Baş nazirin müavini Əli Həsənov: “Yaponiyanın “Fuji Optical Co.LTD” şirkətinin Azərbaycandakı fəaliyyəti ən böyük humanistlik və xeyirxahlıq nümunəsidir”

Yaponiyaya rəsmi səfəri çərçivəsində Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq Humanitar Yardım üzrə Respublika Komissiyasının sədri Əli Həsənovun rəhbərlik etdiyi nümayəndə heyəti Sapporo şəhərində “Fuji Optical Co.LTD” şirkətində olub.

Əvvəlcə Azərbaycan nümayəndə heyətinə şirkətin ölkəmizdə fəaliyyətini əks etdirən fotostend barədə mlumat verilib. Bildirilib ki, şirkət artıq 10 ildən çoxdur ki, azərbaycanlı qaçqın və məcburi köçkünlərə təmənnasız optometrik xidmət göstərir, bu qəbildən olan insanlara optik, günəş eynəkləri, eşitmə aparatları və digər müxtəlif vasitələr paylayır.

Sonra nümayəndə heytinin rəhbəri, Baş nazirinin müavini Əli Həsənov şirkətin rəhbəri, dünya şöhrətli optometrist Akio Kanai ilə görüşüb. BMT-nin Qaçqınlar üzrə Ali Komissarlığının Azərbaycandakı nümayəndəliyinin təşəbbüsü və təşkilatçılığı, həmçinin Azərbaycan hökumətinin dəstəyi ilə Yaponiyanın “Fuji Optical Co.LTD” şirkətinin 2005-ci ildən etibarən hər il məcburi köçkünlərə, aztəminatlı əhaliyə optometrik xidmət göstərdiyi xatırlanıb.

Əli Həsənov Azərbaycandakı qaçqın, məcburi köçkün və aztəminatlı əhaliyə göstərilən təmənnasız optometrik xidmətə görə Akoi Kanaiyə təşəkkürünü bildirib. Qeyd edib ki, ötən müddətdə şirkət tərəfindən 43 minə yaxın yüksək keyfiyyətli optik eynək və digər vasitələr ölkəyə gətirilərək bu təbəqədən olan soydaşlarımıza paylanılıb. Ümumilikdə 22 mindən çox qaçqın, məcburi köçkün və aztəminatlı şəxs “Fuji Optical Co.LTD” şirkətinin bu xeyirxah missiyasından yararlanıb. 2005-2015-ci illərdə şirkət tərəfindən Azərbaycandakı fəaliyyətin yerinə yetirilməsi üçün 2 milyon dollara yaxın vəsait xərclənib. Akio Kanainin 2006-cı ildə “Nansen qaçqın mükafatı”na layiq görüldüyünü xatırladan Baş nazirin müavini bildirib ki, dünya şöhrətli optometrist məhz o mükafatı da Beyləqan rayonunun Yeni Xocavənd qəsəbəsində azərbaycanlı qaçqın və məcburi köçkünlər üçün su artezian quyusunun qazılmasına sərf edib.

Əli Həsənov vurğulayıb ki, Yaponiyanın “Fuji Optical Co.LTD” şirkətinin Azərbaycandakı fəaliyyəti ən böyük humanistlik və xeyirxahlıq nümunəsidir. Bu xeyirxah missiyanın bundan sonra da uğurla davam etdirilməsi üçün Azərbaycan hökuməti tərəfindən hərtərəfli şərait yaradılacaqdır.

Akio Kanai Azərbaycanda qaçqın və məcburi köçkünlər üçün yaradılan hərtərəfli şəraitdən məmnunluğunu ifadə edib. O, missiyanın uğurla həyata keçirilməsinə lazımi kömək göstərdiyinə görə Azərbaycan hökumətinə, yerli icra strukturlarına minnətdarlığını bildirib, builki missiyanın da uğurla keçirildiyini qeyd edib. Artıq 10 ildir ölkəmizə mütəmadi olaraq səfər etdiyini deyən optometrist Azərbaycanda gördüyü qonaqpərvərliyin, mehribanlığın onda xoş təəssüratlar yaratdığını söyləyib. O, gələcəkdə də bu missiyanın davam etdiriləcəyini bildirib.

Azərbaycan nümayəndə heyətinə şirkətin ölkəmizdə fəaliyyətinə həsr edilmiş məlumatların toplandığı kitablar hədiyyə edilib.

Baş nazir müavini Əli Həsənov şirkətin xatirə kitabına ürək sözlərini və ən xoş arzularını yazıb.

x x x

“Fuji Optical Co.LTD” şirkətinin Sapporo şəhərində yerləşən müəssisinə gələn Azərbaycan nümayəndə heyətinə istehsal prosesi, burada hazırlanan məhsullar və satış mərkəzi haqqında ətraflı məlumat verilib. Nümayəndə heyəti şirkətdə optik linzaların hazırlanması prosesini izləyib.

Sapporo şəhərinə səfəri çərçivəsində Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov Yaponiya kütləvi-informasiya vasitələrinin nümayəndələri üçün mətbuat konfransı keçirib.

Yapon jurnalistlərin suallarını cavablandıran Əli Həsənov Azərbaycanın coğrafi mövqeyi, yaxın tarixi, XX əsrin sonlarında dövlət müstəqilliyini bərpa etməsi, qonşu Ermənistanın əsassız ərazi iddilaları nəticəsində yaranmış Dağlıq Qarabağ münaqişəsi barədə ətraflı məlumat verib. Bildirib ki, havadarlarının dəstəyinə arxalanan Ermənistanın işğalçı siyasətinə, ölkəmizin cəlb edildiyi əsassız münaqişəyə və bunun nəticəsində yaranmış problemlərə baxmayaraq, Prezident İlham Əliyevin dərindən düşünülmüş siyasəti nəticəsində ölkəmiz dünayanın ən sürətlə inkişaf edən dövlətləri sırasında xüsusi yer tutur. Ölkə rəhbərliyinin təbii sərvətlərdən bacarıqla istifadə etməsi nəticəsində Azərbaycan görünməmiş inkişafa nail olub. Məhz bu uğurlar Azərbaycanı mühüm beynəlxalq forumların, mədəni tədbirlərin və idman yarışlarının keçirildiyi mərkəzə çevirib. Azərbaycan rəhbərliyinin bu siyasəti ölkəmizi bütün dünyada sülhsevər, insanpərvər, tolerant və tərəqqiyə can atan bir dövlət kimi tanıtdırıb.

Azərbaycanın qarşıya böyük hədəflər qoyaraq onlara doğru qətiyyətlə irəlilədiyini vurğulayan Əli Həsənov Prezident İlham Əliyevin Sərəncamı ilə təsdiq edilən “Azərbaycan 2020: gələcəyə baxış” İnkişaf Konsepsiyası barədə ətraflı məlumat verib. Bildirib ki, qarşıdakı illərdə Azərbaycanda işsizlik minimum həddə enəcək, ölkəmiz inkişaf etmiş dövlətlər sırasına daxil olacaq, milli iqtisadiyyatın neftdən asılılığı tam aradan qaldırılacaq.

Ermənistan-Azərbaycan, Dağlıq Qarabağ münaqişəsi haqqında məlumat verən Baş nazirin müavini vurğulayıb ki, Ermənistan Azərbaycanın 20 faiz torpaqlarını işğal edib və bunun nəticəsində 1 milyondan artıq qaçqın və məcburi köçkün ordusu yaranıb. BMT Təhlükəsizlik Şurasının Erənistanın işğal etdiyi torpaqları qeyd-şərtsiz azad etməsi barədə dörd qətnaməsinə baxmayaraq, bu ölkə hələ də işğala son qoymaq istəmir. Münaqişənin həlli ilə məşğul olan ATƏT-in Minsk qrupunun fəaliyyəti də hələ ki bir nəticə vermir.

Azərbaycan ilə Yaponiya arasında siyasi və iqtisadi əlaqələrin yüksələn xətlə inkişaf etdiyini diqqətə çatdıran Əli Həsənov, qeyd edib ki, Ermənistan-Azərbaycan, Dağlıq Qarabağ münaqişəsi nəticəsində qaçqın və məcburi köçkün olmuş 1 milyondan artıq azərbaycanlıya hərtərəfli yardım edən ölkələrdən biri də məhz Yaponiyadır.

“Fuji Optical Co.LTD” şirkətinin Azərbaycandakı fəaliyyətini yüksək qiymətləndirən Baş nazirin müavini bunun ən böyük humanistlik və xeyirxahlıq nümunəsi olduğunu bir daha xatırladıb. Bu xeyirxah missiyanın bundan sonra da uğurla davam etdirilməsi üçün Azərbaycan hökuməti tərəfindən hərtərəfli şərait yaradılacağını qeyd edib.

Yaponiya mətbuatının Azərbaycan nümayəndə heyətinin səfərinə göstərdiyi böyük marağa görə təşəkkürünü bildirən Əli Həsənov yapon jurnalistləri ölkəmizdəki sürətli inkişafı, əldə olunan böyük uğurları görmək üçün Azərbaycana dəvət edib.

Vüqar Ağayev

AZƏRTAC-ın xüsusi müxbiri

Sapporo

Azərbaycan.- 2015.- 1 sentyabr.- S. 2.