Azərbaycandakı xarici ölkələrin hərbi attaşeləri Hərbi Dəniz Qüvvələrinin bazasında olublar

Azərbaycanın müdafiə naziri general-polkovnik Zakir Həsənovun təsdiq etdiyi illik fəaliyyət planına əsasən, xarici dövlətlərin ölkəmizdə akkreditə olunan hərbi attaşeləri noyabrın 5-də Hərbi Dəniz Qüvvələrinin bazasında olublar.

Müdafiə Nazirliyinin mətbuat xidmətindən AZƏRTAC-a bildiriblər ki, qonaqları Hərbi Dəniz Qüvvələrinin rəhbərliyi qarşılayıb. İlk olaraq Azərbaycan xalqının ümummilli lideri Heydər Əliyevin hərbi hissənin qərargahı qarşısında ucaldılmış abidəsi ziyarət olunub.

Hərbi attaşelərə Hərbi Dəniz Qüvvələri və onun yaranma tarixi barədə ümumi brifinq təqdim olunub, qonaqlar ətraflı məlumatlandırılıb.

Qərargaha, hərbi gəmilərə baş çəkən hərbi attaşelər buradakı hərbi texnikaya baxıb və şəxsi heyət üçün yaradılan şəraitlə maraqlanıblar. Matros yeməkxanaları, yataqxanaları və məşğələ otaqlarında olan attaşelər buradakı şəraitdən məmnun qaldıqlarını ifadə ediblər.

Hərbi attaşelər yüksək səviyyədə qarşılandıqlarına görə Müdafiə Nazirliyinin rəhbərliyinə minnətdarlıqlarını bildiriblər.

Azərbaycan.- 2015.- 6 noyabr.- S. 8.