Heyrət
...Və bu şəkil qarşısında ayaq saxladığım həmin o an!..
...Aman Allah, bu nə şəkildir,
bu nə baxışlardır?!.
Uzun zaman xəyala dalıram...
Foto qəhrəmanımın
dünyaya heyrətlə baxan gözlərinin ifadə
gücündən sehirlənirəm...
...Bu - həyatın bir anı, həm
də bir anın əbədiyyətidir və ağ-qara rəng
çalarlarından Vaxtın, Əbədiyyətin özü
sənə baxır...
Qəlbimdəki sözlər bitib
tükənmir və
adi kəlmələrlə təsviri
mümkünsüz əbədiyyət anı
qarşısında sözün gücsüzlüyünü
də... boynuma alıram...
...Və
bu gözlərə nəzər saldıqca,
düşüncələrimdə qor kimi közərən
cümlələr də yol götürüb gedir...
***
Hə, əzizlərim!..
Bu dünyada bəlkə də
hər şey adicə bir heyrətdən başlanır və
sonra Böyük Heyrətə çevrilir.
İndiki
dünyamızın özü elə bir heyrət hissinin nəticəsi
deyilmi?!
HEYRƏT - təbiətin sirləri haqqında
saysız-hesabsız maraqlarının ardınca düşən
insanın misilsiz ixtiralarına, kəşflərinə
doğru aparan yoldur, zəngin mədəniyyətlərin,
böyük sivilizasiyaların başlanğıc nöqtəsidir.
HEYRƏT - insanın öyrənmək
istəyidir, bilmək ehtiyacıdır, şüurun,
düşüncənin ətraf aləmlə ilk
tanışlıq anıdır.
Ulu öndər Heydər Əliyevin -
öz ömürlüyü ilə böyük bir tarix
yaratmış bu dahi şəxsiyyətin uşaqlıq
dövrünün fotosu yenə gözlərim
qarşısındadır. Onun çöhrəsindəki
ifadə fotoaparata baxan körpələrin heyrətinə bənzəmir
əsla, o, fotoobyektivə yox, bütünlüklə
dünyaya baxır.
Baxın, O, bu təlatümlü,
qarmaqarışıq dünyaya öz heyrətini necə də
gizlədə bilmirdi...
***
Bu şəklin çəkildiyi həmin
an qocaman tarixin hansı vədəsidir
görəsən?!
Düşüncələrimə
güc verib, xatırlamağa çalışıram.
Amma zamanın nə dəxli var ki, əsas
olan bu heyrƏtin varlığıdır...
...Əsr o qədər də
yaxşı başlanmayıb, dünya hələ də
Birinci Dünya müharibəsinin sarsıntıları
içindədir. Üstəlik, yeni təlatümlər
bitib tükənmir və bu təlatümlərin ən sərt
rüzgarları keçmiş imperiyanın ucqarlarında əsir.
Bolşeviklər çar
Nikolayı yenicə taxtdan salıblar, inqilabın
dağıtdıqlarını yenidən qurub-yaratmaq hələ
uzun çəkəcək. İctimai
düşüncə yerlə yeksandır. Adamların bu gündən sabaha ümidi yoxdur.
Vəziyyət o həddə
çatıb ki, keçmiş çar imperiyasının Azərbaycandan
uzaq ayrı-ayrı əyalətlərində adamlar
aclıqdan ölməməyin əlacındadır.
Silahlı erməni
daşnaklarının bir neçə il əvvəlki
fürsətdən yararlanıb Azərbaycanın müxtəlif
bölgələrində soyqırıma məruz
qoyduqları, min bir sitəm etdikləri Azərbaycan ailələrinin
yaraları qaysaq bağlamayıb...
Hələ qabaqda repressiya
dalğası var, bu dalğanın Azərbaycanın ictimai
fikir tarixinə vuracağı dəhşətli zərbələr
var, hələ qabaqda İkinci Dünya müharibəsinin
müdhiş acıları var, bu müharibənin Azərbaycan
ailələrinə yaşadacağı faciələr,
aclıq, mərhumiyyət, min bir əziyyətlər var...
Heydər Əliyevin uşaqlıq
şəklindən heyrətlə baxdığı
dünyanın qurşun kimi ağır havasına
dövrün sərt tufanları qarışıb,
param-parça olmuş insan taleləri uçuşur bu havada,
zaman öz ağırlığı ilə ömürləri,
ümidləri, xoşbəxtlikləri əzib keçir...
Və Heydər Əliyev belə bir
dünyaya heyrətlə baxır, baxırdı...
Bəlkə həyatının ilk
böyük suallarıdır onu heyrətləndirən, kim
bilir, bəlkə o vaxt bu şəkli çəkmiş
üçayaq fotoaparatın alovundan gələcəyə
düşən işıqdır, bu balaca işıqda
gözlərinə görünən böyük missiyadır?!..
Tarixi missiyalar da elə bir
anlıq heyrətdən başlamırmı?!
...Və Heydər Əliyevin
düşüncələrimi ovsunlayan o uşaqlıq fotosunun
sirri yavaş-yavaş açılır deyəsən...
O bu dünyada nələr
gördü və nələri görəcəkdi?!
O, nəyə və niyə heyrət
edirdi, özü nələrlə heyrətləndirəcəkdi?!
Bu tarixi yaradan fotoqraf kimmişsə,
özü də bilmədən, o çöhrədəki
HEYRƏTDƏ böyük bir xalqın tarixini dəyişəcək
aydın, işıqlı yolun şəklini çəkirmiş...
***
Bu yol dünyaya heyrətli
baxışlarla başlanmışdı, böyüyüb
yaşa dolduqca Tanrının Heydər Əliyevin həyatına
və onun şəxsində Azərbaycan tarixinin böyük
bir dönəminə verdiyi heyrətamiz nizamlarla, bəzən
kəskin dönüşlərlə davam etdi.
TALE ona yüksək rəssamlıq
istedadı bəxş etmişdi, üstəlik, orta təhsilinin
son pillələrinə doğru gələcək peşə-sənət
yolunu müəyyən etməyə başlayanda böyük
qardaşı artıq Azərbaycanın yenicə
tanınmağa başlayan gənc rəssamlarından idi. Əgər bu
marağın ardınca getsəydi, şəksiz ki, Heydər
Əliyev də zəmanəsinin adlı-sanlı rəssamlarından
olardı.
TANRI yüksək sənət
talantını da ondan əsirgəməmişdi, yeniyetmə
ikən Naxçıvandakı dram dərnəyinin fəal
üzvü kimi teatr səhnəsindəki uğurlarına təəccübü
gizlədə bilmirdilər.
Naxçıvan Pedaqoji
Texnikumunun tələbəsi edən HƏYAT Heydər
Əliyevin taleyində bu sahəyə doğru bir yol müəyyənləşdirmişdi. O zəka, o məsuliyyət,
məşğul olduğu işə o sevgi ilə Heydər
Əliyev çox uğurlu bir müəllim, yaxud görkəmli
bir Azərbaycan alimi olacaqdı.
Azərbaycan Sənaye
İnstitutunda yiyələnməyə başladığı
memarlıq sənəti də dövrün ən yüksək
perspektivli sənətlərindən sayılırdı. Əgər həyatını
memar kimi davam etdirsəydi, Azərbaycanın ötən əsrdə
yetirdiyi ən məşhur memarların ilk sırasında yəqin
ki, Heydər Əliyevin də adı gələcəkdi, Azərbaycanın
çağdaş memarlıq tarixinin zirvəsində qərar
tutan əsərlər cərgəsində Heydər
Əliyevin ucaltdığı binalar da görünəcəkdi.
Amma yenə HEYRƏT!..
TALE, bu dəfə də,
onun həyat yollarında öz təshihlərini edərək,
Heydər Əliyevi yolların ən çətininə səmtləndirdi. O, gənc çekist kimi
xüsusi xidmət orqanlarında fəaliyyətə
başladı, kiçik bir vəzifə ilə daxil olduğu
bu sistemdə tədricən irəlilədi, çiynindəki
paqonlarda ulduzların sayı artdı və bu ulduzların
parıltısı da böyüdü.
Bu yolda Heydər Əliyevin
uğurları qədər qarşısına çıxan əngəllər
də çox oldu, onun peşəkarlıqdan doğan
imkanlarını, əzmkarlığını, məqsədyönlülüyünü,
liderlik xüsusiyyətlərini gözü götürməyənlər
tapıldı.
Amma qəribədir ki, bu məqamların
hər birində sanki hansısa fövqəl bir qüvvə
Heydər Əliyevi qorudu, onu üzləşdiyi bütün
sınaqlardan daha da güclü çıxardı, tarixin
çox az hallarda yetirdiyi bu işıqlı şəxsiyyəti
Azərbaycan dövlətinin, xalqının gələcəyi
üçün mühafizə etdi.
Bütün bunların
özü də bir insanın ömürlüyündəki
HEYRƏT dolu anlar deyilmi?!
***
Əgər böyük
şəxsiyyətlərdən və onların yerinə
yetirdikləri missiyalardan bəhs ediriksə, gərək
razılaşaq ki, tarixdə bu insanların yerinə
başqasını qoymaq mümkünsüzdür.
Çünki şəxsiyyətləri
yetirən, onların missiyalarını müəyyənləşdirən
zamandır, mühitdir, insanlardan fərqli olaraq bu amilləri dəyişmək,
başqası ilə əvəz etməksə, hətta xəyali
də olsa, alınmaz...
HEYDƏR ƏLİYEV öz
zəmanəsinin yetişdirdiyi böyük dövlət
adamı idi.
Heydər Əliyev fenomeninin
yaranmasından ötrü, Azərbaycanın milli dövlətçilik
tarixində onun dövrü kimi xatırlanan intibah mərhələsinin
başlanmasından ötrü bir neçə vacib istiqamət
heyrətamiz şəkildə üst-üstə
düşürdü.
Sovet dövründə Heydər
Əliyevə qədər Azərbaycana rəhbərlik
etmiş azərbaycanlı rəhbərlərdən heç
birinin siyasi taleyində zaman, şəxsiyyət və
missiyanın bu qədər uzlaşmasını, ahəngini
görə bilməzsən.
Ötən əsrin 60-cı
illərində müharibədən yenicə
çıxmış SSRİ-nin mühüm regionlarından
biri kimi Azərbaycanı, bu respublikanın axsayan iqtisadiyyatını
dirçəltmək lazım gəlirdi. Azərbaycan
yeni bir yolun başlanğıcında idi. İnkişaf
xəttinin hansı səmtə yönələcəyi
ölkənin taleyinə görə məsuliyyəti üzərinə
götürən şəxsin öz xalqına, xalqın
tarixinə, milli dövlətçilik dəyərlərinə
münasibətindən asılı olacaqdı. Azərbaycanı
min illər boyu zərrə-zərrə üst-üstə
toplanmış bu dəyərlərdən bilmərrə
uzaqlaşdıraraq, öz tarixinə, dilinə, milli kimliyinə
tamamilə yad bir ölkəyə də çevirə bilərdin,
bu dəyərlər üzərində Azərbaycanın milli
dövlətçilik tarixinin yeni və qüdrətli bir mərhələsini
başlada da...
İkinci istiqaməti
seçib irəli aparmaq, xalqına, milli dəyərlərinə
sevgidən savayı, yüksək liderlik qabiliyyəti, qətiyyət,
əzmkarlıq, güzəştsiz idarəçilik
istedadı və eyni zamanda ziyalılıq, müdriklik tələb
edirdi.
Bütün bunlardan əlavə,
dünyada və keçmiş sovetlər məkanında
müəyyən dəyişikliklər, nisbətən
yumşalmalar da baş verməli idi ki, milli məsələlərin
inkişafından, cəmiyyətdə haqq-ədalətin
öz yerini tutması üçün atdığın səs-küylü
addımlardan dolayı üzərinə yönələn təzyiq
və təhdidlərdən də özünü qoruya biləsən.
Belə bir məqamda məhz
HEYDƏR ƏLİYEV öz şəxsiyyəti, ideoloji
baxışları, işə münasibəti, qətiyyəti,
peşəkarlığı ilə bütün zəruri
istiqamətləri zərgər dəqiqliyi ilə tamamlayan
ümummilli lider obrazı kimi tarix səhnəsinə
çıxdı.
***
Bundan sonrasında isə yenə
HEYRƏT başlanır...
Ölkənin geridə qalmış
sosial-iqtisadi həyatını qısa zamanda nizama salmaq,
bütün fəaliyyət sahələrinə dəmir
intizam gətirmək, cəmiyyətdə haqqı-ədaləti
bərqərar etmək, insanlarda sabaha inam yaradıb bu
inamın gücü ilə Azərbaycanı bütün
ittifaq məkanında qabaqcıllar cərgəsinə yetirməkdən
ötrü Heydər Əliyevin heyrətamiz liderlik
bacarığına sahib olmaq lazım idi.
Ötən əsrin 50-ci illərinin
ortalarına qədər gərgin psixoloji sarsıntılar
yaşamış, repressiya xofundan illərlə özünə
qapanıb öz içinə çəkilmiş cəmiyyətdə
milli şüurun oyanışına nail olmağı, ana
dilimizi dirçəltməyi, bu xalqın əsrlər boyu
yetişdirdiyi tarixi şəxsiyyətlərə, Vətən
tarixinə, ədəbiyyatına, mədəniyyətinə,
elminə, milli-mənəvi dəyərlərinə sahib
çıxmağı, xalqın azadlıq ruhunun
daşıyıcısı olan ziyalıları repressiya
maşınından qorumağı, onların fəaliyyətini
istiqamətləndirməyi ancaq Heydər Əliyev
bacarardı.
Mərkəzin min bir maneələrinə
baxmayaraq, Azərbaycanın inkişafı ilə bağlı
böyük proqramların qəbul etdirilməsi, ölkənin
gələcəyi üçün milli kadr
potensialının formalaşdırılması, mədəniyyət
diplomatiyasının gücü ilə Azərbaycanın
dünyada tanıdılması, cəmiyyətin tədricən,
addım-addım müstəqil həyata hazırlanması və
indiyə qədər bütün bu sadaladıqlarımın
bir-birinə paralel, bir-biri ilə həmahəng həyata
keçirilməsi kimi çətin bir missiyanın mərkəzində
də Heydər Əliyevdən savayı başqa bir
LİDERİ təsəvvür edə bilmirsən.
Moskvada
çalışmağa başlayarkən, həmin illərdə
xarici mətbuatın da yazdığı kimi, Heydər
Əliyevin şəxsində Kremldə parlayan türk ulduzu
tarixi heyrətləndirmişdi.
Keçmiş imperiyanın ucqar bir
şəhərində, sadə əməkçi ailəsində
dünyaya gəlmiş insanın, üstəlik Azərbaycan
türkünün, İslam ümmətinin köməksiz, dəstəksiz,
yalnız zəkasının gücü ilə
addım-addım irəliləyərək SSRİ boyda ucsuz-bucaqsız nəhəng
imperiyanın əsas rəhbərlərindən olması
nümunəsini türk və
İslam dünyası tarixində
yeganə olaraq, yəqin ki, ancaq Heydər Əliyev yarada bilərdi.
***
Ötən əsrin 70-ci illərində
Azərbaycanın taleyi digər şəxslərin əlində
olardısa,
baş verəcəkləri təsəvvürünə
gətirməyə çalışırsan. 1987-ci ildə
dünya ermənilərinin əli ilə və keçmiş
ittifaq rəhbərliyinin, xüsusilə də Qorbaçov kimilərinin
qısqanclığı ucbatından vəzifəsindən uzaqlaşdırılandan,
respublikaya təsir imkanları məhdudlaşdırılandan
sonra Azərbaycanın başına gətirilən fəlakətlər,
Dağlıq Qarabağ düyünü daş kimi adamın
ürəyindən asılır.
Müstəqilliyin ilk illərində
üzləşdiyimiz faciələr, çətinliklər,
yaşadığımız ictimai sarsıntılar gəlir
adamın gözünün önünə.
Real vətəndaş müharibəsi,
parçalanma təhlükəsi ilə üz-üzə
qalmış, ucqarlarında düşmənlə savaş, mərkəzində
isə hakimiyyət uğrunda dartışmalar gedən kövrək bir Vətənin
yaşadıqları düşür yadına.
İndiki dünyamızın
müsəlman ölkələrində çağdaş səlib
yürüşlərinin törətdiyi fəlakətləri
izlədikcə, dünyaları əllərindən
alınmış körpələrin gözlərindəki kədərinə,
anaların göz yaşlarına, bombalardan canını
qurtarmaq istəyərkən, dənizlərdə qərq olan
zavallı mühacirlərin müsibətinə şahid
olduqca taleyin 1993-cü ildə Azərbaycanı Heydər
Əliyevin əli ilə nə qədər böyük fəlakətdən
hifz etdiyinə əmin olursan.
Və yenə heyrətlənirsən!..
Birdən o həlledici məqamda Heydər
Əliyev olmasaydı?..
Bəs onda Azərbaycan indiki
günlərinə gəlib çıxa biləcəkdimi?!
Bəs bütün ömrü boyu
sovet sistemində çalışmış dövlət
xadiminin siyasi hakimiyyətə qayıdışından sonra
müstəqil dövlətin gələcəyini, inkişaf
istiqamətlərini bu qədər aydınlıqla təsəvvür
edə bilməsi, cəmiyyətdə demokratik dəyərlərin
bərqərar olmasından ötrü apardığı
islahatlar, həyata keçirdiyi hüquqi dövlət
quruculuğu prosesləri, azad bazar iqtisadiyyatı yolunda
qısa müddətə ölkəyə
qazandırdığı böyük nailiyyətlər?!
İndi Siz deyin, bunların hərəsi
bir HEYRƏT nümunəsi deyilmi?!
***
Heydər Əliyev dünyanın
bütün kamil insanları kimi ömrü boyu zora, silaha
deyil, ağla, zəkaya bel bağlamağı təlqin edirdi,
kamalın zor üzərində üstünlüyünü
dövlət rəhbəri kimi şəxsi nümunəsində
bütün dünyaya sərgiləyirdi, dövlətə
silah çəkənlərin üstünə həmişə
ağlı, müdrikliyi ilə gedirdi və hər dəfəsində
də qələbə qazanırdı.
Lider üçün gərək
olan bütün xüsusiyyətlərin onun şəxsiyyətində
bir-birini uğurla tamamlamasının özü də
Tanrının bir möcüzəsi idi...
Uca və şux qamət, yaraşıqlı
sima, sağlam bədən və ruh, mahir natiqlik qabiliyyəti,
dərin zəka, əhatəli biliklər, öyrənmək
həvəsi, məqsədyönlülük, kübar
davranışlar, yüksək zövq. Bunların
hansısa biri olmasaydı, Heydər Əliyevin tarixdəki
obrazı natamam qalardı bəlkə, amma bu xüsusiyyətlərin
hər biri bu böyük dövlət adamının şəxsiyyətində
bir-birini incəliklə tamamlayırdı.
Bir də uzaqgörənlik!..
HEYDƏR ƏLİYEV XXI əsrin
ortalarına doğru dünyada hansı küləklərin əsəcəyini,
yer üzünün hansı gərginliklərlə
üz-üzə qalacağını aydın bəsirəti
ilə irəlicədən görürdü və bilirdi ki,
belə laübalı bir dünyada Azərbaycanı ancaq onun
siyasi xəttinə sadiq qalan, qurucu Atanın yetiri olan qətiyyətli
lider qoruyaraq inkişaf etdirə bilər.
2003-cü ildə ulu öndərin Azərbaycan
Respublikasının Prezidenti cənab İLHAM
ƏLİYEVİ nəzərdə tutaraq söylədiyi
“MƏN ONA ÖZÜM QƏDƏR İNANIRAM!..”
əminliyi ATANIN öz ÖVLADINA olan inamı ilə bərabər,
həm də Azərbaycanın bugünkü qüdrətli
günləri ilə bağlı aydın təsəvvürlərdən
irəli gələn bir xatircəmlik idi...
Heydər Əliyev xoşbəxt ATA
idi - çünki bu gün öz xoş əməlləri ilə
onun inamını doğruldan, üzünü ağ edən
saleh övladları var, arzularındakı Azərbaycanı
qurub yaradan, Vətəni tarixinin ən qüdrətli
çağlarına yetirən, Heydər Əliyev
missiyasını yaşadan və davam etdirən Prezident
İlham Əliyev var!..
...Və bu məfkurəni indi layiqincə
yaşadan, ailə ocağının qoşa qanad kimi cəfakeş
qoruyucusu Mehriban xanım Əliyevanın milyonlar tərəfindən
sevilməsi, qəbul olunması ulu öndərin cənnətməkan
RUHUNA, həm də, əbədi rahatlıq bəxş edir...
Heydər Əliyev uğurlu
dövlət adamı idi - bir liderin öz xalqının milli
dövlətçilik tarixində görə biləcəyi
bütün nəcib işləri yerinə yetirmişdi,
çünki.
Öz missiyası ilə tarixin ən yüksək
ucalıqlarına yüksəlmişdi.
Heydər Əliyev qalib şəxsiyyət
idi - bütün sınaqlardan mətinliklə
çıxmışdı, həyatının ən
böyük ideallarını gerçəkləşdirə
bilmişdi, onu yetirən XALQI öz milli hədəflərinə
çatdırmışdı.
...Və yəqin ki, bu da bir Tanrı
qisməti idi...
***
İllər öncə bir yaz
günü Naxçıvana ziyarətim zamanı şəhərin
mərkəzindəki Heydər Əliyev Muzeyində diqqətimi
çəkən bir şəkil də düşüncələrimi
ovsunlamışdı... Adi bir şəkildən daha çox
insanın alın yazısına işarə, qismət
dediyimiz sirrin hansısa formada şifrələnib qabaqcadan əyan
olması faktı kimi gözlərimə köçürmüşdüm
o şəkli də...
Seyrinə və sehrinə
daldığım eksponat böyük rəssamlıq
istedadına malik Heydər Əliyev o vaxtın pero-qələmi
ilə yeniyetmə bir qızın rəsmini çəkib və
altında da öz dəst- xətti ilə beləcə
yazıb: “Zərifənin şəkli 12 yaşında çəkilib.
1942-ci il aprelin 27-də, axşam saat 9.30-da”.
Əvvəl təəccüblənmişdim,
axı Heydər Əliyev gələcək ömür-gün
yoldaşı Zərifə xanım Əliyeva ilə illər
sonra rastlaşıb peyman bağlayacaqdı, o zaman bu rəsm
1942-ci ildə necə çəkilə bilərdi?!
Yenə HEYRƏT məni
bürümüşdü...
Həmin rəsmi çəkərkən,
Heydər Əliyev 12 yaşlı qızdan adını
soruşur, qız özünü Zarya kimi təqdim edir, belə
məqamlara həssaslıq göstərən (bir
telegörüntüdə çay süfrəsi arxasında
ulu öndərin “kəklikotu” sözünün “kəkotu”
kimi tələffüzünə iradını
xatırlayıram) Heydər Əliyev təhrif olunmuş adla təqdimata
etirazını bildirir və rəsmin altında da öz əlləri
ilə məhz belə yazır: “Zərifənin şəkli...”
HEYRƏTDƏN necə donmayasan?!.
Tanrım, ilk baxışdan adi görünən ömür faktı ilə, bəlkə, öz sevimli bəndənə yazdığın Yazını, günlərin birində qarşısına çıxaracağın ömür-gün qismətinin adını əvvəlcədən əyan edirmişsən və öz qismƏtini Ona öz əlləri ilə yazdırırmışsan...
Heydər Əliyevin o dövrdən dünyaya heyrətlə baxan gözləri də bəlkə Azərbaycanın bu baxışlarla o tarixə düşən xoş bir yazısı imiş, kim bilir...
...Hə, əzizlərim...
...Bir də, bir də baxışlarınızı qaldırıb bu şəklə baxın, gələcək dühanın sabaha heyrətlə baxdığı bu şəklə bir də diqqət yetirin...
O, bu dünyaya gəldi və bu dünyaya HEYRƏTLƏNDİ...
O, bu dünyaya gəldi və bu dünyanı HEYRƏTLƏNDİRDİ...
Bəlkə bu heyrətli baxışlar sabahkı günlərə bir ismarıc idi?..
Bəlkə bizim bu heyrətdən başlanan Ulu Tarix qarşısında gördüklərimiz, eşitdiklərimiz, bildiklərimiz və düşündüklərimizdir?..
...Hər şey, hər şey, həqiqətən də, düşündürücü və heyrətləndiricidir!..
İmamverdi
İSMAYILOV,
Milli Məclisin
deputatı,
əməkdar jurnalist
Azərbaycan.-
2017.-13 aprel.- S.3.