İnsan orqanlarının transplantasiyası və dərman vasitələrinin KİV-də reklamı məhdudlaşdırılır

“İnsan orqan və toxumalarının transplantasiyası, eləcə də dərman vasitələri ilə bağlı reklamlar tibb sahəsində ixtisaslaşmış mətbu nəşrlərdə, eyni zamanda tibb işçiləri və əczaçılar üçün keçirilən tədbirlərdə reklam oluna bilər”. Bu müddəa Milli Məclisin Səhiyyə komitəsinin dünən keçirilən iclasında “İnsan orqan (və ya) toxumalarının transplantasiyası haqqında” və “Dərman vasitələri haqqında” qanunlara dəyişikliklərin müzakirəsi zamanı səsləndirilib.

Komitənin sədri Əhliman Əmiraslanov bildirib ki, “Dərman vasitələri haqqında” qanuna əlavə edilməsi təklif olunan 16-1.4 maddəsinə əsasən həkim resepti olmadan buraxılan dərman vasitələrinin, tibbi təyinatlı texnikanın, müalicə, profilaktika, diaqnostika və reabilitasiya metodlarının reklamvericisi reklam istehsalçısına və reklam yayıcısına, onların tələbi əsasında müvafiq icra hakimiyyəti orqanının akkreditasiya olunmuş uyğunluğu qiymətləndirən qurumu və ya akkreditasiya olunmuş uyğunluğu qiymətləndirən qurumlar tərəfindən verilmiş sertifikatların, dərman vasitəsinin dövlət qeydiyyatına alınmasını təsdiq edən qeydiyyat vəsiqəsinin, dərman vasitəsindən istifadəyə dair təlimatın, təlimatda dərman vasitəsinin buraxılması qaydası göstərilmədiyi hallarda müvafiq məlumat olan sənədin, mənşə sertifikatının, reklamda istinad olunduqda, tədqiqatların nəticələrini təsdiq edən sənədin surətlərini təqdim etmək lazımdır. Həmçinin dərman vasitələrinin pulsuz paylanması, satışı, ödənişli və ya ödənişsiz xidmətlərin göstərilməsi ilə müşayiət olunan reklam aksiyalarının keçirilməsi qadağandır.

“İnsan orqan (və ya) toxumalarının transplantasiyası haqqında” qanun layihəsinə təklif olunan dəyişikliyə gəldikdə isə, qeyd edildi ki, insan orqan və toxumalarının transplantasiyası, eləcə də dərman vasitələri ilə bağlı reklamlar tibb sahəsində ixtisaslaşmış mətbu nəşrlərdə, eyni zamanda tibb işçiləri və əczaçılar üçün keçirilən tədbirlərdə reklam oluna bilər.

Qeyd edək ki, hər iki qanun layihəsinə təklif olunan əlavələr “Reklam haqqında” 2015-ci il 15 may tarixli qanuna uyğunlaşdırma məqsədi daşıyır. Qanun layihələri Milli Məclisin plenar iclasına tövsiyə edildi.

Sonra “Psixoloji yardım haqqında” qanun layihəsi təqdim edildi. Birinci oxunuşda müzakirəyə çıxarılan layihə 7 fəsil 23 maddədən ibarətdir. Qanun layihəsində psixoloji yardımla bağlı qaydalar, tələblər, şərtlər və bundan irəli gələn məsuliyyət növləri göstərilir. Sənəddə qeyd olunur ki, psixoloji yardımın göstərilməsi könüllülük, konfidensiallıq, qanunçuluq, humanistlik, insan və vətəndaş hüquq və azadlıqlarına əməl edilməsi prinsipləri əsasında həyata keçirilir.

Qanun layihəsi birinci oxunuş üçün Milli Məclisin plenar iclasına tövsiyə edildi.

Elgün MƏNSİMOV,

Azərbaycan.- 2016.- 27 oktyabr.- S. 4.