Paytaxtda Yeni ilin ilk müjdəçisi
“Soyuq
əllər, isti ürək” xeyriyyə yarmarkası Bakı sakinlərində böyük
maraq oyadıb
Yeni ilin gəlməsinə az qalıb. Hər il
bu bayram müxtəlif ölkələrdə
eyni həyəcan, təntənə və ruh yüksəkliyi ilə qarşılanır.
Bakıda da bayram əhvali-ruhiyyəsi
indidən hiss olunmağa
başlayıb.
Paytaxtın Fəvvarələr meydanında
“Soyuq əllər, isti ürək” xeyriyyə yarmarkasının
təşkili bu ab-havanı daha da gücləndirir. Fəvvarələr
bağında “Nargis Fund”un rəhbərliyi
və “A+A Events”in təşkilatçılığı ilə artıq 5-ci ildir xeyriyyə yarmarkası keçirilir.
Həmişə olduğu
kimi, bu il də
yarmarkadan toplanan gəlir xeyriyyə işlərinə sərf
olunacaq.
Dekbarın 1-dən etibarən işə başlayan yarmarkada insanların sıxlığı
nəzərə çarpır. Yarmarkanın nağıllar aləminə
bənzəməsi ilə
yanaşı, əldə
edilən vəsaitin xeyriyyə işlərinə
sərf olunacağı
da insanların buraya maraqlarının artmasına səbəb olur.
Budəfəki yarmarkada əvvəlki illərə nisbətən
kiçik taxta “evlər”in sayı artırılaraq 46-ya çatdırılıb. Həmin “evlər”də
şəhər sakinlərinə
və turistlərə
yeməklər, suvenirlər,
əl işləri, oyuncaqlar, yolka bəzəkləri, kitablar
və sair təklif olunur.
Kiçik “evlər”dən
isti çay və qəhvə alıb içənlər,
yeməklərdən və
şirniyyatlardan dadanlar arasında
yerli sakinlər üstünlük təşkil
edirdi. Turistlərin isə diqqətini
daha çox Azərbaycan mədəniyyətinə
xas olan bölmələr, milli aksesuarlar, xüsusən də böyük samovar çayının qaynadılması
çəkirdi. Yerli sakinlər
ilə turistləri birləşdirən ortaq cəhət isə daha çox “selfi” etmələri idi.
Yeni ilin simvolu olan
yolka ilə şəkil çəkdirmək
üçün insanlar
sıraya dururdular. Yarmarkada cizgi
filmi qəhrəmanları
uşaqları əyləndirərək
buraya ayrı bir rəng qatırdılar.
Şaxta
baba və maşını ilə şəkil çəkdirərək
həmin anı yaddaşa həkk edənlər də vardı.
Yarmarkaya gələnlər kitab “evlər”inin 90 faizə qədər endirimlərindən
yararlanırdılar.
Əl işlərindən
ibarət aksesuarlar bölməsinin satıcısı
artıq üçüncü
ildir yarmarkaya qatıldığını deyərək
bu il
alışın daha da artdığını söylədi. O, ölkəmizdə
bu cür xeyriyyə yarmarkalarının
təşkilinin müsbət
hal olduğunu qeyd etdi.
Burada təhlükəsizliyi təmin
etmək üçün
asayişə də ciddi nəzarət edilir.
Yarmarka 2018-ci il yanvarın 15-dək
davam edəcək.
Səbinə MƏMMƏDOVA
Azərbaycan.- 2017.-10 dekabr.- S.8.