Bu il Azərbaycana Rusiyadan əvvəlkindən çox turistin gələcəyi gözlənilir

Bu il ölkəmizə qonşu Rusiyadan çoxlu sayda turistlərin gəlişi gözlənilir. Rusiyanın Azərbaycandakı səfiri Vladimir Doroxin “Komsomolskaya pravda”ya müsahibəsində bu məsələyə də toxunub. Bildirib ki, Rusiya müstəqil dövlət kimi Azərbaycanın imkanlarını bilir və bu ölkə ilə strateji tərəfdaşdır.

V.Doroxin deyib: “Rusiya və Azərbaycan arasında münasibətlərin xüsusi dəyəri var və hansısa xoşagəlməz “sürpriz”lər bu münasibətləri poza bilməz. Bu, hazırkı mürəkkəb beynəlxalq şəraitdə çox vacibdir. Azərbaycanın müstəqilliyi illərində biz bir-birimizi anlamağı öyrəndik. Eyni zamanda, əsas qarşılıqlı fəaliyyət heç də neft sektorunda baş vermir”.

Azərbaycan və Rusiya arasında humanitar, iqtisadi və digər sahələrdə mövcud əlaqələrə toxunaraq səfir Azərbaycanda turizm potensialı olduğunu, bu sahənin prioritet istiqamət elan edildiyini də bildirib. Qeyd edib ki, əgər rusiyalı turistlər gəzmək və istirahət etmək üçün Azərbaycanı seçərsə, o, buna ancaq şad olar.

Artıq ölkəmizin turizm obyektləri Rusiyadan gəlməsi gözlənilən çoxsaylı turistləri qarşılamaq üçün hazırlıq işləri görür. Bununla əlaqədar turizm şirkətləri və hotel nümayəndələrinin iştirakı ilə görüş də keçirilib. Tədbirdə xarici turistlərin, o cümlədən rusiyalı turistlərin ölkəyə cəlb olunması istiqamətində birgə fəaliyyət imkanları müzakirə edilib. Görüşdə eləcə də Rusiya turizm şirkətləri ilə əməkdaşlığın gücləndirilməsi və bu ölkədən turistlərin cəlb olunması üçün “Victory Tour”, “Millenium Tourism” və “Improtex Tour”un birlikdə hazırladıqları layihə təqdim olunub. Azərbaycan Turizm Assosiasiyasından bildirilib ki, ölkəmizə xarici turistlərin cəlb olunması istiqamətində zəruri tədbirlər həyata keçirilir. Eyni zamanda, turizm şirkətləri və hotellər bu işdə qarşılıqlı fəaliyyət göstərməlidir.

Azərbaycan.- 2016.- 24 fevral.- S. 5.