İsraildə Azərbaycanın Dövlət Müstəqilliyi Günü qeyd edilib

Bu il Azərbaycan-İsrail Beynəlxalq Assosiasiyası (Azİz) Azərbaycanın Dövlət Müstəqilliyi Günü münasibətilə İsrailin çox hissəsini əhatə edən bir neçə tədbir hazırlayıb.

“Azİz”in mətbuat xidmətindən AZƏRTAC-a daxil olmuş məlumata görə, oktyabrın 13-də “Azİz”in Afuladakı Azərbaycan Mədəniyyət Mərkəzində Azərbaycanda tanınmış skripkaçı, əvvəllər Azərbaycan Dövlət Konservatoriyasının müəllimi olmuş Leonid Barştakın rəhbərlik etdiyi simli kvartetin bayram konserti olub.

Azərbaycan Mədəniyyət Mərkəzinin direktoru Yeganə Salman təntənəli gecəni açaraq bildirib ki, 1991-ci il oktyabrın 18-də Azərbaycan Respublikası Ali Soveti 28 may 1918-ci il tarixli İstiqlal Bəyannaməsi əsasında “Azərbaycan Respublikasının Dövlət Müstəqilliyinin bərpa olunması haqqında” qərar qəbul edib.

Sonra Azərbaycan klassik musiqisinin banisi, anadan olmasının 130 illiyi hazırda həm Azərbaycanda, həm də onun hüdudlarından uzaqlarda geniş qeyd edilən Üzeyir Hacibəylinin musiqisi ifa edilib. “Arşın mal alan” operettasından parçalar, habelə xalq melodiyaları səslənib. Kvartet “Bəxtiyar” kinofilminə bəstəkar Tofiq Quliyevin yazdığı, bakılılar tərəfindən çox sevilən “Bakı haqqında mahnı” əsərini ifa edib. Tofiq Quliyevin daha bir əsəri - dünyanın müxtəlif ölkələrində yaşayan dinləyicilərin çox xoşladığı, Rəşid Behbudovun ifasında tamaşaçıların əksəriyyətinin yaxşı xatırladığı “Sənə də qalmaz” mahnısı onlar üçün xüsusi sürpriz olub.

Oktyabrın 15-də Yerusəlim şəhərindəki rus kitabxanasında beynəlxalq “İxtiraçılıq məsələlərinin həlli nəzəriyyəsi” (TRİZ) günü qeyd edilib. Çoxlarının yazıçı-fantast Henrix Altov kimi yaxşı tanıdığı ixtiraçı-mühəndis Henrix Altşuller tərəfindən Bakıda yaradılmış bu nəzəriyyə hazırda ABŞ-dan Yaponiyaya qədər, sənaye cəhətdən inkişaf etmiş bütün dünya ölkələrində özünə davamçılar tapıb. İsraildə TRİZ Təl-Əviv Universitetində tədris edilir. Gecənin təşkilatçısı və aparıcısı, “Azİz” assosiasiyasının Yerusəlim bölməsinin rəhbəri Aleksandr Aqranovski tədbirə toplaşanlara Azərbaycan tarixi haqqında məlumat verib, onları bayram münasibətilə təbrik edib. “Azİz”in baş direktoru Lev Spivak məxsusi qeyd edib ki, İsrail Azərbaycanın dövlət müstəqilliyini ilk olaraq tanımış ölkələrdən biri olub. Oktyabrın 18-də Hayfadakı “Kitab evi”ndə Azərbaycan Yazıçılar Birliyinin üzvü Miryam Heylinin “Qaynaqlar” adlı yeni səsli kitabının təqdimatı olub. Gecənin təşkilatçısı, “Şolumi” mərkəzinin rəhbəri Şaul Siman Tov bildirib ki, bu məcmuə hazırlanarkən məhz Azərbaycandakı yəhudilərin həyatından bəhs edən hekayələr seçilib, Azərbaycan xalqlarının çoxəsrlik tolerantlığını vurğulamağa çalışıblar. Gecəni hazırda İsraildə yaşayan, əslən Azərbaycandan olan ən populyar şəxslərdən biri - yazıçı və jurnalist David Kon idarə edirdi.

Azərbaycanın Dövlət Müstəqilliyi Gününə həsr edilmiş bütün tədbirlərdə şəhər sovetlərinin deputatları, absorbsiya bölmələrinin və ictimai təşkilatların rəhbərləri iştirak ediblər. Onlar öz çıxışlarında bütün Azərbaycan xalqına və şəxsən Azərbaycan Prezidenti İlham Əliyevə təbriklərini, xalqımıza sülh və firavanlıq, ölkəmizin ərazi bütövlüyünün tezliklə bərpa olunması arzularını çatdırmağı xahiş ediblər.

Azərbaycan.- 2015.- 20 oktyabr.- S. 8.