Fransanın “TV5Monde” kanalında

Azərbaycanla bağlı veriliş yayımlanıb

Fransanın “TV5Monde” kanalında Azərbaycanla bağlı veriliş yayımlanıb.

AzərTAc xəbər verir ki, verilişin qonağı olan Fansanın Azərbaycandakı səfiri Paskal Mönye ölkəmizdəki fransız icması, Azərbaycan ilə Fransa arasında iqtisadiyyat və təhsil sahələrində əlaqələr haqqında məlumat verib. Səfir Azərbaycan hökuməti tərəfindən ölkədə informasiya-kommunikasiya texnologiyaları və turizm sahələrinin inkişafına böyük həcmdə sərmayə yatırıldığını bildirib.

Təhsil sahəsində əlaqələrdən bəhs edən səfir vurğulayıb ki, bununla bağlı bir sıra tədbirlər həyata keçirilir. O, Bakıda Fransız Liseyinin açıldığını, azərbaycanlı tələbələrin Fransada təhsil almalarının asanlaşdırılması üçün universitetlərarası forumların keçirildiyini diqqətə çatdırıb.

Azərbaycandakı yüksək tolerantlıq mühitindən də danışan Paskal Mönye müxtəlif dinlərin nümayəndələrinin burada sülh şəraitində yaşadıqlarını vurğulayıb.

Verilişin digər qonaqları son illər Azərbaycanda həyat səviyyəsinin yüksəlməsindən, müasir infrastrukturun yaradılmasından, Bakı şəhərinin sürətlə inkişaf etməsindən və onun Dubay ilə müqayisə ediləcək gözəllikdə olmasından söhbət açıblar.

Azərbaycan iqtisadiyyatının şaxələndirilməsi işinin sürətlə həyata keçirilməsi, fransız şirkətlərinin ölkəmizə investisiya yatırmağa böyük maraq göstərmələri, bununla bağlı çoxsaylı müqavilələrin imzalandığı da verilişdə qeyd edilir.

Həmçinin Azərbaycan mədəniyyətinin dünyada geniş təbliğ olunduğu, Azərbaycan xalçasının UNESCO-nun Bəşəriyyətin Qeyri-Maddi Mədəni İrsinin Reprezentativ Siyahısına daxil edildiyi, muğamımızın dünya musiqi incilərindən biri olduğu vurğulanır.

Azərbaycan.-2015.- 16 yanvar.- S.6.