“Bizdən inciməsin bir əziz qonaq”

Bu, fəaliyyət göstərdiyi iki il ərzində 270 min nəfərdən çox insana xidmət göstərmiş “Tufan” Dağ-Xizək Yay-Qış İstirahət Kompleksinin devizidir

Son illər ölkənin sosial-iqtisadi həyatında baş verən yeniliklər, tikinti-quruculuq işlərinin aparılması digər sahələrlə yanaşı, turizm sektoruna da təsirsiz ötüşməyib. İqtisadiyyatımızın neft amilindən asılılığının azaldılmasına xidmət edən qeyri-neft sektorunun inkişafı indi bir çox sahələrin tərəqqisi ilə müşayiət olunur.

Prezident İlham Əliyev hələ ölkə rəhbərliyinə seçildiyi ilk illərdə bir neçə mühüm sahə ilə yanaşı, Azərbaycanda turizmin inkişafını da qeyri-neft sektorunun əsas sahələrindən biri elan etmişdi və bu istiqamətdə atılan addımlar artıq öz bəhrəsini verməkdədir. Təsadüfi deyil ki, son bir neçə ildə dünyanın ən məşhur hotel brendləri Azərbaycana gəlib və ölkədə çoxsaylı beşulduzlu hotellər istifadəyə verilib. Həmçinin 2011-ci il Azərbaycanda “Turizm ili” elan edilmişdi.

Bu baxımdan iki il əvvəl, 2014-cü ilin yanvar ayının 3-ü tarixində dövlət başçısının iştirakı ilə Qəbələdə “Tufan” Dağ-Xizək Yay-Qış İstirahət Kompleksinin birinci mərhələsinin açılışı da böyük əhəmiyyətə malikdir. Layihə çərçivəsində kompleksdə nəhəng infrastruktur formalaşdırılıb. Avtomobil yolunun çəkilməsi, torpaq sürüşmələrinin qarşısının alınması üçün tədbirlər görülüb. Ərazidə insanların rahat istirahəti üçün hər cür şəraitə malik infrastruktur, o cümlədən mehmanxana, ofislər, uşaqlar üçün istirahət guşəsi və digər müvafiq obyektlər yaradılıb.

Bütün fəsillərdə turistlərə xidmət göstərilir

“Tufan” Dağ-Xizək Yay-Qış İstirahət Kompleksinin direktoru Əvəz Nəbiyev bildirdi ki, kompleksin tikintisinin birinci mərhələsi çərçivəsində dörd kanat xətti tam inşa olunaraq istifadəyə verilib. On xizək yolundan beşində inşaat işləri başa çatıb. Digər işlər isə mərhələli şəkildə həyata keçirilir. Burada turistlərin istirahətinin təşkili üçün hər cür şəraiti olan restoranlar da yaradılıb. Ümumiyyətlə, bu nəhəng istirahət məkanı ilin bütün fəsillərində turistlərə kanat gəzintisinə, qış mövsümündə xizəklə sürüşməyə, xizəkçilik məktəbindən, hotel və digər xidmətlərdən istifadə etməyə imkanlar verir.

Kompleksin əhəmiyyətini artıran mühüm amillərdən biri də burada turistlərin trassa sistemini özlərinə uyğun seçmək imkanlarının olmasıdır. Hər bir qonaq enmə zolağı, maillik və çətinlik dərəcəsinə görə trassa seçə bilər. Bütün dağ-xizək trassası süni qar yaratma generasiya sistemi ilə təchiz edilib. Bütünlükdə “Tufan” Dağ-Xizək Yay-Qış İstirahət Kompleksi gün ərzində üç min nəfərə xidmət göstərmək imkanına malikdir.

Hədəf turistlərin təhlükəsizliyini təmin etməkdir

Bu layihənin reallaşdırılması, ümumiyyətlə, respublikada dağ-xizək idmanı və digər qış idman növlərinin inkişafı üçün də hərtərəfli imkanlar açır. Layihənin mövcudluğu gələcəkdə qış idman növlərində idmançılarımızın yetişməsində əvəzsiz rol oynayacaq.

Devizi “Bizdən inciməsin bir əziz qonaq” və “Bizim hədəfimiz sizin təhlükəsizliyinizdir” olan kompleksin “Riverside” kanat xəttinin aşağı stansiyasını kompleksin girişi də adlandırmaq olar. Burada turistlərin istirahəti üçün hər cür şərait yaradılıb. Xizəklərin satışı və kirayəsi xidmətlərini göstərən ayrıca bölmə qurulub. Bundan əlavə, ərazidə idman malları mağazası və kafe də fəaliyyət göstərir.

Birinci mərhələ 4 kanat xəttindən ibarət olmaqla, kanatların ümumi uzunluğu 6 kilometrə yaxındır. 10 xizək yolunun uzunluğu isə 17 kilometrdən çoxdur. İkinci mərhələdə isə burada daha 3 kanat xətti və 8 xizək yolunun açılması nəzərdə tutulur.

Qəbələyə uzaq Zelandiyadan da gəlirlər

Direktorun sözlərinə görə, artıq bu məkan təkcə yerli respublikamızı deyil, həmçinin yaxın və uzaq ölkələri təmsil edən minlərlə xarici turistin sevimli əyləncə mərkəzinə çevrilib. Onların arasında Türkiyə, İran, Rusiya, Ukrayna, Birləşmiş Ərəb Əmirlikləri, Argentina, Kanada, hətta Yeni Zelandiyadan gələn insanları müşahidə etmək mümkündür.

Kompleksə marağın ölçüsünü müəyyənləşdirmək üçün statistik rəqəmlərə nəzər yetirmək kifayətdir. Belə ki, fəaliyyət göstərdiyi iki il ərzində bura gələn insanların ümumi sayı 274 min 551 nəfər təşkil edib. Onlardan da 271 min 87 nəfəri ödənişli, 3464 nəfəri müəyyən imtiyazlara malik insanlar olublar. 2016-cı ilin əvvəlindən isə kompleksə təxminən 8 mindən çox turist gəlib.

Ə.Nəbiyev bildirdi ki, keçən il Qəbələ rayonu üzrə min nəfərdən çox şagirdin kompleksin xidmətlərindən ödənişsiz istifadə etmələrinə şərait yaradılıb. Bu mövsümdə də təxminən həmin sayda şagird istər kanat gəzintisinə çıxmaq, istərsə də xizəklə sürüşmək imkanı qazanacaqdır.

Durucanın yeri başqadır

Kanatla hərəkət edərkən yolun 3-cü xəttinin alt hissəsində olan Duruca kəndinin mənzərəsi insana tam fərqli zövq verir. Kənd uzun illər əvvəl burada yurd yeri olaraq salınıb. Ərazinin üç tərəfdən dağlarla əhatə olunması heyvandarlıq üçün stimulverici rol oynayıb. Dağın ətəyində, sərt təbiətin ağuşunda özünə yurd salan bu məkanın sahibləri isə əvvəllər əsasən isti iqlim qurşağına malik qonşu Ağdaş rayonundan olublar. Onlar isti yay günlərində mal-davarlarını bura gətirərək təxminən may ayından sentyabrın ortalarına qədər burada qalar, havalar soyuyub yağışlı mövsüm başlayanda isə yenidən köçlərini qışlağa sürərmişlər.

İndi isə Duruca təkcə durucalıların deyil, bu kompleksi ziyarət etməyə gələn hər kəsin doğma məkanı, sevimli istirahət yeridir. Yayın istisindən canını götürüb bu yerlərə bir günlük olsa belə üz tutan insanlar kanat gəzintisi zamanı elə yolüstü Durucaya da baş çəkirlər. İnsanlar tarixin yaddaşını özündə qoruyub saxlayan bu kənddə olduqları müddətdə həyatdan zövq alır, rahatlıq tapırlar.

“Hörümçəksürənlər” insanlara xidmətdən məmnundurlar

“Tufan” Dağ-Xizək Yay-Qış İstirahət Kompleksindən bəhs edərkən buradakı rahatlığın, səliqə-sahmanın yaradılmasında xüsusi rolu olan 3 nəfər gəncin (təbii ki, burada əmək verən hər kəsə minnətdarlıq düşür) adını çəkməmək olmur. Kompleksdə çalışanlardan təxminən 90-95 faizinin Qəbələ sakini olmalarını nəzərə almış olsaq, həmin gənclər qeyri qəbələli olan 5-10 faizi təmsil edənlərdir. Elxan Bədəlovla Ülvi Nağıyev əslən Ordubad rayonunun Düylün kəndindən, Bəxtiyar Səfərəliyev isə Qubanın Təngaltı kəndindəndir. Onlar kompleks istifadəyə verilən vaxtdan burada çalışırlar. Xizək yolları məhz onların fədakarlığı və həyatlarını riskə qoymaları sayəsində sürüşmək üçün hazır vəziyyətə gətirilir. Hazırda həmin zolaqlardan insanların rahatlıqla istifadə etmələri üçün onlar səylərini əsirgəmirlər. Bu gənclərin əsas keyfiyyətləri bir tərəfdən cəsarətli olmalarıdırsa, digər tərəfdən də dünya üzrə az sayda insanın sürə bildiyi İsveçrə istehsalı olan “Spaider” (“Hörümçək”) markalı “Menzumak” texnikasını dəniz səviyyəsindən 1920 metr hündürlükdə düzgün idarə edə bilmələridir. Xizək yolunun hazırlıq vəziyyətinə gətirilməsində xüsusi “Snotrak” maşınını da onlar idarə edirlər. Ən yüksək və təhlükəli ərazilərdə texnikanın idarə edilməsindən zövq alırlar. Özü də iş saatının gecə saat 24 radələrindən təxminən səhər saat 7-yə qədər davam etməsini (kompleksin xidmətindən istifadə edənlərin geri qayıtdığı və yeni gələnlərin hazırlıq mərhələsində olduqları zaman) nəzərə alsaq, o zaman onların nə qədər fədəkar olmaları bir daha aydınlaşar.

Ülvi Nağıyev deyir ki, həqiqətən də olduqca təhlükəli və riskli bir işin qulpundan yapışıblar. Çoxları bu işin mahiyyətini dərk etməsələr belə, onlar nə etdiklərini yaxşı dərk edir və bundan da məmnundurlar. Ən maraqlısı isə dünyada az sayda insanın bacardığı işin öhdəsindən gələ bilmələri, həmçinin son nəticədə insanların rahatlığına xidmət etmələridir.

Biz də bu məkandan böyük coşqu və rəğbət hissi ilə ayrılırıq. Kompleksə yeni gələn insanlara isə xoş və mənalı istirahət arzu edirik.

Əli SƏLİMOV,

Azərbaycan. - 2016.- 26 yanvar.- S.6.