Dövlət Müstəqilliyi Gününə həsr olunmuş konfrans keçirildi
Naxçıvan Dövlət Universitetində Dövlət Müstəqilliyi Gününə həsr olunmuş konfrans keçirilib. Tədbirdə çıxış edən YAP universitet şəhərciyi ərazi ilk təşkilatının sədri, pedaqogika üzrə fəlsəfə doktoru, dosent Kamal Camalov vurğulayıb ki, əvəzsiz milli sərvət olan müstəqilliyin qorunması onun əldə edilməsindən qat-qat ağır və mürəkkəb bir vəzifədir. Müstəqilliyimizin birinci mərhələsində olduğu kimi, ikinci mərhələsinin əvvəllərində də onun itirilməsi təhlükəsi yarandıqda ulu öndər Heydər Əliyev böyük xilaskarlıq missiyasını həyata keçirmişdir.Azərbaycan 24 ildir müstəqil dövlət kimi yaşayır və inkişaf edir. Bu inkişaf ölkəmizin bütün guşələrində, o cümlədən Naxçıvan Muxtar Respublikasında da özünü göstərməkdədir.
Konfransda universitetin Beynəlxalq münasibətlər kafedrasının dosenti Şamxal Məmmədovun “Ulu öndər Heydər Əliyev və Azərbaycanın müstəqilliyinin əbədiliyi” mövzusunda məruzəsi dinlənilib. Natiq məruzəsində Azərbaycan xalqının milli müstəqillik uğrunda çoxəsrlik mübarizəsindən bəhs edib. Qeyd olunub ki, 1993-cü ildə ölkədə siyasi çəkişmələr, vətəndaş qarşıdurması, milli iğtişaşlar gücləndiyi bir dövrdə yenidən siyasi hakimiyyətə gələn ümummilli lider Heydər Əliyev siyasi sabitlik və həmrəyliyi bərqərar etməklə Azərbaycanı dövlət müstəqilliyini itirmək təhlükəsindən xilas etdi.
Konfransda beynəlxalq münasibətlər ixtisası üzrə III kurs tələbəsi Tuncay Salmanlının “Naxçıvan Muxtar Respublikası müstəqillik illərində”, beynəlxalq münasibətlər ixtisası üzrə III kurs tələbəsi İnci Rzayevanın “Heydər Əliyev ideyaları milli müstəqilliyimizin mənəvi güc mənbəyidir” mövzularında məruzələri dinlənilib.
Tədbirdə YAP sıralarına yeni qəbul olunan tələbələrə üzvlük vəsiqələri təqdim olunub.
Sonda ümummilli lider Heydər Əliyevin həyat və fəaliyyətini əks etdirən film, eyni zamanda, Azərbaycanın çoxəsrlik tarixinə, milli-mənəvi dəyərlərinə, bugünkü sosial-iqtisadi tərəqqisinə həsr olunmuş slaydlar nümayiş olunub.
Elxan MƏMMƏDOV,
Azərbaycan.- 2015.- 18 oktyabr.- S. 9.