İnsanlara nur bəxş edən alim

Mərhəmət və xeyirxahlıq rəmzinə çevrilən akademik Zərifə Əliyevanın əbədiyaşar xatirəsi ehtiramla anıldı

Görkəmli oftalmoloq alim, əməkdar elm xadimi, akademik Zərifə xanım Əliyevanın anadan olmasının 94 illiyi tamam olur. Əlamətdar günlə bağlı paytaxtın Nəsimi rayonunun idarə və təşkilatlarında görkəmli alimin xatirəsinə həsr olunmuş bir sıra tədbirlər keçirilib. Tədbirlərdə “Azərbaycan qadını” və “Ana - müqəddəslik zirvəsidir” mövzularında inşa yazı, bədii qiraət müsabiqələri keçirilib, şagirdlərin rəsm əsərlərinin sərgiləri təşkil edilib, məktəblərin foyelərində Azərbaycan tibb elminin görkəmli şəxsiyyəti olan akademik Zərifə xanım Əliyevaya həsr olunmuş guşələr yaradılıb.

Nəsimi Rayon İcra Hakimiyyəti Azərbaycan Tibb Universiteti ilə birlikdə akademik Zərifə Əliyevanın anadan olmasının 94-cü ildönümünə həsr olunmuş “İnsanlara nur bəxş edən alim” mövzusunda tədbir keçirib. Tədbirdə Nəsimi Rayon İcra Hakimiyyətinin başçısı Asif Əsgərov Azərbaycanın görkəmli alimi, tibb elmləri doktoru, professor, əməkdar elm xadimi Zərifə xanım Əliyevanın həyat və fəaliyyəti barədə məlumat verib. Qeyd edilib ki, akademik Zərifə xanım Əliyeva respublikamızda tibb elminin inkişafına mühüm töhfələr verərək oftalmologiyanın aktual problemlərinə dair tədqiqatları ilə nəinki keçmiş SSRİ məkanında, həmçinin dünya miqyasında böyük şöhrət qazanmışdır. Onun elmi-pedaqoji və ictimai fəaliyyəti həkimlərin yeni nəslinin yetişməsinə və Azərbaycanda oftalmologiya elminin inkişafına güclü təsir göstərmişdir.

A.Əsgərov bildirib ki, Zərifə xanım Əliyevanın elmi fəaliyyətinin əsas istiqamətlərindən birini də peşə oftalmologiyası təşkil edib. Alim dünyada ilk dəfə görmə orqanının peşə patologiyasını araşdıran elmi-tədqiqat laboratoriyası yaradıb və praktik olaraq elm aləmində yeni bir istiqamətin - “peşə oftalmologiyası”nın əsasını qoyub. Görmə orqanının peşə patologiyası sahəsində apardığı elmi-tədqiqat işlərinin uğurlu nəticələrinə görə akademik Zərifə Əliyeva keçmiş SSRİ-nin oftalmologiya sahəsində ən mötəbər mükafat olan SSRİ Tibb Elmləri Akademiyasının M.İ.Averbax adına mükafatına layiq görülüb. Keçmiş SSRİ-də bu mükafatı alan ilk qadın alim kimi onun adı oftalmologiya elminin tarixinə düşüb. Ümummillli lider Heydər Əliyevin ömür-gün yoldaşı olan Zərifə xanım görkəmli alim olmaqla yanaşı, həm də fəal ictimai xadim, qayğıkeş ana olmuşdur. Zərifə xanımın işıqlı obrazı yüksək vətənpərvərlik və humanizm rəmzi kimi həmişə bizimlə qalacaq, onun parlaq xatirəsi daim anılacaq, qədirbilən xalqımızın qəlbində əbədi yaşayacaq.

Daha sonra Azərbaycan Tibb Universitetinin Oftalmologiya kafedrasının müdiri professor Paşa Musayev və həmin kafedranın dosenti Solmaz Əliyeva Zərifə xanım Əliyevanın həyat və fəaliyyətinin müxtəlif məqamlarından söz açıb, onun Azərbaycan səhiyyəsinə verdiyi töhfələrin əhəmiyyətini yüksək dəyərləndiriblər. Zərifə xanım Əliyeva təkcə çoxşaxəli elmi-tədqiqat işləri aparmaqla kifayətlənməyib, yüksək ixtisaslı gənc alim kadrların yetişdirilməsinə və oftalmoloq-həkimlərin ixtisaslarının artırılması işinə də xüsusi diqqət yetirib. Taleyini tibb elminə həsr edən akademik Zərifə xanım Əliyeva oftalmologiyanın aktual problemlərinə dair tədqiqatlar aparıb, fədakar həkim kimi bir sıra göz xəstəliklərinin müalicəsində, o cümlədən Azərbaycanda traxomanın kökünün kəsilməsinə böyük əmək sərf edib, bu xəstəliyin müxtəlif mərhələlərinin öyrənilməsi və müalicə metodlarının tapılması istiqamətində əvəzsiz xidmət göstərib.

Qeyd edək ki, bu ərəfədə Nəsimi Rayon İcra Hakimiyyəti tərəfindən fiziki qüsurlu şagirdlərin təhsil aldığı 11 və 268 saylı xüsusi məktəblərin şagirdlərinin Bioloji Təbabət Klinikasında pulsuz tibbi müayinəsi təşkil edilib. Azərbaycan Tibb Universitetindəki tədbirdə müayinədən keçmiş uşaqlara eynəklər təqdim olunub.

Tədbir çərçivəsində “Qalereya-1969”da Mədəniyyət və Turizm Nazirliyinin, Nəsimi Rayon İcra Hakimiyyətinin birgə təşkilatçılığı ilə görkəmli elm xadiminin əziz xatirəsinə həsr olunmuş Azərbaycanın tanınmış rəssamlarının əl işlərindən ibarət sərginin də açılış mərasimi keçirilib. Mərasimdə Mədəniyyət və Turizm Nazirliyinin rəhbərliyi, Milli Məclisin deputatları, tanınmış səhiyyə işçiləri, rayon ictimaiyyətinin, ağsaqqalların, veteranların, gənclərin nümayəndələri iştirak ediblər.

Mədəniyyət və turizm naziri Əbülfəs Qarayev görkəmli tibb mütəxəssisi, əməkdar elm xadimi, akademik Zərifə xanım Əliyevanın anadan olmasının 94 illiyinə həsr olunan tədbirin əhəmiyyətindən danışıb, alimin əziz xatirəsinə həsr olunan sərgidə nümayiş etdirilən rəsm əsərlərini yüksək qiymətləndirib.

Mərasim iştirakçıları Azərbaycanın görkəmli rəssamlarından Oqtay Sadıxzadənin “Zərifə xanım Əliyevanın portreti”, Altay Sadıxzadənin “Mehriban xanımın portreti”, həmçinin xalq rəssamları Baba Əliyevin, Mikayıl Abdullayevin, Tahir Salahovun, Maral Rəhmanzadənin, Vəcihə Səmədovanın, Xalidə Səfərovanın, Salam Salamzadənin, Ağa Mehdiyevin, Asəf Cəfərovun və digər görkəmli rəssamların anaya, Azərbaycan qadınlarına həsr olunmuş əsərlərinə tamaşa etmişlər.

Tədbirdə xalq artisti Samir Cəfərov “Ana” mahnısı ilə, Bakı Musiqi Akademiyasının tələbələri Mədinə Ağayeva, Vüsal Aydəmirov və Alp Əliyev müxtəlif klassik musiqi nömrələri ilə çıxış ediblər.

Elnur HACALIYEV,

Azərbaycan.- 2017.- 27 aprel.- S. 4.