Şəhid Rüstəm Əhmədovun medalı valideynlərinə təqdim olunub

Aprel döyüşlərində şəhid olan Azərbaycan Ordusunun hərbçisi, müddətdən artıq xidmət keçən hərbi qulluqçu, kiçik çavuş, 1983-cü il təvəllüdlü Əhmədov Rüstəm Oruc oğlu ölümündən sonra “Hərbi xidmətdə fərqlənməyə görə” 3-cü dərəcəli medalı ilə təltif olunub.

AZƏRTAC xəbər verir ki, Mingəçevir şəhərindəki Şəhidlər xiyabanında dəfn edilən Rüstəm Əhmədovun təltif olunduğu medal şəhərdəki Heydər Əliyev Mərkəzində ailə üzvlərinə təqdim edilib.

Mərasimdə Müdafiə Nazirliyinin nümayəndələri, Mingəçevir Şəhər İcra Hakimiyyətinin kollektivi, Səfərbərlik və Hərbi Xidmətə Çağırış üzrə Dövlət Xidmətinin Mingəçevir şəhər şöbəsinin, hüquq-mühafizə orqanlarının əməkdaşları, şəhidin xidmət etdiyi hərbi hissənin rəhbər şəxsləri və ictimaiyyət nümayəndələri iştirak edib, qəhrəman hərbçinin ruhuna dualar oxunaraq, ona Allahdan rəhmət diləyiblər.

Çıxış edənlər bildiriblər ki, işğal altındakı torpaqlarımız Silahlı Qüvvələrimiz tərəfindən tezliklə azad olunacaq və şəhidlərimizin ruhu o zaman rahatlıq tapacaq.

Mərasimdə şəhidin hərbçi yoldaşları Rüstəm Əhmədovun aprel döyüşlərində göstərdiyi qəhrəmanlığından söz açıblar.

Görüşdə Azərbaycan Ordusunun cəbhədəki uğurlarından danışılıb, şəhidlərin qanının yerdə qalmayacağına və işğal altındakı torpaqlarımızın tezliklə azad olunacağına inam ifadə edilib.

Rüstəm Əhmədovun ölümündən sonra “Hərbi xidmətdə fərqlənməyə görə” 3-cü dərəcəli medalı valideynlərinə təqdim olunub.

Qeyd edək ki, Rüstəm Əhmədov aprelin 14-də cəbhənin Tərtər-Ağdərə istiqamətində, Azərbaycan-Ermənistan qoşunlarının təmas xəttində düşmənin növbəti təxribatı zamanı açılan atəş nəticəsində şəhid olub.

Azərbaycan.- 2016.- 20 dekabr.- S.7.