Azərbaycan Respublikasının Miqrasiya Məcəlləsində dəyişikliklər edilməsi haqqında

Azərbaycan Respublikasının Qanunu

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 1-ci bəndini rəhbər tutaraq qərara alır:

Azərbaycan Respublikasının Miqrasiya Məcəlləsində (Azərbaycan Respublikasının Qanunvericilik Toplusu, 2013, N 7, maddə 797; 2014, N 11, maddələr 1351, 1357, N 12, maddə 1539; 2015, N 3, maddə 259, N 6, maddə 689; N 12, maddə 1436; Azərbaycan Respublikasının 2016-cı il 1 fevral tarixli 118-VQD nömrəli Qanunu) aşağıdakı dəyişikliklər edilsin:

1. 90.8-ci maddənin ikinci cümləsində “Şikayətin” sözü “Bu Məcəllənin 90.9-cu maddəsinə əsasən tənbeh tədbirinin tətbiqinin dayandırılması barədə qərar qəbul edildiyi hallar istisna olmaqla, şikayətin” sözləri ilə əvəz edilsin.

2. Aşağıdakı məzmunda 90.9-cu maddə əlavə edilsin:

“90.9. Şikayət verildiyi hallarda, barəsində şikayət olunan tənbeh tədbirinin tətbiqinin dayandırılması ilə bağlı məsələyə, maraqlı şəxsin ərizəsinə əsasən və ya xidməti vəzifəsinə görə şikayət instansiyasının öz təşəbbüsü ilə, şikayət instansiyası tərəfindən dərhal baxılır və bu barədə müvafiq qərar qəbul edilir.”.

İlham ƏLİYEV,

Azərbaycan Respublikasının Prezidenti

Bakı şəhəri, 17 may 2016-cı il

Azərbaycan.-2016.- 30 iyun.- S.3.