Aprel döyüşləri Azərbaycan dövlətinin,
xalqının və ordusunun şanlı tarixi qələbəsidir
Bir il öncə Silahlı Qüvvələrimiz Lələtəpədə
Azərbaycan bayrağını dalğalandırdılar
İLHAM ƏLİYEVİN APREL ZƏFƏRİNİN
YARATDIĞI DƏYİŞİKLİKLƏR
Azərbaycanın hərb tarixinə düşən aprel zəfərindən bir il ötür.
Uğur, ziddiyyət və təzadlarla dolu il.
Bu bir ildə cərəyan edən hadisələr dördgünlük müharibə nəticəsində baş verən dəyişiklikləri obyektiv qiymətləndirmək üçün kifayət qədər faktlar verir.
Əslində aprel zəfərinin əhəmiyyətini lazımınca dəyərləndirmək üçün həmin müharibəyədək mövcud vəziyyət və ondan sonrakı dəyişikliklər əlaqəli şəkildə təhlil edilməlidir.
Gəlin öncə baxaq görək Ermənistan-Azərbaycan, Dağlıq Qarabağ münaqişəsinin ötən 30 ilə yaxın dövründə qarşı-qarşıya duran tərəflər əvvəllər müharibəyə və müharibədəki mövqelərinə, hərbi, siyasi və diplomatik sahədəki imkanlarına və güclərinə münasibətdə hansı vəziyyətdə idilər və sonralar nə kimi dəyişikliklər baş verib.
Əvvəlcə “status-kvo”ya, tərəflərin, habelə beynəlxalq qurum və təşkilatların yaranmış situasiyaya hansı aspektdən yanaşdıqlarına qısaca nəzər salaq.
1988-ci ilin fevral ayının 22-də Ermənistan-Azərbaycan, Dağlıq Qarabağ münaqişəsi zəminində ilk qanlı toqquşma baş verdi, iki ağdamlı gəncin - Bəxtiyar və Əlinin öldürülməsi ilə Qarabağ müharibəsi başlandı.
* Ermənistan tərəfi buna uzun illər boyu hazırlaşmış, xain Qorbaçovu öz məqsədlərinə çatmaq yolunda satın almış, gizli yolla silah-sursat da tədarük etmişdi.
* Ulu öndər Heydər Əliyevin Siyasi Bürodan uzaqlaşdırılması nəticəsində isə Azərbaycan xalqı həqiqi rəhbərindən ayrı düşmüş, hələ yaşamaqda olan Sovet İttifaqında güclü dəstəyini itirmişdi. Üstəlik həmin dövrdə ölkəyə maymaq, qətiyyətsiz, Moskvaya kölə sədaqəti göstərən insanlar başçılıq edirdilər və hakimiyyət uğrunda aramsız mübarizə dövləti xaos və özbaşınalıq bataqlığına salaraq idarəolunmaz vəziyyətə gətirmişdi.
* Havadarlarına arxalanan Ermənistan Azərbaycan ərazilərini kəndbəkənd işğal edir, mərkəz bu işğalçılıq proseslərinə göz yumur (əslində müxtəlif addımlarla, məsələn, “xüsusi idarəetmə komitəsi” yaratmaqla dəstək göstərir), beynəlxalq təşkilatlar isə bəyanatlar verməklə işlərini bitmiş hesab edirdilər. Yalnız 1992-ci ildən sonra işğal faktı ilə bağlı BMT Təhlükəsizlik Şurası 4 qətnamə qəbul etdi, sonra ATƏT-in (o vaxt ATƏM idi) Minsk qrupu yaradılaraq “münaqişənin sülh yolu ilə həlli” məsələsi ona həvalə edildi.
Bundan sonra baş verən proseslərin heç biri Ermənistan-Azərbaycan, Dağlıq Qarabağ münaqişəsinin həllində heç bir əsaslı yeniliyə və dəyişikliyə gətirib çıxarmadı!
Tərəflər görüşdü, danışdı, müxtəlif variantlar söylənildi, vədlər verildi, müzakirələr getdi, sonra ayrıldılar və s.və i.a.
Münaqişənin mövcud olduğu dövrdə beynəlxalq təşkilatların problemin həllinə münasibətində heç bir yenilik görünməsə də, Ermənistanın və Azərbaycanın bir dövlət olaraq durumlarında ciddi dəyişikliklər baş vermişdi.
Baş verən həmin dəyişikliyi yığcam ifadə etsək, belə demək olar: Azərbaycan məğlub durumdan qalib mövqeyə yüksəlmiş, qalib Ermənistan isə acınacaqlı günə düşmüşdür!
APRELDƏN ƏVVƏLKİ AZƏRBAYCAN
Dəyişikliklərin təməli ulu öndər Heydər Əliyevin xalqın arzu və tələbi ilə yenidən ölkə rəhbərliyinə qayıdışı ilə qoyulmuşdu.
Onlar hansılardır:
* İlk olaraq Azərbaycanda möhkəm və dönməz sabitlik yaradıldı, qanunsuz silahlı dəstələr ləğv edildi, əhalidəki külli miqdarda silah-sursat toplanıldı, beləliklə, görüləcək sonrakı işlərə şərait yaradıldı;
* Uğurlu Horadiz əməliyyatı aparılaraq 1994-cü ilin yanvar ayında ilk dəfə düşmənin işğal etdiyi 22 yaşayış məntəqəsi geri alındı;
* Cəbhə bölgəsində uzunmüddətli atəşkəsə nail olundu, yeni ərazilərin işğalının qarşısı alındı;
* Ölkə ətrafında yaradılmış informasiya blokadası aradan qaldırıldı, Ermənistan-Azərbaycan, Dağlıq Qarabağ münaqişəsi barədə əsl həqiqətlər dünya ictimaiyyətinə çatdırıldı;
* “Əsrin müqaviləsi” neft kontraktı imzalandı, dünyanın aparıcı dövlətlərinin maraqları ilə Azərbaycanın maraqları uzlaşdırıldı;
* Ölkəmizin dünyaya inteqrasiyası prosesi başlandı, Azərbaycan beynəlxalq təşkilatlarla sistemli və məqsədyönlü əməkdaşlığa start verdi, Avropa Şurasına üzv qəbul edildi;
* Ordu quruculuğu prosesinə, hərbi kadr hazırlığı işlərinə başlanıldı;
* Ermənistan-Azərbaycan, Dağlıq Qarabağ münaqişəsinin ölkəmizin ərazi bütövlüyü prinsipi əsasında, sülh yolu ilə həllinə sadiq olan Azərbaycan “ərazi bütövlüyü məsələsinin heç zaman müzakirə mövzusu” olmayacağı və “öz ərazisində ikinci erməni dövləti yaradılmasına icazə verməyəcəyi” fikrinə daim sadiq qalacağını qətiyyətlə bildirdi və buna daim əməl etdi;
* Ən nəhayət, dövlət başçısı cənab İlham Əliyev güzəştin mümkün və son həddini də göstərdi: Kompromis olaraq “Dağlıq Qarabağa yalnız “muxtar respublika” statusu verilə bilər!
APRELDƏN ƏVVƏLKİ ERMƏNİSTAN
Azərbaycan torpaqlarının işğalına Ermənistan uzun müddət hazırlaşmışdı. Bu işə təkcə M.Qorbaçov və keçmiş SSRİ-nin rəhbərliyi deyil, həm də dünyanın müxtəlif ölkələrindəki erməni diasporu, ABŞ-dakı erməni lobbisi (“Azadlığı Müdafiə Aktı”na 907-ci ədalətsiz düzəlişi yada salaq), habelə ermənipərəst qüvvələr dəstək verirdi. Spitak zəlzələsindən istifadə edən ermənilər özlərini yenidən dünyaya “məzlum və zavallı millət”, “köməyə ehtiyacı olan xalq” kimi təqdim etdilər. Həmin dövrdə dünyaya yalnız SSRİ-nin informasiya agentlikləri və KİV-i vasitəsilə çıxmaq mümkün idi. Həmin informasiya resursları isə birmənalı şəkildə erməniləri müdafiə mövqeyi tutur, Azərbaycan tərəfini isə “vəhşi”, “zalım və qaniçən millət” qiyafəsində təsvir edirdi.
Necə deyərlər, yanan da biz
idik, yaman da!
Müharibənin
başlanğıcında hərbi, iqtisadi, siyasi, ideoloji
üstünlük ermənilər tərəfində
olduğundan, Azərbaycanın isə başı hakimiyyət
uğrunda mübarizəyə qarışdığından
sovet ordusuna arxalanan Ermənistan ərazimizin 20 faizini ələ
keçirərək 20 min vətən övladını
şəhid etdi, bir milyondan çox azərbaycanlını isə
qaçqın və məcburi köçkün vəziyyətinə
saldı.
***
* Müharibənin birinci mərhələsi
başa çatanda - atəşkəs müqaviləsi
imzalananda Ermənistan özünü qalib sayır, hətta
Kür çayına qədər olan əraziləri
işğal etmək gücündə olduğunu söyləyərək
lovğalanırdı;
* Sonrakı dövr
danışıqlarına üstün, öz iradəsini diktə
etdirmək istəyən tərəf kimi gəlirdi;
* Dağlıq Qarabağa müstəqillik
tələb edərək sonra onu Ermənistana birləşdirəcəyini,
ərazi ilhaqı niyyətini gizlətmirdi;
* Bütün parametrlər üzrə
Azərbaycandan üstün olduğundan müharibənin yenidən
başlayacağı təqdirdə yeni ərazilər
işğal edəcəyi ilə hədələyirdi;
* İki dəfə Rusiya onlara
havayı olaraq bir milyard dollar həcmində silah-sursat verdiyindən
hərbi cəhətdən özlərini Azərbaycandan tam
üstün hesab edirdilər;
* Ermənistan rəhbərliyi öz
gücünə o qədər inanırdı ki, hətta
iqtisadi, siyasi və idarəetmə sahəsindəki
uğursuzluqlarını hərbi ritorika ilə pərdələməyə
çalışırdı;
* Kriminal rəhbərlik erməni
xalqının beyninə yeritmişdi ki, “Qarabağ artıq
bizimdir, qalan məsələləri isə zaman özü həll
edəcəkdir”;
* “Alınmaz səngərlər”,
“keçilməz sədlər” mifi ilə özlərini və
xalqı inandırmışdılar ki, Azərbaycan hərbçiləri
hücum etsələr belə, yeni istehkamları yarıb
keçə bilməyəcəklər;
* KTMT-yə güvənərək
dar gündə onun Ermənistanın müdafiəçisi
qismində çıxış edəcəyini güman
edirdilər;
* ATƏT-in Minsk qrupu həmsədrlərinin
və onlara havadarlıq edənlərin “Dağlıq
Qarabağ problemi yalnız sülh yolu ilə həll edilməlidir”
tezisini əsas tutaraq Azərbaycanın törədilən təxribatlara
hərbi yolla cavab verəcəyinə heç bir halda
inanmırdılar!
DÖRDGÜNLÜK
APREL MÜHARİBƏSİNDƏ NƏ BAŞ VERDİ
Hər dəfə cənab
İlham Əliyev xarici səfərdə olanda və ya
ATƏT-in Minsk qrupu çərçivəsində
münaqişə edən tərəflər bir masa ətrafında
oturmazdan əvvəl Ermənistan bir hoqqa çıxararaq
danışıqlardan yayınırdı. Onun
başını sığalladıqlarından Sarkisyan bu
“taktikasından” əl çəkmirdi. Ötən
ilin mart ayının axırlarında Ermənistan yenə
öz manerasına sadiqliyini göstərdi. Hətta bir qədər
də qudurğanlıq göstərərək Ağdam - Tərtər
istiqamətində təmas xəttinə yaxın kəndləri
artilleriya və minomyot atəşinə tutaraq dinc əhaliyə
və mülki obyektlərə xeyli ziyan vurdu!
Düşmən yenə cəzasız
qalacağına əmin idi...
Aprel ayının
başlanğıcında Azərbaycan tərəfindən
başqa heç kəsin gözləmədiyi bir hadisə
baş verdi: Milli Ordumuz əks-zərbə
ilə ildırım sürətli elə bir hərbi əməliyyat
keçirdi ki, başda ermənilər olaraq hamı
çaş-baş qaldı! Sonralar
döyüşün iştirakçıları olan erməni
hərbçilər öz internet saytlarından etiraf edirdilər
ki, əks-həmlə atəşi başlayandan qurtaranadək
girdikləri səngərlərdən çıxa bilməyiblər.
Şok vəziyyətinə düşüblər,
sağ qalmalarını isə möcüzə sayırlar.
Nə Azərbaycan Ordusunun müxtəlif təyinatlı silahlarından
açılan belə güclü, intensiv və uzunmüddətli
atəşini gözləyirmişlər, nə də bizim hərbçilərin
uzun illər boyu hazırlanaraq “ən müasir üsullarla”
möhkəmləndirilən müdafiə istehkamlarını
belə asanlıqla dəf edəcəklərini güman
edirmişlər.
Aprel müharibəsinin vahiməsi bu
gün də düşmənin canından
çıxmayıb!
Şokdan ayılaraq özlərinə
gələn qoca erməni “döyüşçüləri”
- torpaqların işğalında iştirak edən
(“torpaqları işğal edən” demirik) keçmiş erməni
hərbçiləri cavanları qorxaqlıqda qınayaraq
özləri cəbhəyə yollanıb torpaqları geri
qaytaracaqlarını (aprel əməliyyatı zamanı geri
alınan torpaqları-red.) bəyan etdilər. Lakin “qoca
döyüşçü veteranlar”ın bu istəyi fiaskoya
uğradı.
Onlar təmas xəttinə
çatmamış Azərbaycan Ordusunun yeni silahlarının
“dadına” baxası oldular!
Həyat şəraiti pisləşdiyindən
Ermənistanda və Dağlıq Qarabağda yaşayan erməni
əhalisi (adıçəkilən yerlərdə digər
millətlərin nümayəndələri yaşamır)
arasında demoqrafik göstəricilər xeyli aşağı
düşüb. Əhalinin ölkəni birdəfəlik tərketmə
prosesi də ilbəil sürətlənir. Xüsusən, erməni ailələri oğlan
övladları orta məktəbin IX sinfinə çatanda
onları hərbi xidmətdən yayındırmaq
üçün ölkədən çıxarırlar.
Bütün bunlar Ermənistan ordusunun canlı
heyətlə təmin edilməsində böyük çətinliklər
yaradır. Problemin həlli
üçün başlıca diqqət kənardan muzdlu hərbçilərin
gətirilməsinə yönəldilmişdi. Düşmən tərəfi muzdluların daha
çox “fayda verəcəyini” söyləyirdilər. Lakin qısamüddətli aprel müharibəsi bu
xülyanı da boşa çıxardı. Səngərləri tərk edib ilk qaçanlar elə
həmin muzdlular oldu. Çünki
müharibəyə pul qazanmaq üçün gələn
muzdlular özgə torpağını işğalda saxlamaq
yolunda ölmək niyyətində olmadıqlarını
göstərdilər.
Artıq Ermənistan ordusuna
xaricdən muzdlu hərbçi cəlbində də ciddi
problemlər yaşanmağa başlayıb. Əvvəla,
muzdlular daha bura gəlməyə həvəsli deyillər,
ikincisi isə onların pullarının ödənməsində
ciddi çətinliklər yaşanır. Aprel
savaşından sonra muzdlular Azərbaycan torpağında
qazancdan çox ölüm olduğunun da fərqindədirlər!
***
İndiyədək 20 mindən
çox şəhid verən Azərbaycan xalqı aprel
döyüşü qəhrəmanlarına münasibətində
torpaq uğrunda yeni qurbanlara hazır olduğunu da
nümayiş etdirdi. Xalq öz şəhid
övladlarını xüsusi hörmət və ehtiramla dəfn
etdi. Gənclərin vətənpərvərlik
coşqusunun yeni mərhələyə yüksəlməsi
xüsusi diqqətçəkən məqamdır. Azərbaycan
bayrağını başları üzərində
dalğalandıran gənclər “Şəhidlər ölməz,
Vətən bölünməz”, “Ağlama, ay ana, biz
hamımız şəhidik!”, “Təki Vətən sağ
olsun,” - deyə hayqıraraq çoxsaylı yürüşlər
keçirdilər. Səfərbərlik və Hərbi Xidmətə
Çağırış üzrə Dövlət Xidmətinin
yerlərdəki nümayəndəliyinə gələrək
hərbi əməliyyatlarda iştirak etmək
üçün müraciət edənlərin
sayı-hesabı bilinmirdi...
Aprel müharibəsi həm də onu
göstərdi ki, Azərbaycan vətəndaşında, o
cümlədən əsgər və zabitində Vətən
eşqi, torpaq həsrəti o qədər artıb və
güclənib ki, artıq hərbi əməliyyatların hər
bir iştirakçısı qarşısıalınmaz
qüvvəyə çevrilib!
Ən nəhayət, aprel
döyüşləri və orada işlədilən silahlar
sübut etdi ki, Azərbaycan nəinki müharibəyə tam
hazırdır, hətta onu qısa vaxtda qalibiyyətlə
başa çatdırmaq imkanındadır!
APRELDƏN SONRAKI
AZƏRBAYCAN
Aprel müharibəsi həm Ermənistan-Azərbaycan,
Dağlıq Qarabağ münaqişəsində indiyədək
yaranmış vəziyyəti ərazi baxımından qismən
dəyişdi, həm qüvvələr nisbətində
baş vermiş ciddi dəyişiklikləri nümayiş
etdirdi, həm də çox ciddi psixoloji dönüşə
səbəb oldu!
Cəmi dörd gün çəkən
aprel müharibəsi göstərdi ki, Azərbaycan iqtisadi,
siyasi, mənəvi-psixoloji və hərbi cəhətdən
düşməndən qat-qat güclü və üstün
mövqedədir!
Qarabağ müharibəsinin
başlanğıcındakı “Güclü Ermənistan - zəif
Azərbaycan” gerçəkliyini “Qüdrətli Azərbaycan,
iflasa uğramış Ermənistan” reallığı əvəz
edib və bu dönüşün qarşısını
artıq heç nə ilə almaq mümkün deyil!
Dördgünlük müharibə nəticəsində
Ermənistan-Azərbaycan, Dağlıq Qarabağ
münaqişəsinin həllində yeni keyfiyyət mərhələsinə
keçid baş verdi!
Bu özünü hansı məqamlarda
göstərir:
Əvvəla, Azərbaycan əsgər
və zabitlərinin timsalında Milli Ordumuz əmin oldu ki,
artıq düşməndən bütün parametrlər
üzrə qat-qat güclüdürlər və
arsenallarındakı silahlarla qısa müddətdə
torpaqları işğalçılardan təmizləmək
qüdrətindədirlər.
İkinci, atəşkəs çox
kövrəkdir və hər an
genişmiqyaslı müharibəyə çevrilə bilər.
Odur ki, buna daim hazır olmaq lazımdır.
Üçüncüsü,
Azərbaycan Ordusu dəqiq müşahidə-nəzarət və
kəşfiyyat məlumatlarına malik olduğundan, habelə
müasir silahlara yiyələndiyindən hərbi əməliyyatlara
başlanan kimi Ermənistan ordusunun komanda-idarəetmə mərkəzlərini
dağıtmaqla onu iflic və idarəolunmaz vəziyyətinə
salmaq imkanındadır.
Dördüncüsü, atəşkəs
dövründə ordumuz nəinki ən müasir və yeni
texnologiyalara əsaslanan silahlarla təmin edilmiş, eyni zamanda
Müdafiə Sənayesi Kompleksi yaratmaqla minədək adda
silah-sursat və yeni texnika istehsalına
başlanılmışdır.
Beşincisi, Rusiya, Türkiyə,
Ukrayna, Belarus, İsrail, Pakistan kimi dövlətlərdən
sistemli şəkildə yeni silahlar alan Azərbaycan
Ermənistanı hərbi cəhətdən iyirmi dəfədən
çox üstələməklə yanaşı onu
“silahlanma yarışına” vadar etməklə iqtisadi və hərbi-mənəvi
cəhətdən iflasını da sürətləndirir.
Ən nəhayət, artıq
seçim Ermənistanındır: torpaqları ya sülh yolu
ilə geri qaytarmalıdır, ya da ki, nəticəsi hamıya
gün kimi aydın olan müharibə variantına getməlidir!
APRELDƏN SONRAKI
ERMƏNİSTAN
Bir il əvvəl
baş verən qısamüddətli müharibə Ermənistan
dövlətində və cəmiyyətində baş verən
bütün mənfi proseslərin katalizatoruna çevrildi.
İndiyədək satellat dövlətdəki iqtisadi-siyasi, mənəvi
böhranın dərinləşdiyi, bu forpost ölkənin və
onun kriminal başçılarının öz
düşüncəsiz siyasət və addımlarının
girovuna çevrildiyi, dalandan çıxış yolunun
yalnız Azərbaycanla sülh bağlaşmasından
keçdiyini söyləyənlərin haqlı olduğu
açıq-aşkar göründü!
Onlar hansılardır:
* Böhran səbəbindən
Rusiyadan gələn pullar xeyli azalmış, korrupsioner
Sarkisyan rejimindən üz çevirən erməni diasporu ianələri
dayandırmışdır;
* Dilənçi vəziyyətinə
düşən və müharibənin xofundan qorxan erməni əhalisi
təkcə Dağlıq Qarabağı deyil, Ermənistanı
da sürətlə tərk edir;
* Aprelə qədər Azərbaycandan
əvvəlcə hər barədə üstün olan, daha
sonralar isə özünü üstün sayan Ermənistan
dördgünlük müharibə nəticəsində tamamilə
zəiflədiyini və bütün parametrlər üzrə
geri qaldığını etiraf etməli oldu;
* Müharibə erməni cəmiyyətini
parçaladı, artıq qələbə eyforiyasından
ayılanlar həqiqəti dərk edərək Azərbaycan
torpaqlarını geri qaytarmaq zorunda olduqlarını
anladılar!
* Apreldən sonra yaxın ətrafı
Serj Sarkisyanı tərk etməyə
başladığından, hətta əksəriyyətinin
keçmiş dostluğu unudaraq ona qarşı
çıxdığından və rəqibinə
çevrildiyindən Ermənistan prezidentinin aqibəti faciəli
görünür!
APREL
MÜHARİBƏSİNİN AÇDIĞI YOL
Aprel müharibəsi qısa çəkməsinə,
döyüşlər nəticəsində geri qaytarılan
torpaqların bir o qədər də çox olmasına baxmayaraq , əslində yeni və geniş bir yol
açmış oldu!
Bu yol geriyə qayıdış
yoludur!
Bu yol Böyük
Qayıdışın başlanğıcıdır!
Bu yol münaqişədə keyfiyyət
dəyişikliyinin baş verməsinin göstəricisidir!
Həmin yol dövlət
başçısı cənab İlham Əliyevin 24 yanvar
2017-ci il tarixli sərəncamı ilə
açılıb!
Ermənistan-Azərbaycan,
Dağlıq Qarabağ münaqişəsi dövründə
ilk dəfədir ki, Azərbaycan öz torpaqlarını azad
edərək geriyə qayıdır və məskunlaşma
prosesinə start verir!
Bəli, Azərbaycan ona uğur gətirən
strategiyaya - əsası ulu öndər Heydər Əliyev tərəfindən
qoyulan və bu gün möhtərəm İlham Əliyev tərəfindən
uğur və ləyaqətlə davam etdirilən kursa sadiqdir:
Dayanmadan iqtisadi və hərbi cəhətdən
güclənir, siyasi və diplomatik sahədə inad və qətiyyətlə
uğurlu fəaliyyət göstərir, beynəlxalq
nüfuzunu daim artırır, işğalçıya
rahatlıq və dinclik vermir!
Cənab İlham Əliyevin səyi
ilə ölkəmizə, regiona və bütövlükdə
dünyaya fayda gətirəcək yeni transmilli layihələr
reallaşdırılır, əməkdaşlığın
yeni formaları yaradılır və inkişaf etdirilir,
İslam ölkələri ilə həmrəylik gücləndirilir,
ordumuz ən müasir silahlarla sistemli şəkildə təchiz
olunur!
Ermənistan prezidenti Serj Sarkisyan
başı hayındadır! Bilmir ki, ölkə daxilində
günü-gündən artan narazılığın
qarşısını alaraq hakimiyyəti əldə necə
saxlasın, iqtisadi problemləri necə həll etsin, ac-yalavac
və işsiz erməniləri necə sakitləşdirsin,
diasporla yaranmış problemi nə sayaq yoluna qoysun, yaxud yeni
apreldən qorunmaq üçün kimə yalvararaq, kimin ətəyindən
yapışsın!
Əslində keyfiyyət dəyişikliyi
Ermənistan tərəfində də baş verib. Bunun konkret göstəricisi
erməni sosial şəbəkələrində sadə ermənilərin
baş verənlərə və ölkə
başçısına münasibətlərini əks etdirən
və əvvəlkilərdən çox-çox fərqli
statuslarıdır! Belə statuslarda isə Sarkisyan lağa
qoyulur və yeni müharibənin fəsadları irəlicədən
proqnozlaşdırılır!
Düzgün yol isə Azərbaycan tərəfinin
təklif etdiyidir:
Bu yol - sülh yoludur!
Bu yol - özgə torpaqlarını
tərk edərək işğala son qoymaq yoludur!
Bu yol - xalqı dilənçilikdən
və özünün olmayan torpağı saxlamaq uğrunda
ölümdən qurtarmaq yoludur!
Güclənmiş Azərbaycan gəlir!
Yeni aprellər də gələ bilər!
Bəxtiyar SADIQOV
Azərbaycan.- 2017.- 1 aprel.- S. 1, 4.