Nərgiz PAŞAYEVA: “Belə cəmiyyətin varlığı ölkələr və insanlar arasında əlaqələri möhkəmləndirir, daha sağlam, daha davamlı edir”

İngiltərə-Azərbaycan Cəmiyyətinin Londonda ənənəvi illik yığıncağı keçirilib

Londonda Böyük Britaniya parlamentinin ictimai-siyasi dinləmələr məkanı olan məşhur “Ettli” zalında İngiltərə-Azərbaycan Cəmiyyətinin ənənəvi illik yığıncağı keçirilib. Qeyd edək ki, bu zalda vaxtaşırı Birləşmiş Krallığın daxili və xarici siyasətində mühüm əhəmiyyət kəsb edən müxtəlif məsələlər müzakirə edilir. Onu da deyək ki, bu zaldan istifadə hüququ inzibati qaydada yalnız parlamentin Nümayəndələr Palatasının üzvlərinə məxsusdur.

Tədbirdə İngiltərə-Azərbaycan Cəmiyyətinin Azərbaycan tərəfdən həmsədri professor Nərgiz Paşayeva, cəmiyyətin Böyük Britaniya tərəfdən həmsədri, parlamentin Lordlar Palatasının üzvü Lord German, qurumun İcraiyyə Komitəsinin üzvləri, Böyük Britaniya parlamentinin üzvləri, Londonda akkreditə olunmuş diplomatik korpusun əməkdaşları, Azərbaycan diasporunun təmsilçiləri, yerli və xarici iş adamları, ictimaiyyətin və KİV-nin nümayəndələri iştirak ediblər.

Tədbir zamanı cari ildə cəmiyyətin idarə heyətinin tərkibinin müəyyən edilməsi üçün namizədlər səs verməyə təqdim olunub. Səsvermənin nəticəsinə əsasən, İngiltərə-Azərbaycan Cəmiyyətinin Azərbaycan tərəfdən həmsədri professor Nərgiz Paşayeva, Britaniya tərəfdən həmsədri isə Lord German bu vəzifəyə yenidən seçiliblər. Sonra İcraiyyə Komitəsinin tərkibi təsdiq olunaraq onun üzvlüyünə beynəlxalq səviyyədə tanınmış 3 nəfər nüfuzlu iş adamının namizədliyi əlavə olunub. Komitəyə yeni seçilmiş şəxslər nüfuzlu beynəlxalq şirkət olan “KCA Deutag”ın təmsilçisi, neft və qaz sənayesində 20 illik təcrübəsi olan Rodriqo Rendon, “ITE Group plc” şirkətinin regional sənaye üzrə direktoru Daril Pousi, habelə Qafqaz və Mərkəzi Asiya üzrə nüfuzlu beynəlxalq konsaltinq şirkətinin baş eksperti, təcrübəli iş adamı Deyvid Skillzdir.

İllik yığıncağı açan cəmiyyətin Britaniya tərəfdən həmsədri Lord German qurumun ötən il ərzindəki fəaliyyəti barədə ətraflı məlumat verib. İngiltərə-Azərbaycan Cəmiyyətinin fəaliyyətində əməyi olanlara minnətdarlığını bildirən Lord German hesabat ili ərzində cəmiyyət tərəfindən nəzərdə tutulan bütün layihələrin müvəffəqiyyətlə həyata keçirilməsindən danışıb. O, Böyük Britaniya ilə Azərbaycan arasında mədəni, humanitar və təhsil əlaqələrinin genişləndirilməsi istiqamətində səylərini əsirgəməyəcəyini bildirib və Azərbaycana maraq göstərən britaniyalıları cəmiyyətin fəaliyyəti ilə tanış edib. Lord German həmsədr kimi Nərgiz xanımla işləməkdən şərəf və məmnunluq duyduğunu bildirərək qazanılan nailiyyətləri və cəmiyyətin danılmaz nüfuzunu əsas amil kimi qeyd edib.

Sonra söz cəmiyyətin Azərbaycan tərəfdən həmsədri professor Nərgiz Paşayevaya verildi. Tədbir iştirakçılarını salamlayan N.Paşayeva cəmiyyətin fəaliyyətinə töhfə verən və onun işinə kömək göstərən hər kəsə minnətdarlığını bildirdi. Nərgiz Paşayeva İngiltərə-Azərbaycan Cəmiyyətinin ötən dövr ərzində əldə etdiyi zəngin təcrübəni qeyd edərək, 2015-ci ildə bu qurumun mədəniyyət, təhsil və xeyriyyə sahələrində bir sıra vacib layihələrə start verdiyini və bu layihələrin uğurla həyata keçirilməsindən məmnun olduğunu ifadə etdi. Professor Nərgiz Paşayeva dedi: “Belə cəmiyyətin varlığı ölkələr və insanlar arasında əlaqələri möhkəmləndirir, daha sağlam, daha davamlı edir. İngiltərə-Azərbaycan Cəmiyyətinin yaranma tarixi 1997-ci ildən başlayır və gördüyünüz kimi, müəyyən mənada müstəqil Azərbaycanın yaşından bir az cavandır. İngiltərə müxtəlifliyi özündə ehtiva etməyi bacaran və tolerantlığı sözdə deyil, əməldə nümayiş etdirən və təsdiq edən böyük dövlətdir. Bir vətəndaş kimi mənim arzum budur ki, əlaqələrimiz möhkəmlənsin, vətəndaş cəmiyyətlərimiz daha sıx birləşə bilsin, bir-birini anlamağı bacarsın və Azərbaycan müstəqilliyini əbədi saxlasın. Azərbaycan nə deməkdir? Bu, böyük sualdır. Belə böyük sualın doğru cavabının kiçik hissəsini belə əks etdirə biliriksə, özümüzü xoşbəxt sanırıq. Dünyada 50 milyona yaxın adamın danışdığı ana dilimizin bu gecə burada səslənməsi də təkcə simvolik xarakter daşımasın, mədəni simamızı, tarixi zənginliyimizi və milli potensialımızı gələcəkdə təbliğ etməyə yönəlsin”.

Tədbir çərçivəsində təşkil edilən mədəni proqramda Azərbaycan əsilli Britaniya vətəndaşları tarzən Babək Atəş, kaman ustası Aidə Məmmədova və istedadlı gənc pop müğənnisi Elyar Foksun ifasında milli musiqimiz və Avropa musiqi mədəniyyətindən nümunələr səsləndi.

Bununla da İngiltərə-Azərbaycan Cəmiyyətinin illik yığıncağına yekun vuruldu.

Orxan İSMAYILOV,

AZƏRTAC-ın xüsusi müxbiri

London

Azərbaycan. - 2016.- 30 yanvar.- S. 8.