onların hər birinin müstəqil Azərbaycanın vətəndaşı kimi ölkəmizin gələcək inkişafı naminə həyata keçirilən bütün tədbirlərdə fəal təmsil olunacaqlarına əminliyini ifadə edib. Bu məktəbin texnologiya müəllimi Əhliman Hüseynovun ötən ilin dekabrında avtomobil qəzası nəticəsində Kür çayına düşən üçüncü sinif şagirdini xilas etmək naminə öz həyatını qurban verdiyini xatırladan M.Cabbarov onun qəhrəmanlığının hər kəsə nümunə olduğunu qeyd edib.

Əlamətdar gün münasibətilə məzunları təbrik edən nazir onlara uğurlar arzulayıb.

Məzunlar onları həyatın yeni mərhələsinə hazırlayan müəllimlərə təşəkkürlərini bildiriblər. Onlar doğma məktəbi tərk etdikləri üçün məyus olsalar da, həmişə uğurları ilə müəllimlərini sevindirəcəklərinə söz veriblər.

Tədbir şagirdlərin hazırladıqları “Son zəng” ədəbi-bədii kompozisiyası ilə davam edib.

Qeyd edək ki, Nizami Gəncəvi adına 5 nömrəli tam orta məktəb ümummilli lider Heydər Əliyevin təşəbbüsi ilə 1979-cu ildə inşa olunaraq istifadəyə verilib. Təhsil müəssisələrinin hər birinə xüsusi diqqətlə yanaşan Ulu Öndər 1999-cu ildə məktəbin 20 illiyi ilə bağlı kollektivə təbrik məktubu göndərib.

Məktəbdə hazırda 1271 şagird təhsil alır. 2013-2014-cü tədris ilində 37 məzun ali məktəblərə qəbul olunub. Müasir tədris inventarları və avadanlıqla təchiz olunmuş məktəb kurikulum hazırlıqları üzrə resurs mərkəzidir.

Məktəbin iki məzunu Azərbaycan Respublukası Prezidentinin təqaüdinə layiq görülüb. 2015-ci ilin aprelində keçirilən respublika fənn olimpiadasında məktəbin bir şagirdi Azərbaycan dili və ədəbiyyatı fənni üzrə olimpiadanın gümüş mükafatçısı olub. Məktəbin bir məzununun adı isə Azərbaycanın gənc istedadlarının ”Qizil kitab”ına yazılıb və o, ölkə Prezidentinin xüsusi aylıq təqaüdinə layiq görülüb.

Sonra təhsil naziri M.Cabbarov rayonun Cavad kəndində mərhum müəllim Əhliman Hüseynovun ailəsi və qohumları ilə görüşüb, onlara başsağlığı verib.

Azərbaycan. - 2015.- 30 may.- S.9.