“ADA” Universitetində beşinci Beynəlxalq Festival keçirilib

Noyabrın 20-də “ADA” Universitetində beşinci Beynəlxalq Festival keçirilib.

AZƏRTAC xəbər verir ki, Bakıda akkreditasiya olunmuş diplomatik korpusun və Avropa İttifaqının nümayəndələrinin qatıldıqları ənənəvi festivalda “ADA Universitetində” təhsil alan xarici tələbələr ölkələrinin milli mədəniyyətini, musiqi və mətbəx nümunələrini nümayiş etdiriblər.

Tədbirdə müxtəlif xalqların mədəniyyət nümunələrindən ibarət konsert proqramı təqdim olunub.

Qeyd edək ki, “ADA” Universitetində bakalavr və magistr pillələrində 39 ölkədən 100 tələbə təhsil alır. Onlardan 52-si Azərbaycan Respublikası Xarici İşlər Nazirliyi tərəfindən maliyyələşən “Əlimərdan bəy Topçubaşov” təqaüdünü qazanıb. Səkkiz nəfər isə “ADA” Universitetinin beynəlxalq tərəfdaşları olan ali təhsil müəssisələri, o cümlədən Böyük Britaniyanın Qlazqo, Fransanın İESEG menecment məktəbi, Koreya Respublikasının Hankuk, ABŞ-ın Miçiqan və Türkiyənin Giresun universitetləri ilə mübadilə proqramları çərçivəsində təhsil alan tələbələrdir.

AZƏRTAC

Azərbaycan.- 2015.- 21 noyabr.- S. 5.