Köhnə ilin yeni ünvanları

Mayın 5-də 70 il ərzində Bakının sakinlərinə və qonaqlarına xidmət göstərmiş “İnturist” hoteli yenidən istifadəyə verilib. Bu münasibətlə keçirilən tədbirdə Prezident İlham Əliyev iştirak edib.

Beşulduzlu bu hotel “Absheron Hotel Group”una aiddir. Yeni hotel vaxtilə Bakıdakı “İnturist” mehmanxanasının arxitektura üslubunda inşa edilib. Bu “İnturist” nəinki Azərbaycanda, eləcə də keçmiş SSRİ-də çox məşhur idi. Yeni hotel köhnəsi barədə xatirələri yaşatmaqla bərabər, nadir memarlıq quruluşu ilə də diqqəti cəlb edir. Beşmərtəbəli binada 150 standart və suit nömrə var. Otaqların hamısı müasirliyi və rahatlığı ilə seçilir. Hotelin özəlliyini artıran cəhətlərdən biri də otaqların eyvanlarından Xəzər dənizinə və sahil boyu Bakı bulvarına açılan mənzərədir. Otaqların hamısı sürətli internet, havalandırma və digər zəruri sistemlərlə təchiz olunub.

* * *

Mayın 15-də Bakının Nobel qardaşları prospektinə paralel inşa edilmiş dənizkənarı yolun açılışı olub. Dövlət başçısı İlham Əliyev tədbirdə iştirak edib.

Yeni inşa olunan 8 zolaqlı yol müasir tələblər səviyyəsində və yüksək keyfiyyətlə salınıb. Hərəkət zolaqlarının eni 3,75 metr olan yeni yol “Ağ şəhər” bulvarının yaxınlığında yerləşir. Burada istirahət edən insanların təhlükəsizliyi üçün hər birinin eni 8 metr olmaqla 3 piyada keçidi inşa olunub. Yolun inşası sosial məna daşımır, onu həm də Bakının dünyanın ən gözəl şəhərlərindən birinə çevrilməsinə töhfə kimi qiymətləndirmək olar. Yeni yol həmçinin paytaxtın yol-nəqliyyat infrastrukturunun təkmilləşdirilməsi və müasirləşməsi istiqamətində görülən işlərin tərkib hissəsidir.

* * *

Mayın 22-də Bakının yeni istirahət mərkəzi olan Böyükşor bulvar və parkının açılış mərasimi olub. Dövlət başçısı İlham Əliyev obyektin açılışında iştirak edib.

Layihənin birinci mərhələsində gölün şərq və cənub sahilində bulvar və park salınıb. Ümumi abadlıq işlərinin sahəsi 15 hektardan çoxdur. Ərazidə neftlə çirklənmiş torpaqlar təmizlənib, çirklənmiş yeraltı suların gölə axmasının qarşısı tamamilə alınıb və drenaj sistemi qurulub. Sahil boyu gəzinti zolağının uzunluğu 2,5 kilometr, bulvar sahəsinin ümumi eni isə 94 metrdir. Burada idman və uşaq meydançaları, velosiped zolaqları salınıb, minlərlə ağac və bəzək kolu əkilib.

* * *

Mayın 25-də Bakıda I Avropa Oyunlarının Atletlər və Media kəndlərinin açılışı olub. Dövlət başçısı tədbirdə iştirak edib.

Atletlər kəndi 383 min kvadratmetr sahəni əhatə edir. O, Bakı Olimpiya Stadionuna, Milli Gimnastika Arenasına və Heydər Əliyev Beynəlxalq Aeroportuna yaxın olmaqla yanaşı, şəhərin müxtəlif istiqamətlərinə gediş-gəlişin rahat və sərfəli olduğu bir ərazidə yerləşir. Kompleks 13 yaşayış və yardımçı binalardan ibarətdir. Burada iki, üç və dörd otaqlı 1042 mənzil var. Hər mənzil 2, 4 və 6 yataq otağından ibarətdir. Burada ümumilikdə 7499 şəxs yerləşə bilər. Atletlər kəndində idmançılar və komanda rəsmiləri üçün təhlükəsiz, rahat şərait yaradılıb.

Media kəndindəki 4 binada ümumilikdə 536 mənzil var. Burada jurnalistlər üçün ayrıca yeməkxana da nəzərdə tutulub. Yeməkxanada eyni vaxtda 500 nəfər qidalana bilir.

* * *

Mayın 26-da Bakıda müasir istirahət və əyləncə mərkəzi - “Dalğa Beahc-Aqua Park” istifadəyə verilməsi mərasimi keçirilib. Prezident İlham Əliyev mərasimdə iştirak edib.

Xəzər rayonunun Mərdəkan qəsəbəsində yeni inşa edilən “Dalğa Beahc-Aqua Park” xidmətin müxtəlifliyi və quruluşunun cazibədarlığı ilə fərqlənir. “Dalğa Beahc-Aqua Park”ın ümumi sahəsi 68 min kvadratmetrdir. Ərazisinə görə Azərbaycanda ən böyük Aqua parkdır. İstirahət kompleksində ümumi sahəsi 12 min kvadratmetr olan 7 hovuz var.

Təmiz hava və füsunkar dəniz mənzərəsinə malik “Dalğa Beahc-Aqua Park” yerli və xarici turistlərin sevimli əyləncə və istirahət məkanıdır. Bu obyektin istifadəyə verilməsi Bakının turizm potensialını artırmaq və şəhərimizə gələn qonaqların istirahətini mənalı təşkil etmək baxımından da əhəmiyyətlidir.

* * *

Mayın 29-da Prezident İlham Əliyevin iştirakı ilə I Avropa Oyunlarının Əməliyyat Komitəsinin baş ofisinin açılışı olub. I Avropa Oyunları ilə əlaqədar bütün nəqliyyat, qeydiyyat, təhlükəsizlik və əməliyyatlar bu mərkəzdən idarə olunub.

Mərkəzdə yerli və xarici mütəxəssislərin yüksək səviyyədə xidmət göstərmələri üçün hər cür şərait yaradılıb. Ümumilikdə komitədə yerli və xarici mütəxəssislərdən ibarət 1500-ə yaxın işçi çalışa bilir. Eyni zamanda, Oyunlarda iştirak etmiş bütün idmançıların, məşqçilərin yerləşdirilməsi və lazımi idman avadanlığı ilə təmin edilməsi, həmçinin onların təmsil olunduqları ölkələrin Milli Olimpiya komitələrin rəsmilərinin qarşılanması və yerləşdirilməsi buradan idarə edilib. Yarışlar zamanı bütün təhlükəsizlik təbirləri də bu mərkəzdən idarə olunub.

* * *

İyun ayının 1-də Bakının görkəmini daha da gözəlləşdirən Bakı “Ağ şəhər” bulvarının açılışı olub. Dövlət başçısı İlham Əliyev tədbirdə iştirak edib.

Bu bulvar əvvəllər paytaxtın “Qara şəhər” kimi tanınan və bir çox sənaye müəssisələrinin yerləşdiyi ərazidə ən müasir standartlara uyğun şəkildə salınıb. Bakı “Ağ şəhər” bulvarının uzunluğu 2,7 kilometr, sahəsi 33 hektardır. Burada gələcəkdə uşaq kinoteatrının inşası da nəzərdə tutulur. Yeni bulvarda basketbol, voleybol və iki futbol meydançası, ümumilikdə dörd yeni meydança inşa edilib. Bundan başqa, açıq havada yaradılan trenajor sahəsi də istirahətə gələnlərin ixtiyarına verilib.

* * *

İyunun 25-də Azərbaycan Respublikası Silahlı Qüvvələrinin Ali Baş Komandanı, Prezident İlham Əliyevin iştirakı ilə Bakının Qaradağ rayonunda Hərbi Dəniz Qüvvələrinin və “N” saylı hərbi hissənin açılış mərasimi olub.

Xəzər dənizi hövzəsində ən böyük və müasir obyekt olan Hərbi Dəniz Qüvvələrinin yeni bazasının və “N” saylı hərbi hissəsinin inzibati, xidməti binalarının və qurğuların inşasına 2010-cu ilin oktyabrından başlanılmışdır. Bu müddətdə şəxsi heyətin xidməti vəzifələrinin layiqincə yerinə yetirilməsi və onların ailə üzvlərinin sosial-məişət şəraitinin yaxşılaşdırılması üçün hərbi obyektlərdə çox işlər görülüb. Hərbi Dəniz Qüvvələrinin bazasının qərargah binasında növbətçi, tədris, vətəndaşların qəbulu, qonaq otaqları, konfrans zalı, komplektləşdirmə, dəniz müşahidə və digər şöbələr, həmçinin feldyeger, poçt-rabitə stansiyası, bufet yaradılıb.

Yeni baza Hərbi Dəniz Qüvvələrinin idarə olunmasını həyata keçirir, Xəzər dənizinin Azərbaycan Respublikasına məxsus sektorunda suüstü şəraitə nəzarət etməyə hərtərəfli imkan verir. Məntəqədə suüstü şərait haqqında operativ məlumatlar Hərbi Dəniz Qüvvələrinə məxsus sahil və ada radio-texniki postlarda yerləşən radiolokasiyalar stansiyaları vasitəsilə alınır. Aşkar edilən bütün hədəflər real vaxt rejimində monitorda əks olunur. Xəzər dənizinin Azərbaycana məxsus sektorunda suüstü şəraitlə bağlı Dövlət Sərhəd Xidmətinin sahil mühafizəsindən və Dövlət Dəniz Administrasiyasından alınan məlumatlar da Hərbi Dəniz Qüvvələrinin komanda məntəqəsində toplanılır, təhlil olunur və müvafiq qərar qəbul edilir. Burada ən müasir texnoloji yeniliklərə əsaslanan avadanlığın quraşdırılması məntəqənin işini yüksək səviyyədə qurmağa imkan verir.

Azərbaycan. - 2016.- 14 yanvar.- S.2.