Azərbaycan Rioda 29 medal qazandı

Bu, müstəqilliyin 25 illiyinə idmançılar tərəfindən gözəl hədiyyədir

Son aylar Azərbaycanın idman təqviminə növbəti dəfə qızıl hərflərlə yazıldı. İdmançılarımız Braziliyanın Rio-de-Janeyro şəhərində təşkil olunan Olimpiya və Paralimpiya Oyunlarında uğurla çıxış edərək növbəti dəfə dünyaya Azərbaycanın idman ölkəsi olduğunu nümayiş etdirdilər.

Avqustun 5-21-də XXXI Yay Olimpiya Oyunlarında böyük uğur qazanaraq Vətənə 18 medalla qayıdan idmançılarımız sözün əsl mənasında tarix yazdılar. Qazanılan medalların sayına görə 15-ci pillədə qərarlaşan Azərbaycan atletləri nümayiş etdirdikləri mübariz və yüksək səviyyəli görüşlərlə xalqımızın rəğbətini qazandılar.

Sentyabrın 7-18-də isə dünyanın 170 ölkəsindən 4 mindən çox idmançının mübarizə apardığı sayca XV Yay Paralimpiya Oyunlarında atletlərimiz 1 qızıl, 8 gümüş və 2 bürünc olmaqla ümumilikdə 11 medal qazandılar. Bununla da, Paralimpiya yığmamız medalların ümumi sayına görə iştirakçı ölkələr arasında 33-cü, Avropa ölkələri arasında 16-cı, müsəlman ölkələri sırasında 6-cı, MDB ölkələri arasında isə 3-cü yerdə qərarlaşdı.

Azərbaycan idmançılarının planetin ən mötəbər idman yarışlarında uğurla çıxış edərək ümumilikdə 29 medal qazanmaları, 4 illiyin ən nüfuzlu turnirində davamlı olaraq daha çox mükafat əldə etmələri dövlət qayğısının ən parlaq göstəricisidir.

Dövlət başçısı, Milli Olimpiya Komitəsinin prezidenti İlham Əliyevin hər Olimpiada öncəsi və sonrası idmançıları qəbul etməsi xoş ənənəyə çevrilib. Sentyabrın 23-də Milli Olimpiya Komitəsinin prezidenti İlham Əliyev Braziliyanın Rio-de-Janeyro şəhərində keçirilən XV Yay Paralimpiya Oyunlarında iştirak etmiş idmançılarla və onların məşqçiləri ilə görüşüb.

Sevindirici haldır ki, hər Olimpiadada olduğu kimi, Paralimpiadada medallarımızın sayı artır, yeni idman qəhrəmanları ortaya çıxır. Bu, Azərbaycanda dövlət tərəfindən idmana, Olimpiya hərəkatına böyük qayğının nəticəsidir. Azərbaycanda idman sürətlə və uğurla inkişaf edir. Prezident İlham Əliyevin qeyd etdiyi kimi, idmanın inkişafı Azərbaycanda dövlət siyasətidir və Azərbaycan dövləti bunun üçün konkret addımlar atır. İdmançılara olan hörmət cəmiyyətdə yüksək səviyyədədir: “Bildiyiniz kimi, sizdən əvvəl bizim Olimpiya komandamız da Rioda çox yaxşı nəticələr göstərmişdir, 18 medal qazanmışdır. Olimpiya və Paralimpiya Oyunlarında Azərbaycan idmançıları 29 medal qazanmışlar. Bu, bir daha onu göstərir ki, Azərbaycan güclü idman dövlətidir. İdman Azərbaycanda sürətlə inkişaf edir və hər bir mötəbər beynəlxalq yarışda idmançılarımız bizi sevindirir. İdmanın inkişafına böyük diqqət göstərilir. Bu, bizim siyasətimizin əsas prioritetlərindən biridir. Hər bir ölkənin gücünü əks etdirən həm də onun idman potensialıdır, idman nailiyyətidir. Azərbaycanda hər sahədə olduğu kimi, idmanda da böyük inkişaf var. Şadam ki, idmanla məşğul olmaq istəyənlərin sayı artır. İdmançılar Azərbaycanda böyük hörmətə layiqdirlər və ictimaiyyət tərəfindən onların fəaliyyətinə yüksək qiymət verilir”.

Bir məqamı xüsusilə qeyd etmək yerinə düşərdi. Rioda əldə edilən medalların bir neçəsinin əyarı qızıl ola bilərdi. Təbii ki, hakimlər imkan versəydilər. Atletlərimizin bəzilərinin görüşlərində açıq-aşkar hakimlərin rəqiblərə xal verməsi idmançılarımızı dərindən üzsə də, bu qərarlara etiraz etsələr də, özlərini ləyaqətlə aparmaları müsbət məqam kimi dəyərləndirilməlidir. Dövlət başçısı İlham Əliyev bununla bağlı deyib: “İdman elə bir fəaliyyət növüdür ki, burada güclü qalib gəlməlidir, burada daim ədalət zəfər çalmalıdır. Bəzən biz görürük ki, bəzi yarışlarda ədalətsiz qərarlar qəbul edilir, o cümlədən bizim idmançılara qarşı. Əlbəttə ki, bu, bizi çox narahat edir və incidir. Ancaq bütün bunlara baxmayaraq, Azərbaycan artıq dəfələrlə müxtəlif beynəlxalq yarışlarda sübut edib ki, biz doğrudan da güclü idman dövlətiyik, bizim güclü idmançılarımız var və idmançılar Azərbaycanın şöhrətini daim yüksəklərdə saxlayırlar.”

Sevindirici haldır ki, bu gün Prezident İlham Əliyevin rəhbərliyi altında Milli Olimpiya Komitəsinin qazandığı nüfuz, göstərdiyi fəaliyyət beynəlxalq idman təşkilatları tərəfindən dəstəklənir və ən yüksək qiymətə layiq görülür. Rio Olimpiadası və Paralimpiadası Azərbaycanın idman tarixində yeni səhifə açdı. Həm oyunlara hazırlığı, həm də idmançıların çıxışları müsbət qiymətləndirildi. Hər Olimpiadadan Olimpiadaya medalların sayının artması, yeni idman qəhrəmanlarının ortaya çıxması, Azərbaycanda dövlət tərəfindən idmana, Olimpiya hərəkatına böyük qayğının nəticəsidir.

Azərbaycanda idman sürətlə və uğurla inkişaf edir. Prezident İlham Əliyevin vurğuladığı kimi, bütün bunlar dövlətin idmana diqqət və qayğısından irəli gəlir: “İdmanın inkişafı ilə bağlı kompleks tədbirlər görülür. Məhz bunun nəticəsidir ki, bu gün biz Avropa, dünya çempionatlarında, Olimpiya və Paralimpiya Oyunlarında yüksək nəticələr göstəririk. Həm təlim-məşq prosesi düzgün təşkil edilir, həm də idman infrastrukturu yaradılır. Bizim bölgələrimizdə 40-dan çox regional Olimpiya Mərkəzi fəaliyyət göstərir. Bir neçə Olimpiya Mərkəzində tikinti işləri gedir və gələn il bu işlər davam etdiriləcək. 2008-ci ildə paralimpiyaçılar üçün xüsusi Olimpiya İdman Mərkəzi yaradılmışdır və orada bizim idmançılarımız məşq edirlər. Digər infrastruktur yaradılır. Bakıda ən yüksək beynəlxalq yarışları qəbul edə biləcək idman obyektləri var. Keçən il Avropa Oyunlarının keçirilməsi zamanı bütün dünya bunu gördü”.

Gələn ay isə bütün respublika Azərbaycanın dövlət müstəqilliyinin 25-ci ildönümünü qeyd edəcək, bu əlamətdar hadisə ölkəmizdə böyük coşqu ilə qeyd olunacaq. Bu illər ərzində Azərbaycanın qazandığı bir-birindən böyük nailiyyətlər və yüksək beynəlxalq nüfuz ölkəmizi dünyaya ən qüdrətli idman dövlətlərindən biri kimi tanıtmışdır. Dövlət müstəqilliyimizin 25-ci ildönümü bizim üçün ona görə ikiqat fərəhli, əlamətdardır ki, bu bayrama bir ay qalmış Braziliyada Azərbaycan idmançıları qazandıqları mükafatlarla ölkəmizin idman, Olimpiya hərəkatı tarixinə qızıl hərflərlə növbəti parlaq səhifə yazdılar. Prezident İlham Əliyev bununla bağlı deyib: “Biz bu il müstəqilliyimizin bərpasının 25 illiyini qeyd edəcəyik. Bu illərin mütləq əksəriyyəti şanlı-şöhrətli illərdir. Fəxr edirik ki, bu gün bu səviyyəyə qalxmışıq. Gənc nəsil bu dəyərləri mütləq gələcəkdə yaşatmalıdır ki, inkişafımız dayanıqlı olsun, Azərbaycan daim müstəqil ölkə kimi yüksək zirvələrdə olsun. Ona görə, sizin Rioda gözəl çıxışınız, eyni zamanda, gənclərə də gözəl bir nümunədir. Əminəm ki, bu yarışlardan - Olimpiya, Paralimpiya Oyunlarından sonra bizim idman bölmələrimizə müşahidə olunan axın daha da güclənəcək”.

Riodakı tarixi uğur gələcək yarışlar üçün gözləntiləri artırır. Bu, idmançılar qarşısında həm məsuliyyət, həm də inam hissini daha da artıracaq və atletlərimiz qarşıdakı nüfuzlu turnirlərdə əldə edəcəkləri yeni möhtəşəm qələbələri ilə xalqımızın etimadını doğruldacaqlar.

Elçin CƏFƏROV

Azərbaycan.- 2016.- 25 sentyabr.- S.1.