Ölüm var ki, həyat qədər dəyərli...

Hər ocağın, hər ailənin bir hekayəti olur. Müstəcəbovlar ailəsinin də özünəməxsus hekayəti var. Ələsgər və Şəhla xanımın 3 oğul övladı onlara xoş anlar, xoş günlər yaşadıb. Şad, firavan həyat sürdükləri ərəfədə qəfildən ailənin başçısı Ələsgər həyatdan vaxtsız köçür. Onda Elvinin 13, Röyalın 10, Orxanın 7 yaşı vardı.

Atasız qalan Orxan böyüdükcə həyat yolunun cığırını özü açacağını, qarşılaşacağı çətinlikləri özü dəf edəcəyini dərk etməyə başladı. Özü də orta məktəbdə yaxşı oxuyurdu. Anası Şəhla xanımın arzusu onu müəllim görmək idi. Orxan isə hərbçi olmağı qarşısına məqsəd qoymuşdu.

Orxan Müstəcəbov 2011-ci ildə Səfərbərlik və Hərbi Xidmətə Çağırış üzrə Dövlət Xidmətinin Qobustan rayon bölməsindən hərbi xidmətə yollandı. Hərbi xidmətdə olarkən dəfələrlə komandanlıq tərəfindən fəxri fərman və təşəkkürnamə ilə təltif edildi.

Ötən il aprel ayının 2-də Ermənistan qoşunları təmas xəttində təxribat törədəndə ordumuz nəinki təxribatın qarşısını aldı, hətta daha əlverişli mövqeləri ələ keçirdi. Təbii ki, bu qələbə bizə itkisiz başa gəlmədi. Şəhid olanlar arasında Orxan Müstəcəbov da var idi. Aprelin 5-də şəhid gizirin nəşi rayona, doğulduğu Yekəxana kəndinə gətirildi. Dəfn mərasimində Müdafiə Nazirliyinin, Səfərbərlik və Hərbi Xidmətə Çağırış üzrə Dövlət Xidmətinin nümayəndələri, Qobustan Rayon İcra Hakimiyyətinin, rayon hüquq-mühafizə orqanlarının rəhbərləri, eləcə də kənd sakinləri və rayon ictimaiyyəti də iştirak edirdilər. Mərasimdə “Şəhidlər ölməz, Vətən bölünməz” sədaları səsləndirildi, şəhid zabitimiz yaylım atəşləri altında atasının yanında torpağa tapşırıldı. Şəhidin qardaşı Röyal Müstəcəbov Orxanla qürur duyduğunu bildirərək: “Təki Vətən sağ olsun! Vətən yaşasın!”-dedi.

O vaxtdan bir ilə yaxın vaxt keçib. Rayon icra hakimiyyəti tərəfindən Orxanın məzarüstü abidəsi ucaldılıb. Qəbiristanlığın ərazisində səliqə-sahman yaradılıb. Abadlıq işlərinə qardaşı Elvin, Röyal və bibisi oğlu Səlim xeyli əmək sərf etdilər.

Oxuduğu Yekəxana kənd tam orta məktəbinin qarşısında da Orxanın abidəsi qoyulub, şərəfinə bulaq yaradılıb.

Anası Şəhla Müstəcəbovanın dediklərindən: “Bu il mart ayının 5-də Orxanın 24 yaşı qeyd olundu. Rayon rəhbərliyi başda olmaqla hər kəs burada idi. Tədbir yüksək səviyyədə təşkil edilmişdi, məktəblilərin hazırladıqları kompozisiyalar da çox təsirli idi.”

Orxan hərbi hissədə döyüş sənəti ilə yanaşı, idmanla da məşğul olub. Xidməti nümunəviliyi ilə seçilib. Azərbaycan Respublikası Silahlı Qüvvələrinin 95-ci ildönümü ilə əlaqədar yubiley medalı, ölümündən sonra isə Müdafiə Nazirliyi tərəfindən “Hərbi xidmətdə fərqlənməyə görə” medalı ilə təltif olunub.

Şəhid Orxan Müstəcəbovun xidməti fəaliyyəti ilə yaxından tanış olanda istər-istəməz ölməz şair Hüseyn Cavidin bir misrası yadıma düşdü: “Ölüm var ki həyat qədər dəyərli, Həyat var ki, ölümdən də zəhərli...” Bəli, Orxan vətənpərvərliyi ilə müqəddəs şəhidlik zirvəsinə yüksəldi, insanların qəlbində əbədiyaşarlıq qazandı. Odur ki, indi şəhid Orxan Müstəcəbovun ailəsi, hətta onun boya-başa çatdığı Yekəxana kəndinin sakinləri də bu şərəfli ölümdən qürur duyurlar.

Əli SƏLİMOV,

Azərbaycan.- 2016.- 1 aprel.- S.10.