Fransada terrorizmə qarşı ümumölkə nümayişi keçirilib

Fransada “Charlie Hebdo” satirik jurnalı redaksiyasına hücum nəticəsində həlak olan 12 əməkdaşın və Vənsan darvazasında törədilən terror aktında dünyasını dəyişən 5 nəfərin xatirəsini yad etmək, terrorizmə qarşı etiraz bildirmək məqsədilə yanvarın 11-də ümumölkə nümayişi keçirilib.

Parisin Respublika meydanında bir milyondan artıq nümayişçi toplaşmışdı. Əllərində terrorizmi pisləyən transparantlar tutan nümayişçilər “Biz müsəlmanıq, biz yəhudiyik” , “Biz Çarliyik”, “Yaşasın Fransa Respublikası”, “Yaşasın azadlıq”, “Rədd olsun terrorizm” kimi şüarlar səsləndirirdilər.

Nümayişdə 50-dən artıq ölkənin prezidenti və baş naziri iştirak edib. Fransa Prezidenti Fransua Olland, Baş nazir Manuel Valls ilə yanaşı, Almaniyanın, Böyük Britaniyanın, İspaniyanın, İtaliyanın, Rusiyanın, Ukraynanın, Türkiyənin, eləcə də başqa ölkələrin rəhbərləri və digər yüksək səviyyəli rəsmiləri də nümayişə qatılanlar arasında olublar.

Azərbaycanı nümayişdə Baş nazirin müavini Əli Əhmədov təmsil edib.

Əli Əhmədov Azərbaycan Prezidenti İlham Əliyevin başsağlığını Prezident Fransua Ollanda və Baş nazir Manuel Vallsa çatdırıb.

Fransanın Bordo, Marsel, Lion, Strasburq və digər şəhərlərində də izdihamlı nümayişlər keçirilib. Üç saatdan artıq davam edən nümayiş ölkə televiziyaları vasitəsilə birbaşa yayımlanıb.

Əsgər ƏLİYEV,

AzərTAc-ın xüsusi müxbiri

Paris

Azərbaycan.-2015.- 13 yanvar.- S.2.