Balet də milli rəqslərimiz kimi sevilir
Rəqs də musiqi kimi, sərhəd tanımır. Hər bir xalqın
rəqsi həm də onun milli
kimliyini qoruyub saxlayan və mənəvi dəyərlər
sırasında olan sənətlərdəndir. Rəqslərin müxtəlif növləri
var ki, onlardan
biri də baletdir. Əslində, Avropadan dünya
coğrafiyasına ayaq
açan balet bu gün hər
bir xalqın milli rəqsləri kimi sevilərək ifa edilməkdədir.
Balet rəqslərinin səhnə
və ekran əsərlərində özünə
beynəlxalq status qazanması
da inkarolunmazdır.
Azərbaycan xalqının milli rəqslərinin al-əlvanlığının
səbəblərindən biri
də ölkəmizdə
multikultural dəyərlərə
xüsusi önəm verilməsidir. Müxtəlif azsaylı xalqların,
etnik qrupların belə öz milli adət-ənənələrinin
qorunub saxlandığı
Azərbaycanda rəqslərin
də növlərinin
çox olması təbiidir.
Milli rəqslərimizin tarixinin
qədimlərə, hətta,
meydan tamaşalarınadək
gedib çıxması
barədə kifayət
qədər məlumatlar
var. Lakin, əlbəttə,
Avropada daha çox yayılmış
rəqslərdən biri
kimi balet ölkəmizə ötən
əsrin əvvəllərində
gətirilib. Fərdi qaydada bu rəqsdən
istifadə edilsə də, rəsmi qaydada Bakıda ilk balet studiyası Əli Bayramov adına Mərkəzi
Klubun nəzdində
1922-ci ildə yaradılıb.
Bir il
sonra, avqustun 18-də isə Xalq Maarif
Komissarlığı Kollegiyasının
qərarına əsasən
açılan “Balet studiyası” Bakı Xoreoqrafiya Məktəbinə
çevrilib. Azərbaycanın ilk böyük ustad balerinası, xalq artisti Qəmər Almaszadə məhz
1925-1929-cu illərdə burada
həmin sənətin
sirlərini öyrənib.
Məktəbin keçdiyi yola qısa ekskursiyadan məlum olur ki, 1933-cü ildə burada 157 şagird təhsil alıb. Əvvəlcə
təhsil müddəti
4 il idisə,
sonradan 9 ilə çatdırılıb. Sənət beşiyinə
sözün əsl mənasında sənətkarların
cəlb edilməsindən
sonra balet səhnəsi üçün
mütəxəssislər hazırlanması
sistemli şəkildə
formalaşıb, məktəbdə
maraqlı tədris tamaşalarının nümayişinə
başlanılıb.
Bu təhsil
müəssisəsinin adı
və statusu bir neçə dəfə dəyişdirilib
ki, bu da
onun fəaliyyəti ilə bağlı olub. O, 1935-ci ildə xoreoqrafiya
məktəbi, sonra texnikumu, 1962-ci ildə isə Mədəniyyət
Nazirliyi nəzdində
yenidən Bakı Xoreoqrafiya Məktəbi adlandırılıb. O zaman
məktəbdə çalışan
Qəmər Almaszadə
xalq artistləri Leyla Vəkilova, Rəfiqə Axundova, Tamilla Şirəliyeva, Çimnaz Babayeva, əməkdar artist Tamilla Məmmədova, Vera Tsiqnadze
kimi məşhur balet ustalarını yetişdirib.
Məhz həmin illərdə milli rəqs ənənələrinin qorunması
və təbliği, gənclərdə bu səhnə sənətinin
professional öyrənilməsi hissinin aşılanması
zərurətindən burada
xalq bölməsi yaradılıb. Azərbaycanın
xalq artistləri Xumar Zülfüqarova, Afaq Məlikova, Cəmilə Bayramova, Roza Cəlilova, əməkdar artistlərdən
Nailə Mahmudova, Səbinə Qasımova, Elizbar Osmanov və başqaları həmin bölmədə
təhsil alıblar.
Xatırladaq ki, iyirminci yüzilliyin 50-70-ci
illərində Bakı
Xoreoqrafiya Məktəbini
əməkdar artistlər
Ramazan və Olqa Arifulinlər, Nelli Bokovets, Gülbacı Hacıyeva, Nailə Nəzirova, Rimma Məmmədova, Rüfət və Valentina Zeynalovlar, Sima Feyzullayeva, Lyubov Filippova, Ella Almazova və digər balet ustaları bitiriblər. Onu da qeyd edək
ki, adıçəkilən
məktəbin məzunları
olmuş xalq və əməkdar artistləri yüksək ixtisaslı, professional kadrlar
qismində müəyyən
müddətdən sonra
təhsil aldıqları
doğma ocağa qayıdaraq pedaqoji fəaliyyətə qoşulublar.
Həmin
fəaliyyətin uğurlu
nəticəsi məhz
XX əsrin 60-70-ci illərində
Azərbaycan milli balet sənətinin beynəlxalq səviyyədə
təbliğ olunmasına
şərait yaradıb.
Azərbaycan Respublikası
Prezidentinin 30 aprel
2014-cü il tarixli sərəncamı ilə Bakı Xoreoqrafiya Məktəbinin
bazasında Bakı Xoreoqrafiya Akademiyası yaradılaraq fəaliyyətə
başlayıb. Akademiya
ümumi təhsil (ibtidai, ümumi orta və tam orta təhsil), orta ixtisas və
ali təhsil
(bakalavr, magistr, doktorantura) pillələri
üzrə təhsil proqramı və əlavə təhsilin müvafiq istiqamətlərini
(ixtisasartırma, kadrların
yenidən hazırlanması,
stajkeçmə və
kadrların təkmilləşməsi,
təkrar ali təhsil və orta ixtisas təhsili,
dərəcələrin yüksəldilməsi)
həyata keçirir.
Azərbaycan Prezidenti
İlham Əliyevin xoreoqrafiya sənəti ənənələrinin qorunması
və inkişaf etdirilməsi zərurətini
nəzərə alaraq,
bu sahə üzrə yüksək ixtisaslı kadrların hazırlanmasını təmin
etmək məqsədi
ilə “Bakı Xoreoqrafiya Akademiyasının
yaradılması haqqında”
imzaladığı 30 aprel
2014-cü il tarixli sərəncam bu müəssisənin fəaliyyətinin
genişlənməsinə stimul verib. Akademiyada baletmeyster
sənəti, balet pedaqogikası, balet artisti, balet tarixi və digər ixtisas və ixtisaslaşmalar üzrə tədris aparılır. Akademiyanın
klassik rəqs bölməsində görkəmli
balet ustaları, xalq artisti Gülağası
Mirzəyev, əməkdar
artistlər Rimma İsgəndərova, Tamilla
Məmmədova, milli rəqs bölməsində
xalq artistləri Yusif Qasımov, Rüfət Xəlilzadə,
əməkdar artistlər
Səbinə Qasımova,
Sənan Hüseynli və başqaları pedaqoji fəaliyyətlə
məşğuldurlar.
Burada müntəzəm xarakter daşıyan elmi-praktik konfranslar, respublika miqyaslı müsabiqələr,
böyük ustad sənətkarların yubiley
gecələri keçirilir. Eləcə
də tədris planları və proqramları yenidən işlənir, xoreoqrafiya sənətinin ayrı-ayrı
sahələri üzrə
metodiki vəsaitlər,
təlimatlar və digər materiallar hazırlanır, “Elmi əsərlər” toplusu və “Sənət akademiyası” adlı elmi-nəzəri məcmuə
nəşr olunur.
Akademiyanın şagird və tələbələri, o cümlədən
professional müəllim heyəti
ölkədə və
respublikanın hüdudlarından
kənarda keçirilən
beynəlxalq festivallarda,
müsabiqə və yubiley gecələrində
uğurla çıxış
edirlər.
Moskva Dövlət
Xoreoqrafiya Akademiyası
və Sankt-Peterburq A.Y.Vaqanova adına “Rus Baleti” Akademiyası,
Moskva Dövlət İncəsənət İnstitutu,
M.K.Çurlyönis adına
Litva Milli İncəsənət Məktəbi
ilə əməkdaşlıqla
bağlı imzalanan saziş də məhz əlaqələrin,
əməkdaşlıq şəbəkəsinin
genişləndirilməsi məqsədi
daşıyır. Bunlardan savayı,
daha geniş beynəlxalq əlaqələrin
yaradılması istiqamətində,
o cümlədən Bakı
Xoreoqrafiya Akademiyasında
ustad dərslərinin
təşkili üçün
dünyanın bir çox ölkələrinin
xoreoqrafları ilə
danışıqlar aparılır.
90 illik
professional xoreoqrafiya təhsil
ənənələrini yaşadan
bu akademiyanın uğur və nailiyyətləri nəinki
ölkədə, eləcə
də xaricdə kifayət qədər tanınır və rəğbətlə qarşılanır. Akademiyada çalışan
elmi-pedaqoji kollektivin xoreoqrafiya, xüsusilə də balet və
milli rəqs üzrə yüksək ixtisaslı kadrların hazırlanması istiqamətindəki
fəaliyyəti bu sahəyə olan marağın artmasına səbəb olub.
Azərbaycan Dövlət
Akademik Opera və Balet Teatrının səhnəsində Bakı
Xoreoqrafiya Akademiyasının
tələbələrinin ifasında
bu il
ilk dəfə olaraq dahi bəstəkarımız
Qara Qarayevin “Yeddi gözəl” baletinin nümayişi yaddaqalan tədbirlərdən
biridir. Akademiyanın tələbələrinin buraxılış-hesabat
tamaşası olan “Yeddi gözəl” baleti eyni zamanda
“Azərbaycan Respublikasında
“İslam həmrəyliyi
ili”nə həsr olunan növbəti layihələrdən
biridir.
“İslam
həmrəyliyi ili”nə
həsr olunmuş layihələr çərçivəsində
Azərbaycan Dövlət
Musiqili Teatrın səhnəsində keçirilən
tədbirlərdən biri
də “Səmayi-şəms”
rəqs-tamaşasıdır. Tamaşanı möhtəşəm “Davulla
rəqs” kompozisiyası
açaraq, dünyaya
sülh və həmrəylik mesajları
göndərib. İslam
dünyasının aparıcı
dövlətləri sayılan
Azərbaycan, Türkiyə,
İran, Albaniya, Misir, Qazaxıstan, Özbəkistan, Tacikistan,
bir sıra ərəb və digər müsəlman ölkələrinə məxsus
milli rəqslərdən
ibarət vahid ssenari üzrə hazırlanan rəqs-tamaşanın
bədii rəhbəri
Bakı Xoreoqrafiya Akademiyasının prorektoru,
xalq artisti Təranə Muradova, rejissoru Cavid İmamverdiyevdir.
Bakı Xoreoqrafiya Akademiyası respublikamızın ictimai-mədəni
həyatında fəal
iştirak etməklə
yanaşı, ölkəmizi
beynəlxalq tədbirlərdə
də layiqincə təmsil edir. Akademiya qısa
müddət ərzində
böyük nailiyyətlər
əldə edib, mühüm elm, təhsil və sənət layihələrinə imza atıb.
Məhəmməd
NƏRİMANOĞLU,
Azərbaycan.- 2017.-6 avqust.- S.6.