Təhsil naziri beynəlxalq fənn olimpiadalarının qalibləri ilə görüşüb

Təhsil naziri Mikayıl Cabbarov fevralın 2-də beynəlxalq fənn olimpiadalarının qalibləri ilə görüşüb.

AZƏRTAC xəbər verir ki, görüşdə M.Cabbarov ölkəmizdə elmin, təhsilin inkişafına dövlət qayğısından danışıb. Bildirilib ki, 2015-ci ildə respublika fənn olimpiadalarında 22 min, bu il isə 27 min şagird iştirak edib. Şagirdlərimiz ötən il beynəlxalq olimpiadalarda 13 bürünc medal qazanıblar.

M.Cabbarov şagirdlərin gələcəkdə daha böyük uğurlar əldə edəcəklərinə və yüksək səviyyəli mütəxəssis kimi yetişəcəklərinə əminliyini bildirib. Təhsil naziri olimpiada qaliblərinin belə möhtəşəm nailiyyət əldə etməsində onların təhsil aldıqları məktəblərin və müəllimlərinin mühüm rolunu vurğulayıb, məktəblilərin ailələrinə və valideynlərinə minnətdarlığını bildirib.

Sonda beynəlxalq fənn olimpiadalarının qaliblərinə qiymətli hədiyyələr verilib.

Azərbaycan. - 2016.- 3 fevral.- S. 4.