“Xilaskar ordu” 70 ildə qazandığı adı bir gecədə itirdi

O qış gecəsinin sakitliyini pozan ilk atəş səsləri eşidiləndə biz necə böyük bir xəyanətin baş verdiyini dərk etdik. Müxtəlif istiqamətlərdən şığıyan tanklar izdihamı tırtılları altına aldı, qarşıya çıxan nə varsa hamısını xıncım-xıncım etdi.

Bəli, bu, Azərbaycan xalqına xəyanət idi. O xalqa ki, 1941-1945-ci illərdə cəbhəyə göndərdiyi yanacaqla faşistlərin üzərinə gedən, onların maqavimətini qıran tanklar hərəkətə gəlirdi. O xalqa ki, hərtərəfli köməyi ilə qələbəni yaxınlaşdırmışdı...

1990-cı ildə SSRİ hələ mövcud idi. Odur ki, insanların öz ölkəsində gülləbaran edilməsi, öz dövlətinin ordusunun bu cür vəhşiliklər törətməsi onların Sovet İttifaqının sülhsevərliyinə, insanpərvərliyinə inamını itirdi, puç etdi. 70 ildən çox bir müddətdə “xilaskar ordu” adlandırdığımız sovet ordusu yanvarın 20-də sözün əsl mənasında vandalizm göstərdi. Bu qırğın Azərbaycan xalqının azadlıq istəyini boğmağa hesablanmışdı. Lakin bütün bunlara rəvac verənlər öz hesablarında yanılmışdılar. 20 Yanvar bizə dərin qəlb yaraları vursa da, xalqımızın azadlıq eşqini, müstəqillik arzusunu daha da alovlandırdı, milli qürurunu daha da artırdı.

Azərbaycan. - 2016.- 20 yanvar.- S. 9.