“Baku Guide” bələdçi kataloqunun yeni ildə ilk nömrəsi çapdan çıxıb

“Avropada belə bir möhtəşəm idman tədbirinin Bakıda təşkili böyük maraq doğurur. “Eurovision 2012” musiqi yarışmasından sonra Azərbaycanı müsbət tərəfdən tanıyanların sayı çoxdur. Avropa Oyunlarında 49 ölkədən 6 mindən çox idmançının yarışacağı gözlənilir. Oyunları işıqlandıracaq geniş medianı da nəzərə alsaq, bu, Azərbaycanın təbliği üçün olduqca böyük imkandır”.

Mədəniyyət və Turizm Nazirliyinin mətbuat xidmətindən AzərTAc-a bildirmişlər ki, bu sözlər “Bakı Avropa Oyunları - 2015” Təşkilat Komitəsinin kommunikasiya direktoru Vilyam Luis Marinin “Baku Guide” bələdçi kataloqunun yanvar nömrəsində dərc olunan eksklüziv müsahibəsindən götürülüb.

Mədəniyyət və Turizm Nazirliyinin dəstəyi ilə, “Mədəniyyət” qəzetinin əlavəsi olaraq nəşr edilən bələdçi kataloqunun yeni ildə ilk sayı da paytaxtımızın qonaqları və aktiv istirahət həvəskarı olan şəhər sakinləri üçün maraq doğuracaq informasiyalar, müxtəlif mövzularda yazılar, təqdimat xarakterli materiallarla zəngindir.

Azərbaycan, ingilis və rus dillərində hazırlanan nəşrdə paytaxtımızın mədəni və işgüzar həyatı, yanvar ayında nəzərdə tutulan müxtəlif tədbirlər haqqında məlumatlar, teatr və konsert müəssisələrinin repertuarı, muzey və sərgi salonlarının afişası oxuculara təqdim olunur. Yerli və xarici filmlərin həvəskarları da diqqətdən kənarda qalmayıb.

“Azərbaycanda qış turizmi” rubrikası mövsümün ən yaxşı çağında xizək sürmək, istirahətini mənalı keçirmək istəyənlər üçün bələdçi rolunu oynayacaq. “Azərbaycan mətbəxi” rubrikasında isə oxucular daha bir ləzzətli milli yeməyimizin - yarpaq xəngəlinin hazırlanma qaydası ilə tanış olacaqlar.

Turistlər üçün informasiya bölməsində onları maraqlandıra biləcək suallar ətraflı cavablandırılır. Kataloqda həmçinin şəhərdəki hotel, restoran, ticarət və əyləncə məkanları, turizm agentləri, aviakassalar, avtomobil kirayəsi və s. barədə məlumatlar yer alıb.

Azərbaycan.-2015.- 8 yanvar.- S.5.