Cocuq Mərcanlıda ilk bayram tonqalı qalandı

Novruzun ilk - Su çərşənbəsində Cocuq Mərcanlıda 24 illik fasilədən sonra ilk bayram tonqalı qalandı.

Torpaq uğrunda ölən varsa, Vətəndir! Bu söz çox deyilib, çox eşidilib, çox sınaqdan keçib. Cocuq Mərcanlıya qədəm basanda da ilk növbədə məhz bu kəlam yada düşür. Çünki Cocuq Mərcanlı hər bir azərbaycanlının uğrunda can qoymağa hazır olduğu doğma Vətən torpağının bir parçasıdır. Qoruduğun torpağı canlandırmaq üçün həm də onu əkib-becərməlisən, cənnətməkana çevirmək üçün orada qurub-yaratmalısan. Bu da ulu Dədə Qorquddan üzübəri xalqımızın tapındığı həqiqət, əməl etdiyi xeyirxah işlərin ifadəsidir.

Cocuq Mərcanlıda neçə-neçə illərdən sonra ilk çərşənbə tonqalının yandırılması böyük məna kəsb etdi. Bu tonqal 24 il əvvəl ulu öndər Heydər Əliyev tərəfindən düşməndən azad edilən və Prezident İlham Əliyevin sərəncamı ilə yenidən tikilib qurulmağa başlayan Cocuq Mərcanlıda canlanan həyatın rəmzinə çevrildi.

Ötən illər boyu Cocuq Mərcanlıda yaşayan yeganə ailənin ağbirçəyi Minarə Hakıyeva söylədi ki, bu bahar üzümüzə xoş gəlir. Bu gün Cocuq Mərcanlı kəndinin ortasında ilk dəfə bayram tonqalı qalandı. Böyük, uşaq - hamı sevinir. Bizi bu arzu və niyyətlərimizə çatdıran dövlət başçısı İlham Əliyevdir, onun böyük köməkçisi və silahdaşı Mehriban xanım Əliyevadır.

Biz bilirik ki, bütün bunlar gərgin zəhmət və mübarizə ilə başa gəlir. Mehriban xanım, o cümlədən Azərbaycan qadınlarının və uşaqlarının, onların da sırasında sərhəd bölgələrində yaşayan, qaçqın və məcburi köçkün olan ailələrin böyük himayədarıdır.

Çərşənbə tonqalı kənddə tikiləcək məktəb binasının təməli üçün torpaqhazırlama işlərinin görüldüyü yerin yaxınlığında qalanmışdı. Bəlkə bu, təsadüf idi, bəlkə də düşünülərək seçilmiş yer. Amma hər halda bu məkan nüansı çox yerinə düşmüşdü. Tonqalın gələcək məktəb qarşısında çatılması Cocuq Mərcanlıya gələn yeni həyatın, böyük sabahın, burada gələcək nəsillərin böyüyəcəyinin qətiyyəti idi.

Nəhəng tonqal ətrafa işıq saçır, nur paylayır, çatılan ocağın özünəməxsus “zümzümə”si sanki aləmə səs salmaq istəyirdi: “E-hey!.. Biz olmuşuq, biz varıq, olacağıq, artacağıq!”

Tonqal ətrafına toplaşan insanların üzündə sevinclə yanaşı, bir həyəcan hissi də duyulurdu. Bunlar Cəbrayıl Rayon İcra Hakimiyyətinin nümayəndələri, Cocuq Mərcanlını yenidən qurub-tikməyə gəlmiş inşaatçılar, minaaxtaranlar, neçə illərdir kəndi tərk etməyib burada ömür sürən ailənin üzvləri idi.

Loğman Bayramov inşaatçı dostlarının hamısının fikrini ifadə edərək dedi ki, biz Cocuq Mərcanlının, bütün Azərbaycanın yaşadığı tarixi günlərin iştirakçısıyıq. Dövlət başçısının sərəncamı ilə bu kənddə görüləcək işlərə birinci başladığımızdan böyük fərəh və qürur duyuruq. İnşaatçılarımız ilk çərşənbə tonqalını yandıranlarla da bir sıradadır. Məktəbin təməlini qoymaq üçün torpaq işlərinə başlayanda inşaatçılarımızın gözləri yaşardı. Çoxumuz əyilib torpağı öpdük.

Cocuq Mərcanlıda yaşayan ailənin gəlini Xuraman xanımın da ürəyi dolu idi. Dedi ki, indiyə qədər hər dəfə dönüb yağı əli ilə xarabalığa çevrilmiş kəndə baxanda ürəyimiz ağrıyırdı. Camaatımızın firavan, çal-çağırlı günləri yadımıza düşürdü. Tezliklə oba yurda qayıdacaq. Prezidentə, Mehriban xanım Əliyevaya, onlara dəstək verən xalqımıza, ordumuza minnətdarıq. Yaxın vaxtlarda biz də tənhalıqdan qurtaracağıq, qohum-qonşulu olacağıq. Əl-ələ verib dolanacaq, yeni güzəran quracağıq.

Üzümüzə gələn növbəti Novruzların çərşənbələrində Cocuq Mərcanlıda çox tonqallar yandırılacaq. Hər həyətdən səs gələcək, hər bacadan tüstü çıxacaq, hər ocaqda qazan qaynayacaq. Budəfəki Su çərşənbəsi bax, həmin od-ocaqdan müjdə verirdi.

Suların axar, ocaqların yanar, qazanların qaynar olsun, Cocuq Mərcanlı!

Flora SADIQLI,

Elçin CƏFƏROV,

Azərbaycan.- 2017.- 23 fevral.- S.1, 6.